Honda EV: భారత మార్కెట్లోకి హోండా సరికొత్త క్యూసీ3 ఎలక్ట్రిక్ స్కూటర్.. రూ.5,000లకే బుకింగ్స్ షురూ

Honda EV: ప్రముఖ టూ-వీలర్ దిగ్గజం హోండా భారతీయ ఎలక్ట్రిక్ వెహికల్ మార్కెట్లోకి అడుగుపెడుతూ తన సరికొత్త హోండా క్యూసీ3 ఎలక్ట్రిక్ స్కూటర్‌ను అధికారికంగా లాంఛ్ చేసింది. కుటుంబాల అవసరాలను దృష్టిలో ఉంచుకుని దీన్ని ప్రత్యేకంగా స్మార్ట్ ఫ్యామిలీ ఎలక్ట్రిక్ స్కూటర్ రూపంలో తీర్చిదిద్దారు. ఎక్స్ షోరూమ్ వద్ద దీని ప్రారంభ ధరను రూ.1.35 లక్షలుగా నిర్ణయించారు. అయితే మొదటి దశలో ఈ స్కూటర్‌ను దేశవ్యాప్తంగా కాకుండా కేవలం ఢిల్లీ, ఆగ్రా, కటక్, సూరత్, కొల్లమ్ వంటి ఎంపిక చేసిన ఐదు నగరాల్లోని కొన్ని హోండా రెడ్‌వింగ్ డీలర్‌షిప్‌ల ద్వారా మాత్రమే విక్రయించనున్నారు.

ఈ సరికొత్త హోండా క్యూసీ3 ఎలక్ట్రిక్ స్కూటర్‌లో 3.0kWh పవర్ఫుల్ బ్యాటరీ ప్యాక్‌ను అమర్చారు. కంపెనీ అందించిన సమాచారం ప్రకారం.. ఈ స్కూటర్ ఒక్కసారి పూర్తి ఛార్జ్ చేస్తే ఐడీసీ నిబంధనల ప్రకారం ఏకంగా 145 కిలోమీటర్ల దూరం ప్రయాణించగలదు. నగరాల్లో రోజూ రాకపోకలు సాగించే వారికి ఈ మైలేజ్ ఎంతో ఉపయోగకరంగా ఉంటుందని కంపెనీ భావిస్తోంది. ఇక ఛార్జింగ్ విషయానికి వస్తే ఈ బ్యాటరీ 0 నుంచి 80 శాతానికి ఛార్జ్ కావడానికి సుమారు 2 గంటల 40 నిమిషాలు పడుతుంది. అలాగే బ్యాటరీని పూర్తిగా ఛార్జ్ చేయడానికి సుమారు 4 గంటల సమయం పడుతుంది.

గ్రాహకులు ఈ సరికొత్త ఎలక్ట్రిక్ స్కూటర్‌ను కేవలం రూ.5,000 చెల్లించి బుక్ చేసుకోవచ్చు. అధికారిక HMSI వెబ్‌సైట్ ద్వారా లేదా పైన పేర్కొన్న ఐదు నగరాల్లోని అధీకృత డీలర్‌షిప్‌ల ద్వారా బుకింగ్ ప్రక్రియను పూర్తి చేయవచ్చు. కస్టమర్లను ఆకట్టుకునేందుకు హోండా ఈ స్కూటర్‌ను మొత్తం నాలుగు అందమైన కలర్ ఆప్షన్లలో అందుబాటులో ఉంచింది. మ్యాట్ ఫోటాన్ గ్రే మెటాలిక్, పర్ల్ ప్రెసియస్ వైట్, పర్ల్ షాలో బ్లూ, పర్ల్ సైరెన్ బ్లూ రంగులలో ఈ స్కూటర్ కొనుగోలుకు లభిస్తుంది.

రోజువారీ ప్రయాణాలను మరింత సులభతరం చేయడానికి హోండా ఈ స్కూటర్‌లో అనేక అధునాతన ఫీచర్లను పొందుపరిచింది. ఇందులో 5 అంగుళాల టీఎఫ్‌టీ డిస్‌ప్లేను ఏర్పాటు చేశారు. దీనికి హోండా రోడ్‌సింక్ కనెక్టివిటీ సపోర్ట్ లభిస్తుంది, దీని ద్వారా రైడర్ స్క్రీన్పైనే టర్న్-బై-టర్న్ నావిగేషన్ వివరాలను పొందవచ్చు. అంతేకాకుండా కీ-లెస్ అనుభూతినిచ్చే స్మార్ట్ కీ ఫీచర్ కూడా ఉంది. కుటుంబ అవసరాల కోసం ఇందులో ఏకంగా 32 లీటర్ల భారీ అండర్ సీట్ స్టోరేజ్ స్పేస్‌ను అందించారు. దీనివల్ల రోజువారీ సామాను లేదా హెల్మెట్‌ను సులభంగా భద్రపరుచుకోవచ్చు.