Kia: కియా నుంచి అదిరిపోయే ప్లాన్.. ఇండియన్ మార్కెట్లోకి 2 కొత్త కార్లు

Kia: భారత ఆటోమొబైల్ రంగాన్ని శాసించేందుకు కియా ఇండియా భారీ వ్యూహాన్ని సిద్ధం చేసింది. 2028-29 నాటికి రెండు సరికొత్త SUVలను దేశీయ మార్కెట్లోకి తెచ్చేందుకు ప్రణాళికలు రచిస్తోంది. వీటిలో ఒక మోడల్ సెల్టోస్ కంటే తక్కువ ధరలో ఉండనుండగా, మరొకటి 7 సీటర్ ప్రీమియం వేరియంట్‌గా రానుంది. భారత మార్కెట్లో సెల్టోస్ సాధించిన అపూర్వ విజయాన్ని పునాదిగా చేసుకుని కియా మరో మిడ్‌సైజ్ SUVని విడుదల చేసేందుకు సిద్ధమైంది. బీ-సెగ్మెంట్‌లో రానున్న ఈ కొత్త కారు సెల్టోస్ కన్నా కాస్త తక్కువ ధరలో అందుబాటులో ఉంటుంది. మారుతి సుజుకి గ్రాండ్ విటారా, విక్టోరిస్ కార్లతో పోటీ పడేలా ఈ వ్యూహాన్ని అమలు చేస్తున్నారు. హ్యుందాయ్ బైయోన్ ఆధారంగా వచ్చే నూతన మోడల్‌కు కూడా ఇది సవాలు విసరనుంది.

4.2 మీటర్ల పొడవు, ఆకట్టుకునే ఇంజిన్ ఆప్షన్లు

కియా నుంచి రాబోతున్న ఈ నూతన మిడ్‌సైజ్ SUV దాదాపు 4.2 మీటర్ల పొడవు ఉండనుంది. సెల్టోస్ ప్లాట్‌ఫామ్, ఇంజిన్, అడ్వాన్స్డ్ ఫీచర్లనే దీనికి కూడా ఉపయోగించే అవకాశం ఉంది. కస్టమర్ల అభిరుచులకు అనుగుణంగా పెట్రోల్, డీజిల్ సిస్టమ్‌లతో పాటు హైబ్రిడ్ పవర్‌ట్రెయిన్ ఆప్షన్లు అందుబాటులోకి తీసుకురానున్నారు. సెల్టోస్ కంటే భిన్నమైన డిజైన్ లాంగ్వేజ్‌తో ఈ కారు ప్రత్యేక గుర్తింపు తెచ్చుకోవడం ఖాయంగా కనిపిస్తోంది.

ఆల్కజార్, సఫారీలకు పోటీగా 7 సీటర్ కియా కారు

కియా ప్లాన్ చేస్తున్న మరో కారు 7 సీటర్ సీ-సెగ్మెంట్ SUV. సెల్టోస్, సోరెంటో మోడళ్ల మధ్య ఉన్న ఖాళీని భర్తీ చేసేలా దీనిని డిజైన్ చేస్తున్నారు. రూ. 30 లక్షల నుంచి రూ. 35 లక్షల రేంజ్‌లో ఉండే సోరెంటో కంటే తక్కువ ధరలోనే ఈ 7 సీటర్ అందుబాటులోకి తెచ్చే యోచనలో ఉంది. మార్కెట్లోకి వస్తే ఇది హ్యుందాయ్ ఆల్కజార్, టాటా సఫారీ, ఎమ్జీ హెక్టార్ ప్లస్ వంటి కార్లకు బలమైన ప్రత్యర్థిగా నిలుస్తుంది.

రూ.10 లక్షల నుంచి రూ.35 లక్షల రేంజ్

ఈ రెండు నూతన మోడళ్లతో బి, సీ సెగ్మెంట్లలో రూ.10 లక్షల నుంచి రూ.35 లక్షల ధరల శ్రేణిని పూర్తిగా కవర్ చేయాలని కియా లక్ష్యంగా పెట్టుకుంది. మిడ్‌సైజ్ SUV ప్రాజెక్టు ఇప్పటికే ఖరారు కాగా, 7 సీటర్ మోడల్ త్వరలోనే కంపెనీ బోర్డు నుంచి ఆమోదం పొందనుంది. పెట్రోల్, డీజిల్ వేరియంట్లతో పాటు హైబ్రిడ్ టెక్నాలజీని జోడించడం ద్వారా వినియోగదారులకు విస్తృతమైన ఎంపికలను కియా అందించనుంది.

భారతదేశంలో SUV సెగ్మెంట్‌పై పూర్తి ఆధిపత్యం సాధించేందుకు కియా వేస్తున్న ఈ అడుగులు ఆటోమొబైల్ రంగాన్ని మరింత వేడెక్కిస్తున్నాయి. సరికొత్త డిజైన్, ఆకర్షణీయమైన ధరలతో రానున్న ఈ కార్లు వినియోగదారులను ఎంతగానో ఆకట్టుకుంటాయనడంలో సందేహం లేదు.