Car Safety Test: అమెరికా, యూరప్ కార్లను వెనక్కి నెట్టి..కార్ల టెస్టులో సత్తా చాటిన జపాన్-కొరియా కంపెనీలు

Car Safety Test : భారతదేశంలో కార్ల మార్కెట్‌ను జపాన్, దక్షిణ కొరియా దేశాల కంపెనీలు చాలా ఏళ్లుగా ఏలుతున్నాయి. భారతదేశంలో అతిపెద్ద కార్ల కంపెనీ అయిన మారుతి సుజుకి ఇండియా కూడా జపాన్‌కు చెందిన సుజుకి మోటార్ కార్పొరేషన్ కు చెందినదే. ఇప్పుడు, ఈ జపాన్, కొరియా కార్ల కంపెనీలు కేవలం భారత మార్కెట్‌లోనే కాకుండా, ప్రపంచ స్థాయిలో కూడా తమ సత్తాను చాటాయి. ఇటీవల జరిగిన ఒక ముఖ్యమైన టెస్టులో అమెరికాకు చెందిన టెస్లా , యూరప్‌కు చెందిన వోల్వో వంటి పెద్ద కంపెనీల కార్లను వెనక్కి నెట్టి విజయం సాధించాయి.

ఏడీఏఎస్ అంటే ఏమిటి?

ఈ రోజుల్లో కార్లలో అడ్వాన్స్‌డ్ డ్రైవింగ్ అసిస్టెన్స్ సిస్టమ్ (ADAS) అనేది చాలా ముఖ్యమైన ఫీచర్‌గా మారింది. ఈ వ్యవస్థ డ్రైవర్‌కు డ్రైవింగ్‌లో సహాయం చేసి, ప్రమాదాలను నివారించడంలో కీలక పాత్ర పోషిస్తుంది. ఇటీవల యూరో ఎన్‌క్యాప్ అనే సంస్థ అనేక కార్లపై పరీక్షలు నిర్వహించింది. ఈ పరీక్షల్లో ఏడీఏఎస్ లోని కొన్ని ఫీచర్లు ఎంతగానో ఉపయోగపడతాయని గుర్తించారు. ఈ పరీక్షలో జపాన్, కొరియా కార్ల కంపెనీలు అమెరికా, యూరప్ కార్ల కంటే మెరుగైన పనితీరును కనబరిచాయి.

కార్ల పరీక్ష ఎలా జరిగింది?

యూరో ఎన్‌క్యాప్ నిర్వహించిన ఈ పరీక్షలో ఏడీఏఎస్ పనితీరును రెండు రకాలుగా అంచనా వేశారు.

సేఫ్టీ బ్యాకప్ : ఈ విభాగంలో, కారును ప్రమాదం నుండి ఏడీఏఎస్ వ్యవస్థ ఎలా కాపాడుతుంది అని చూశారు. అంటే, ప్రమాదం జరగకుండా అది ఎంత సమర్థవంతంగా అడ్డుకుంటుంది అనేది పరిశీలించారు.

అసిస్టెడ్ కాంపీటెన్స్ : ఈ విభాగంలో, ఏడీఏఎస్ వ్యవస్థ డ్రైవర్‌కు ఎలా సమాచారం అందిస్తుంది. డ్రైవర్‌కు అది ఎంతవరకు సహాయం చేస్తుంది అని తనిఖీ చేశారు. అంటే, డిస్‌ప్లేలో సమాచారం ఎలా కనిపిస్తుంది. డ్రైవింగ్‌లో అది ఎంత ఉపయోగపడుతుంది అనేది చూశారు.

టెస్టు ఫలితాలు

ఈ పరీక్షలో అమెరికా కంపెనీ టెస్లాకు చెందిన టెల్సా మోడల్ ఎస్, స్వీడన్‌కు చెందిన వోల్వోకు చెందిన వోల్వో ఈఎక్స్30, బ్రిటన్‌కు చెందిన ఎమ్‌జీ మోటార్ కు చెందిన ఎమ్‌జీ జెడ్ఎస్ కార్లకు 'సాధారణ' రేటింగ్ లభించింది. అంటే, వాటి పనితీరు అంత ఆకట్టుకునేలా లేదు. అదే సమయంలో, జపాన్‌కు చెందిన టయోటా కంపెనీకి చెందిన బీజెడ్‌4ఎక్స్ , దక్షిణ కొరియాకు చెందిన కియా కంపెనీకి చెందిన కియా ఈవీ3 కార్లు అద్భుతమైన పనితీరును కనబరిచాయి.

ఏయే కార్లు మెరుగైన పనితీరు కనబరిచాయి?

ఈ పరీక్షలో అత్యుత్తమ పనితీరును పోర్షేకు చెందిన మకాన్ కనబరిచింది. అయితే, ఇతర ప్రముఖ కార్ల పనితీరును చూస్తే:

కియా ఈవీ3: అసిస్టెడ్ కాంపీటెన్స్ విభాగంలో 74%, సేఫ్టీ బ్యాకప్ విభాగంలో 88% స్కోర్ చేసింది.

టయోటా బీజెడ్‌4ఎక్స్: అసిస్టెడ్ కాంపీటెన్స్ విభాగంలో 83%, సేఫ్టీ బ్యాకప్ విభాగంలో 89% స్కోర్ చేసింది.

ఇది జపాన్, కొరియా కార్లు సేఫ్టీ, సహాయక ఫీచర్లలో ఎంత ముందున్నాయో స్పష్టం చేస్తోంది.