Hyundai i20: కార్ లవర్లకు షాకిచ్చిన హ్యుందాయ్.. పాపులర్ కార్ ధర భారీగా పెంపు

Hyundai i20: భారతీయ ఆటోమొబైల్ రంగంలో ప్రముఖ కార్ల తయారీ సంస్థ హ్యుందాయ్ మోటార్ ఇండియా తన పాపులర్ ప్రీమియం హ్యాచ్‌బ్యాక్ కారు హ్యుందాయ్ ఐ20 కొనుగోలుదారులకు షాక్ ఇచ్చింది. ఈ కారులోని వేర్వేరు వేరియంట్లపై రూ.5,000 వరకు ధరలను పెంచుతూ కంపెనీ అధికారిక నిర్ణయం తీసుకుంది. అయితే ప్రారంభ వేరియంట్లు అయిన ఎరా పెట్రోల్ ఎమ్‌టీ, మాగ్నా ఎగ్జిక్యూటివ్ పెట్రోల్ ఎమ్‌టీ వేరియంట్ల ధరల్లో ఎలాంటి మార్పులు చేయలేదు. తాజా పెంపు తర్వాత హ్యుందాయ్ ఐ20 ఎక్స్-షోరూమ్ ధరలు రూ.6 లక్షల నుంచి ప్రారంభమై రూ.10.68 లక్షల వరకు చేరాయి.

పవర్‌ఫుల్ 4-సిలిండర్ ఇంజిన్ ప్రత్యేకత

ఈ విభాగంలో ప్రత్యేక గుర్తింపు ఉన్న హ్యుందాయ్ ఐ20 కారులో 1.2 లీటర్ల ఫోర్ సిలిండర్ పెట్రోల్ ఇంజిన్‌ను అమర్చారు. ఈ ఇంజిన్ సుమారు 82 బిహెచ్‌పి పవర్, 114.7 ఎన్ఎమ్ టాప్ టార్క్‌ను సమర్థవంతంగా ఉత్పత్తి చేస్తుంది. ఇందులో 5-స్పీడ్ మాన్యువల్ గేర్‌బాక్స్‌తో పాటు ఐవిటి (ఇంటెలిజెంట్ వేరియబుల్ ట్రాన్స్‌మిషన్) ఆటోమేటిక్ గేర్‌బాక్స్ ఆప్షన్లు అందుబాటులో ఉన్నాయి. తమ సెగ్మెంట్‌లో నాలుగు సిలిండర్ల పెట్రోల్ ఇంజిన్‌తో వస్తున్న ఏకైక ప్రీమియం హ్యాచ్‌బ్యాక్ కారు కావడంతో కస్టమర్లలో దీనికి ఎప్పుడూ ఆదరణ తగ్గలేదు.

కొత్త మోడళ్ల ప్రదర్శనకు ఏర్పాట్లు

భారత మార్కెట్లో తమ వాహనాల శ్రేణిని మరింత విస్తరించాలని హ్యుందాయ్ సంస్థ ప్రణాళికలు సిద్ధం చేస్తోంది. 2027 లో జరగబోయే భారత్ మొబిలిటీ ఎక్స్‌పో వేదికగా పలు నూతన మోడళ్లను ఆవిష్కరించేందుకు కంపెనీ సన్నాహాలు చేస్తోంది. ఈ క్రమంలో ఒక చిన్న సైజ్ ఎలక్ట్రిక్ ఎస్‌యూవీతో పాటు బహుళ ప్రయోజనాలు ఉన్న కొత్త ఎమ్‌పివి వాహనాన్ని మార్కెట్‌లోకి తీసుకువచ్చేందుకు ఏర్పాట్లు శరవేగంగా జరుగుతున్నాయి.

ఐయోనిక్ పీ ఎలక్ట్రిక్ ఎస్‌యూవీ లాంచ్

హ్యుందాయ్ రాబోయే ఎలక్ట్రిక్ కార్లలో ఐయోనిక్ పీ పేరు ప్రముఖంగా వినిపిస్తోంది. ఇది 4 మీటర్ల కంటే తక్కువ పొడవు ఉండే కాంపాక్ట్ ఎలక్ట్రిక్ ఎస్‌యూవీ కానుంది. వచ్చే ఏడాది చివరి నాటికి దీనిని భారతీయ రోడ్లపైకి తీసుకురావాలని కంపెనీ భావిస్తోంది. ప్రస్తుతం ఉన్న క్రెటా ఎలక్ట్రిక్ మోడల్ కంటే కింది కేటగిరీలో దీనిని తీసుకురావడం వల్ల తక్కువ ధరలోనే ఎలక్ట్రిక్ వాహనం కోరుకునే వారికి ఇది సరైన ఎంపికగా మారనుంది.

నయా నైరా ఎంపీవీ ఎంట్రీ

దీనితో పాటు హ్యుందాయ్ నైరా పేరుతో ఒక కొత్త ఎంపీవీ కారును పరిచయం చేయడానికి ప్రణాళికలు రచిస్తోంది. ఇది కియా కారెన్స్ క్లావిస్ మోడల్ ఆధారంగా రూపుదిద్దుకోనుంది. కియా ఎంపీవీలోని అనేక ఆధునిక ఫీచర్లు, టెక్నాలజీని ఇందులో పొందుపరిచే అవకాశం ఉంది. వచ్చే ఏడాది ప్రారంభంలో జరిగే ఆటో ప్రదర్శనల సమయంలో దీనిని భారత మార్కెట్‌కు పరిచయం చేసి త్వరలోనే విక్రయాలు ప్రారంభించాలని భావిస్తున్నారు.