Hyundai : భారతదేశంలో కార్ల మార్కెట్ ప్రస్తుతం తీవ్రమైన పోటీలో ఉంది. ప్రతి కంపెనీ తమ కొత్త మోడల్స్, డిస్కౌంట్లు, అడ్వాన్సుడ్ ఫీచర్లతో కస్టమర్‌లను ఆకర్షించడానికి ప్రయత్నిస్తున్నాయి. ఈ నేపథ్యంలో చాలా కాలంగా భారత మార్కెట్‌లో రెండో స్థానంలో ఉన్న హ్యుందాయ్ ఇప్పుడు మూడో స్థానానికి పడిపోయింది. అంటే అమ్మకాల పరంగా కంపెనీకి ఎదురుదెబ్బ తగిలింది. అయితే, ఆశ్చర్యకరంగా, ఈ అమ్మకాల క్షీణత ఉన్నప్పటికీ, క్రెడిట్ రేటింగ్ ఏజెన్సీ క్రిసిల్ హ్యుందాయ్‌కి అత్యధిక స్వల్పకాలిక రేటింగ్ అయిన A1+ ఇచ్చింది.
ఆగస్టు 21, 2025న CRISIL హ్యుందాయ్ మోటార్ ఇండియా ఆర్థిక బలాన్ని సమీక్షించింది. ఈ రివ్యూలో అనేక విషయాలు వెలుగులోకి వచ్చాయి. కంపెనీకి చెందిన రూ. 3,700 కోట్ల దీర్ఘకాలిక బ్యాంక్ లోన్‌లపై AAA/Stable రేటింగ్‌ను అలాగే కొనసాగించింది. స్వల్పకాలిక సాధనాలు , రూ. 100 కోట్ల అప్పుపై A1+ రేటింగ్‌ను ఇచ్చింది. ఈ రెండు రేటింగ్‌లు వాటి వాటి విభాగాల్లో అత్యున్నత స్థాయివిగా పరిగణించబడతాయి. హ్యుందాయ్ మోటార్ ఇండియా ఈ రేటింగ్‌లకు సంబంధించిన సమాచారాన్ని ఎన్ఎస్ఈ, బీఎస్ఈ రెండింటిలోనూ నమోదు చేసింది.
AAA/Stable రేటింగ్ అంటే హ్యుందాయ్ దీర్ఘకాలిక ఆర్థిక కట్టుబాట్లు చాలా బలంగా ఉన్నాయని అర్థం. A1+ రేటింగ్ కంపెనీ తన స్వల్పకాలిక బాధ్యతలు, నగదు అవసరాలను సులభంగా నిర్వహించగలదని సూచిస్తుంది. ఈ రేటింగ్‌ల కారణంగా హ్యుందాయ్‌కి తక్కువ వడ్డీ రేట్లపై నిధులు లభించే అవకాశం ఉంది.పెట్టుబడిదారుల విశ్వాసం మరింత బలపడుతుంది.
