Jeep Wrangler: బండి చూస్తే ఫిదా కావాల్సిందే.. ఆఫ్‌రోడింగ్ లవర్లకు జీప్ అదిరిపోయే గిఫ్ట్
అదిరిపోయే గిఫ్ట్
Jeep Wrangler: ప్రముఖ ఆటోమొబైల్ దిగ్గజం జీప్ భారతీయ మార్కెట్లో తన అత్యంత ప్రజాదరణ పొందిన ఆఫ్‌రోడ్ ఎస్‌యూవీ రాంగ్లర్ కొత్త వెర్షన్‌ను ప్రవేశపెట్టింది. వైట్‌క్యాప్ మోజిటో లిమిటెడ్ ఎడిషన్ పేరుతో వచ్చిన ఈ ప్రత్యేక కారు ఎక్స్-షోరూమ్ ధర రూ.73.55 లక్షలుగా నిర్ణయించారు. ఇది ఇప్పటికే మార్కెట్లో ఉన్న పవర్ ఫుల్ రూబికాన్ మోడల్ ఆధారంగా రూపొందించబడింది. సాధారణ రూబికాన్ ధరతో పోలిస్తే దీని ధర దాదాపు రూ.1.25 లక్షలు ఎక్కువగా ఉంటుంది. అత్యంత ప్రత్యేకమైన ఈ ఎడిషన్ కోసం కంపెనీ ప్రపంచవ్యాప్తంగా కేవలం 250 యూనిట్లను మాత్రమే తయారు చేయగా, అందులో భారత్‌కు కేటాయించిన 25 యూనిట్లు కూడా విడుదలైన క్షణాల్లోనే పూర్తిగా అమ్ముడుపోవడం విశేషం.
ఆకర్షణీయమైన డిజైన్, ప్రత్యేక లుక్
ఈ కొత్త లిమిటెడ్ ఎడిషన్ ఎస్‌యూవీకి ప్రధాన ఆకర్షణ దీని మోజిటో గ్రీన్ రంగు. అచ్చం నిమ్మకాయ పచ్చదనాన్ని తలపించే ఈ ప్రత్యేక ఎక్స్టీరియర్ కలర్‌తో పాటు పైభాగంలో తెల్లటి రూఫ్ అందించడం దీనిని సాధారణ రాంగ్లర్ కార్ల కంటే పూర్తిగా భిన్నంగా నిలబెడుతుంది. అంతేకాకుండా ఫ్రంట్ గ్రిల్ చుట్టూ వైట్ ఫినిషింగ్, సైడ్ భాగంలో జీప్ తొలి వాహనమైన విల్లీస్ ఎంబీ యారైన సంవత్సరానికి గుర్తుగా 1941 డెకల్స్‌ను అమర్చారు. వెనుక వైపు '4 వీల్ డ్రైవ్' అనే వైట్ స్టిక్కర్ ఈ కారుకు మరింత రగ్డ్ లుక్‌ను తెచ్చిపెట్టింది.
అత్యాధునిక ఫీచర్లు, లగ్జరీ ఇంటీరియర్
వైట్‌క్యాప్ మోజిటో కేబిన్ లోపల స్టాండర్డ్ రూబికాన్ మోడల్‌తో పోలిస్తే కొన్ని ప్రత్యేకమైన అప్‌డేట్స్ ఉన్నాయి. ఇందులో డ్రైవింగ్ భద్రత కోసం బిల్ట్-ఇన్ డాష్‌క్యామ్, కఠినమైన దారుల్లో ప్రయాణించేటప్పుడు పట్టుకోడానికి వీలుగా బలమైన గ్రాబ్ హ్యాండిల్స్‌ను చేర్చారు. మిగతా ఫీచర్ల విషయానికి వస్తే, 12.3 అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, 12-వే పవర్ అడ్జస్టబుల్ ఫ్రంట్ సీట్లు, డ్యూయల్-జోన్ క్లైమెట్ కంట్రోల్ లభిస్తాయి. మ్యూజిక్ లవర్ల కోసం సబ్‌ఫూటర్‌తో కూడిన 9-స్పీకర్ ఆల్పైన్ సౌండ్ సిస్టమ్, 7 అంగుళాల డ్రైవర్ డిస్‌ప్లే, ఆరు ఎయిర్‌బ్యాగ్‌లు అలాగే ఏడీఏఎస్ భద్రతా ఫీచర్లు ఇందులో అందుబాటులో ఉన్నాయి.
పవర్ ఫుల్ ఇంజిన్, అద్భుతమైన ఆఫ్‌రోడింగ్ సామర్థ్యం
ఈ ఎస్‌యూవీ పర్ఫామెన్స్ పరంగా ఎలాంటి మార్పులు చేయలేదు. ఇందులో 2.0-లీటర్ 4-సిలిండర్ డైరెక్ట్-ఇంజెక్షన్ టర్బో-పెట్రోల్ ఇంజిన్‌ను అమర్చారు. ఇది గరిష్టంగా 272 hp పవర్‌ను మరియు 400 Nm టార్గెట్‌ను ఉత్పత్తి చేస్తుంది. దీనికి అనుసంధానంగా 8-స్పీడ్ ఆటోమేటిక్ గేర్‌బాక్స్, పవర్‌ఫుల్ 4x4 సిస్టమ్‌ను అందించారు. కఠినమైన కొండ ప్రాంతాలు, బురద దారుల్లో సులభంగా వెళ్లేందుకు డానా యాక్సిల్స్, ఇంటెగ్రేటెడ్ ఆఫ్‌రోడ్ కెమెరా, రాక్ రেইলస్, 17 అంగుళాల వీల్స్‌పై 255-సెక్షన్ ఆఫ్‌రోడ్ టైర్లు ఇందులో ఉన్నాయి. ఇంతటి విశేషాలు ఉన్న ఈ ప్రత్యేక ఎడిషన్ కార్లన్నీ ఇప్పటికే అమ్ముడైపోవడంతో జీప్ ప్రియుల్లో దీనిపై మరింత క్రేజ్ పెరిగింది.
