Hyundai Tucson : క్రాష్ టెస్ట్‌లో జీరో స్టార్ నుంచి ఫుల్ 5 స్టార్‌కు.. హ్యుందాయ్ టక్సన్ అద్భుతం

Hyundai Tucson : హ్యుందాయ్ కంపెనీ ఎస్‌యూవీ టక్సన్ మరోసారి తన సేఫ్టీని నిరూపించుకుంది. మూడేళ్ల క్రితం క్రాష్ టెస్ట్‌లో పూర్తిగా ఫెయిల్ అయిన ఈ ఎస్‌యూవీ, ఇప్పుడు దాని 2025 ఫేస్‌లిఫ్ట్ మోడల్‌తో అద్భుతమైన కమ్‌బ్యాక్ ఇచ్చింది. తాజాగా నిర్వహించిన లాటిన్ NCAP క్రాష్ టెస్ట్‌లో టక్సన్ ఫుల్ 5-స్టార్ సేఫ్టీ రేటింగ్‌ను సాధించింది. లాటిన్ NCAP నిర్వహించిన తాజా క్రాష్ టెస్ట్‌లో 2025 హ్యుందాయ్ టక్సన్ ప్రతి విభాగంలోనూ అద్భుతమైన పనితీరును కనబరిచింది.పెద్దల భద్రతలో 83.98%, పిల్లల భద్రతలో 91.62% స్కోర్, పాదచారుల భద్రతలో 75.08% స్కోర్ లభించింది. సేఫ్టీ అసిస్ట్ లో 96.28% స్కోర్ లభించింది. ఈ గణాంకాలు కొత్త టక్సన్ కేవలం డ్రైవర్, ప్రయాణీకులకే కాకుండా, పాదచారులకు కూడా గతంలో కంటే ఎక్కువ సేఫ్టీని అందిస్తుందని స్పష్టం చేస్తున్నాయి.

కొత్త టక్సన్‌ను గతంలో కంటే మరింత అడ్వాన్సుడ్ సేఫ్టీ టెక్నాలజీతో తయారు చేశారు. ఇందులో ఇప్పుడు 6 ఎయిర్‌బ్యాగ్‌లు స్టాండర్డ్ ఫీచర్‌గా లభిస్తున్నాయి. ఇవి అన్ని దిశల నుండి రక్షణ కల్పిస్తాయి. దీనితో పాటు ఎలక్ట్రానిక్ స్టెబిలిటీ కంట్రోల్, అటానమస్ ఎమర్జెన్సీ బ్రేకింగ్, లేన్ సపోర్ట్ సిస్టమ్, బ్లైండ్ స్పాట్ డిటెక్షన్, అడ్వాన్స్‌డ్ డ్రైవర్ అసిస్టెన్స్ సిస్టమ్ వంటి టెక్నాలజీలు ఉన్నాయి. ఈ ఫీచర్ల కారణంగా టక్సన్ ఇప్పుడు లగ్జరీ, సురక్షితమైన ఎస్‌యూవీగా మారింది.

హ్యుందాయ్ టక్సన్ 2022లో లాటిన్ NCAP పరీక్షలో కేవలం 0-స్టార్ రేటింగ్‌ను మాత్రమే పొందింది. ఆ సమయంలో ఇందులో కేవలం రెండు ఫ్రంట్ ఎయిర్‌బ్యాగ్‌లు, లిమిటెడ్ సేఫ్టీ ఫీచర్లు ఉండేవి. దీని తర్వాత హ్యుందాయ్ సంస్థ సైడ్, కర్టెన్ ఎయిర్‌బ్యాగ్‌లు, ఈఎస్‌సీ వంటి వాటిని స్టాండర్డ్‌గా మార్చి 2023లో మళ్లీ టెస్ట్ చేసింది. దానికి 3-స్టార్ రేటింగ్ లభించింది. ఇప్పుడు 2025 ఫేస్‌లిఫ్ట్‌లో ADAS, కొత్త సేఫ్టీ టెక్నాలజీని జోడించడం ద్వారా ఈ ఎస్‌యూవీ నేరుగా 5-స్టార్ రేటింగ్‌ను చేరుకుంది.

కొత్త హ్యుందాయ్ టక్సన్ 2025 ఇప్పుడు సేఫ్టీ విషయంలో అత్యుత్తమ ఎస్‌యూవీలలో ఒకటిగా నిలిచింది. దీని అడ్వాన్స్‌డ్ డ్రైవర్ అసిస్టెన్స్ సిస్టమ్, 6 ఎయిర్‌బ్యాగ్‌లు, హై సేఫ్టీ స్టాండర్డ్స్ కారణంగా ఇది టయోటా RAV4, కియా స్పోర్టేజ్, వోక్స్‌వ్యాగన్ టిగువాన్ వంటి వాహనాలకు గట్టి పోటీనిస్తోంది. హ్యుందాయ్ తన రాబోయే అన్ని గ్లోబల్ మోడళ్లలో కూడా ఇదే విధమైన సేఫ్టీ ప్రమాణాలను అమలు చేస్తుందని తెలిపింది.