Auto Sales: ఆగస్టులో ఆటోమొబైల్ రంగం జోరు.. ప్యాసింజర్ వెహికల్ విక్రయాల్లో సరికొత్త రికార్డు!

Auto Sales: భారతీయ ఆటోమొబైల్ రంగానికి ఆగస్టు నెల అత్యంత లాభసాటిగా, సరికొత్త రికార్డులను సృష్టించేలా గడిచింది. కార్లు, టూ-వీలర్లు, టూ-వీలర్లు అనే అన్ని ప్రధాన రంగాల్లోనూ ఊహించని విధంగా భారీ డిమాండ్ కనిపించింది. సొసైటీ ఆఫ్ ఇండియన్ ఆటోమొబైల్ మ్యానుఫ్యాక్చరర్స్ (SIAM) అందించిన తాజా గణాంకాల ప్రకారం.. ఆగస్టు 2026లో ఈ మూడు కేటగిరీలు ఇప్పటివరకు ఎన్నడూ లేనివిధంగా అత్యధిక డిస్పాచ్‌లను నమోదు చేసి సరికొత్త చరిత్ర సృష్టించాయి.

ప్యాసింజెర్ వెహికల్స్ అమ్మకాల్లో ఊహించని దూకుడు

ఆటో రంగంలో అత్యధికంగా ప్యాసింజర్ వెహికల్స్ విభాగంలో విపరీతమైన వృద్ధి నమోదైంది. ఆగస్టు నెలలో ప్యాసింజెర్ వెహికల్ డిస్పాచ్‌లు వార్షిక ప్రాతిపదికన ఏకంగా 36.5 శాతం పెరిగి 4,39,309 యూనిట్లకు చేరుకున్నాయి. గత ఏడాది ఇదే ఆగస్టు నెలలో కేవలం 3,21,901 యూనిట్లు మాత్రమే అమ్ముడయ్యాయి. అంటే కేవలం ఒక్క సంవత్సరంలోనే కార్ల విక్రయాలు మూడో వంతు కంటే ఎక్కువగా పెరగడం విశేషం.

పరుగులు పెట్టిన టూ-వీలర్ వెహికల్స్

కేవలం కార్లు మాత్రమే కాకుండా టూ వీలర్ మార్కెట్ కూడా అదే స్థాయిలో దూసుకుపోయింది. ఆగస్టులో టూ-వీలర్ల డిస్పాచ్ 10.5 శాతం పెరిగి మొత్తం 20,34,698 యూనిట్లకు చేరుకుంది. గత ఏడాది ఇదే నెలలో 18,41,954 వాహనాలు అమ్ముడయ్యాయి. ఈ విభాగంలో ముఖ్యంగా స్కూటర్ల అమ్మకాలు ఏకంగా 23.8 శాతం వృద్ధితో 8,55,715 యూనిట్లకు చేరుకోవడం గమనార్హం. అలాగే మోటార్ సైకిళ్లు 2.4 శాతం వృద్ధితో 11,33,047 యూనిట్లు, మోపెడ్‌లు 4.7 శాతం వృద్ధితో 45,936 యూనిట్ల విక్రయాలను నమోదు చేశాయి.

త్రీ వీలర్, మొత్తం ఉత్పత్తి వివరాలు

త్రీ వీలర్ డిమాండ్ కూడా చాలా బలంగా ఉంది. ఈ సెగ్మెంట్‌లో డిస్పాచ్ 22.8 శాతం పెరిగి 93,764 యూనిట్లకు చేరుకుంది. ఇందులో ప్యాసింజెర్ కేరియర్లు 22.4 శాతం పెరిగి 78,680 యూనిట్లుగా నమోదవగా, గూడ్స్ కేరియర్లు 34.9 శాతం బలమైన వృద్ధితో 13,320 యూనిట్లకు చేరాయి. ఇక SIAM గణాంకాల ప్రకారం ఆగస్టు 2026లో అన్ని రకాల వాహనాలు కలిపి మొత్తం 31,57,822 యూనిట్లు తయారయ్యాయి. అయితే BMW, Mercedes-Benz, Tata Motors వంటి కొన్ని ప్రముఖ కంపెనీల పూర్తి ఉత్పత్తి డేటా ఇందులో లేకపోవడం గమనార్హం.

ఆటో ఇండస్ట్రీ ప్రస్తుతం బలమైన వృద్ధి బాటలో పయనిస్తోందని SIAM డైరెక్టర్ జనరల్ రాజేష్ మీనన్ తెలిపారు. గత ఏడాది తక్కువ బేస్ ఎఫెక్ట్ ఉన్నప్పటికీ, మార్కెట్లో వినియోగదారుల నమ్మకం పెరగడం, గ్రామీణ ప్రాంతాల నుంచి డిమాండ్ రావడం, ఫైనాన్స్ సదుపాయాలు మెరుగవడం, ఎలక్ట్రిక్ వాహనాల వైపు ప్రజలు మొగ్గు చూపడం వంటి కారణాలు ఈ వృద్ధికి ప్రధాన కారణంగా నిలిచాయి. రాబోయే పండుగ సీజన్‌లో ఈ వాహనాల డిమాండ్ మరింత పెరిగే అవకాశం ఉందని మార్కెట్ నిపుణులు అంచనా వేస్తున్నారు.