Kia India : భారత ఆటోమొబైల్ మార్కెట్లో కియా జోరు.. కేవలం 6 నెలల్లోనే 1.63 లక్షల కార్లు క్లీన్ స్వీప్

Kia India : ప్రముఖ అంతర్జాతీయ కార్ల తయారీ సంస్థ కియా ఇండియా భారత ఆటోమొబైల్ మార్కెట్లో సరికొత్త రికార్డులతో దూసుకుపోతోంది. జూన్ 2026 నెలలో కంపెనీ అద్భుతమైన అమ్మకాలను నమోదు చేసింది. ఈ ఒక్క నెలలోనే కియా సంస్థ మొత్తం 24,552 కార్లను డీలర్లకు సరఫరా చేసింది. జూన్ 2025 లో జరిగిన 20,625 యూనిట్ల అమ్మకాలతో పోల్చి చూస్తే.. ఇది దాదాపు 19 శాతం వార్షిక వృద్ధిని సూచిస్తుంది. కియా ఇండియా చరిత్రలోనే ఇది అత్యంత విజయవంతమైన జూన్ నెలగా నిలిచిందని ఆటోమొబైల్ విశ్లేషకులు చెబుతున్నారు.

ఆరు నెలల్లో 15 శాతం వృద్ధి

కేవలం జూన్ నెలలోనే కాకుండా, 2026 ఏడాది మొదటి ఆరు నెలల కాలం కూడా కియా ఇండియాకు ఎంతగానో కలిసి వచ్చింది. జనవరి నుండి జూన్ 2026 మధ్య కాలంలో కియా సంస్థ భారతదేశంలో మొత్తం 1,63,749 వాహనాలను విక్రయించి సరికొత్త మైలురాయిని అందుకుంది. గతేడాది ఇదే సమయంలో కంపెనీ 1,42,139 యూనిట్లను మాత్రమే విక్రయించింది. అంటే గడిచిన ఆరు నెలల్లోనే కియా ఏకంగా 15 శాతం వార్షిక వృద్ధిని సాధించి, కారు కొనాలనుకునే ప్రతి ఒక్కరి మొదటి ఛాయిస్‌గా నిలిచింది.

5-స్టార్ సేఫ్టీ రేటింగ్‌తో అదరగొడుతున్న న్యూ కియా సెల్టోస్

కియా సాధించిన ఈ భారీ విజయానికి ఆ బ్రాండ్ నుంచి వచ్చిన పాపులర్ మోడల్స్ యొక్క బలమైన డిమాండ్ ప్రధాన కారణం. ముఖ్యంగా మార్కెట్లోకి అప్‌డేట్ వెర్షన్‌తో వచ్చిన సరికొత్త కియా సెల్టోస్‎కు వినియోగదారుల నుండి ఊహించని రేంజ్‌లో రెస్పాన్స్ వస్తోంది. సరికొత్త డిజైన్, మోడ్రన్ కనెక్టివిటీ ఫీచర్లు, భారత్ NCAP క్రాష్ టెస్టింగ్‌లో లభించిన అత్యున్నత 5-స్టార్ సేఫ్టీ రేటింగ్ ఈ కారుపై కస్టమర్లలో నమ్మకాన్ని రెట్టింపు చేశాయి. సెల్టోస్‌తో పాటు కియా సోనెట్ అమ్మకాలు కూడా మార్కెట్లో స్థిరంగా సాగుతున్నాయి.

మార్కెట్లో దూసుకుపోతున్న సరికొత్త కియా సైరస్

మరోవైపు పెద్ద కుటుంబాలు ఉన్న కస్టమర్లకు కియా క్యారెన్స్, క్యారెన్స్ క్లావిస్ మోడల్స్ మొదటి ప్రాధాన్యతగా మారాయి. ఈ మోడళ్లకు మార్కెట్లో క్రేజ్ నిరంతరాయంగా కొనసాగుతోంది. వీటన్నింటికీ తోడు, కియా ఇటీవల మార్కెట్లోకి ప్రవేశపెట్టిన సరికొత్త మోడల్ మై26 కియా సైరస్ కూడా మార్కెట్లో అద్భుతమైన రెస్పాన్స్ అందుకుంటోంది. ఈ కొత్త మోడల్ అమ్మకాలు కంపెనీ మొత్తం వృద్ధికి అదనపు బూస్ట్‌ను ఇచ్చాయి. రాబోయే పండుగ సీజన్ నెలల్లో ఈ కారు అమ్మకాలు మరింత పెరిగే అవకాశం ఉందని కంపెనీ భావిస్తోంది.

బ్యాటరీ-యాజ్-ఎ-సర్వీస్ పాలసీ సూపర్ హిట్

సాధారణ ఇంధన కార్లతో పాటే ఎలక్ట్రిక్ వాహనాల సెగ్మెంట్‌లో కూడా కియా ఇండియా తన పట్టును బలపరుచుకుంటోంది. ప్రస్తుతం మార్కెట్లో ఉన్న కియా క్యారెన్స్ క్లావిస్ ఈవీకి కస్టమర్ల నుండి మంచి ఆదరణ లభిస్తోంది. ఎలక్ట్రిక్ వాహనాలను ప్రోత్సహించే ప్రభుత్వ విధానాలతో పాటు, కియా సంస్థ ప్రవేశపెట్టిన బ్యాటరీ-యాజ్-ఎ-సర్వీస్ అనే సరికొత్త సదుపాయం కస్టమర్లకు భారీగా కలిసి వస్తోంది. దీనివల్ల ఈవీ కారు ప్రారంభ ధర తగ్గి, కస్టమర్లకు ఎలక్ట్రిక్ కారు కొనడం మునుపటి కంటే చాలా సులభంగా మారింది. అధునాతన ఫీచర్లు, బలమైన భద్రతా ప్రమాణాల వల్లే కస్టమర్లు తమ బ్రాండ్‌ను ఇంతగా ఆదరిస్తున్నారని, మున్ముందు కూడా ఇదే వేగాన్ని కొనసాగిస్తామని కియా యాజమాన్యం ధీమా వ్యక్తం చేసింది.