Car Sales : విదేశాల్లో రికార్డు సృష్టించిన భారతీయ కార్లు.. ఆ మోడల్ అంటే పడి చచ్చిపోతున్న జపాన్

Car Sales : మన దేశ ప్యాసింజర్ కార్ల పరిశ్రమ దేశంలో అమ్మకాలు పెరగడానికి జీఎస్టీ తగ్గింపు కోసం చూస్తున్నా, విదేశాలకు ఎగుమతి చేయడంలో మాత్రం అద్భుతమైన విజయాన్ని సాధిస్తోంది. ప్రస్తుత ఆర్థిక సంవత్సరం మొదటి ఆరు నెలల్లో (ఏప్రిల్ నుండి సెప్టెంబర్) భారతదేశం నుండి దాదాపు 4.5 లక్షల కార్లు ఎగుమతి అయ్యాయి. ఇది గత ఏడాదితో పోలిస్తే దాదాపు 20% ఎక్కువ. ఎలక్ట్రిక్ కార్లు, చిన్న కార్లు, సెడాన్‌లు, ఎస్‌యూవీలు ఇందులో ఉన్నాయి.

మారుతి సుజుకి దేశంలోనే కాదు, ఎగుమతుల్లోనూ ముందుంది. ఈ ఏడాది 4 లక్షలకు పైగా కార్లను విదేశాలకు పంపాలని కంపెనీ లక్ష్యంగా పెట్టుకుంది. ఫ్రాంక్స్, జిమ్నీ, స్విఫ్ట్ వంటి మోడళ్లకు విదేశాల్లో డిమాండ్ పెరిగింది. ఈ సంవత్సరం మొదటి ఆరు నెలల్లోనే కంపెనీ 2 లక్షలకు పైగా కార్లను ఎగుమతి చేసింది.

మారుతి అధికారి రాహుల్ భారతి మాట్లాడుతూ.. నాలుగు సంవత్సరాల క్రితం ఏడాది పొడవునా పంపే కార్లను ఇప్పుడు కేవలం మూడు నెలల్లో పంపుతున్నామని చెప్పారు. దీనికి మేక్ ఇన్ ఇండియా, మేక్ ఫర్ ది వరల్డ్ అనే దార్శనికతే కారణం అన్నారు. భారతదేశంలో తయారైన జిమ్నీ కారు జపాన్ వంటి అభివృద్ధి చెందిన దేశంలో కూడా అమ్ముడవుతోందని ఆయన తెలిపారు. కంపెనీ తన మొదటి ఎలక్ట్రిక్ కారు ఈ విటారా అమ్మకాలను కూడా విదేశాల్లో ప్రారంభించింది.

భారతదేశాన్ని ఎగుమతి కేంద్రంగా మార్చడంపై దృష్టి పెట్టిన హ్యుందాయ్ మోటార్ ఇండియా కూడా ఈ సంవత్సరం 17% వృద్ధిని నమోదు చేసింది. ఏప్రిల్-సెప్టెంబర్ మధ్య దాదాపు 1 లక్ష యూనిట్లను విదేశాలకు పంపింది. హ్యుందాయ్ గ్లోబల్ సీఈవో జోసె మ్యూనోజ్.. భారతదేశంలో తయారవుతున్న కార్ల క్వాలిటీ, సరసమైన ధరలను ప్రశంసించారు. క్రెటా, గ్రాండ్ ఐ10, వెర్నా వంటి మోడళ్లను ఆఫ్రికా, లాటిన్ అమెరికా వంటి 150 కి పైగా దేశాలకు పంపుతున్నారు.

నిస్సాన్ కూడా ఎగుమతులలో వేగంగా ముందుకు సాగుతోంది. కంపెనీ సన్నీ సెడాన్ మిడిల్ ఈస్ట్‌లో, మాగ్నైట్ ఎస్‌యూవీ 65 దేశాలలో అమ్ముడవుతోంది. నిస్సాన్ ఇండియా ఎమ్.డి. సౌరభ్ వత్సా మాట్లాడుతూ.. భారతదేశం ఇప్పుడు నిస్సాన్‌కు రెండవ అతిపెద్ద ఎగుమతి కేంద్రంగా మారిందని చెప్పారు. ఇక్కడ ఉన్న ఇంజనీరింగ్ ప్రతిభ, తయారీ వ్యవస్థ దీనికి దోహదపడుతున్నాయి.