Mahindra SUV Sales : జులై నెలలో మహీంద్రా కార్ల విక్రయాల సునామీ.. ఒక్క నెలలోనే 60,000 కు పైగా SUVలు సేల్!

Mahindra SUV Sales : ప్రముఖ స్వదేశీ వాహన తయారీ సంస్థ మహీంద్రా అండ్ మహీంద్రా జులై 2026 నెలలో సేల్స్‌లో సరికొత్త రికార్డులు సృష్టించింది. భారతీయ వాహన మార్కెట్‌లో మహీంద్రా ఎస్‌యూవీలకు కస్టమర్ల నుంచి ఊహించని రీతిలో భారీ డిమాండ్ కనిపిస్తోంది. కేవలం డొమెస్టిక్ మార్కెట్‌లోనే కంపెనీ ఏకంగా 60,000 కంటే ఎక్కువ SUV కార్లను విక్రయించి సంచలనం సృష్టించింది. ఇక ఎగుమతులు, కమర్షియల్, త్రీ-వీలర్ వాహనాలను కూడా కలిపితే మహీంద్రా మొత్తం విక్రయాలు జులై నెలలో 1,03,860 యూనిట్లకు చేరుకున్నాయి. గత ఏడాది ఇదే సమయంతో పోలిస్తే కంపెనీ వార్షిక వృద్ధి 26 శాతం పెరిగింది.

ఎస్‌యూవీ సేల్స్‌లో 20 శాతం బంపర్ గ్రోత్

వినియోగదారుల కేటగిరీ విషయానికి వస్తే.. భారతీయ రోడ్లపై మహీంద్రా SUVల తిరుగులేని ఆధిపత్యం కొనసాగుతోంది. జులై 2026లో మహీంద్రా భారతదేశంలో మొత్తం 60,048 ఎస్‌యూవీలను విక్రయించింది. గత ఏడాది జులై నెలలో ఈ సంఖ్య 49,871 యూనిట్లుగా మాత్రమే ఉండింది. గత ఏడాదితో పోలిస్తే ఏకంగా 20 శాతం వార్షిక వృద్ధి నమోదైంది. జూన్ 2026 లో నమోదైన 60,393 యూనిట్లతో పోలిస్తే జులై నెలలో సేల్స్ ఎంతో స్థిరంగా ముగిశాయి. తార్, స్కార్పియో-ఎన్ వంటి పాపులర్ మోడళ్లకు కస్టమర్ల నుంచి క్యూలు కనిపిస్తున్నాయి.

ఎగుమతుల్లో 47% పెరుగుదల

కమర్షియల్ వాహనాలు, త్రీ-వీలర్ రంగాలు కూడా మహీంద్రాకు మంచి లాభాలను తెచ్చిపెట్టాయి. లైట్ కమర్షియల్ వెహికల్స్ విభాగంలో 20 నుంచి 40 శాతం వరకు వృద్ధి నమోదైంది. అన్నింటికంటే ఎక్కువగా ఎలక్ట్రిక్ వేరియంట్లతో కూడిన త్రీ-వీలర్ సేల్స్ జులైలో ఏకంగా 53 శాతం పెరిగి 14,538 యూనిట్లకు చేరాయి. మరోవైపు గ్లోబల్ మార్కెట్‌కు చేసే వాహనాల ఎగుమతులు 47 శాతం పెరిగాయి. జులై నెలలోనే మహీంద్రా దాదాపు 4,070 వాహనాలను విదేశీ మార్కెట్లకు రవాణా చేసింది.

రైతన్నల ఆదరణతో ట్రాక్టర్ల అమ్మకాల జోరు

గ్రామీణ ప్రాంతాల్లో కొనుగోలు శక్తి పెరగడంతో మహీంద్రా ట్రాక్టర్ల బిజినెస్ పుంజుకుంది. జులై 2026లో దేశీయంగా 32,643 ట్రాక్టర్లను విక్రయించగా, ఎగుమతులతో కలిపి ఈ సంఖ్య 34,420 యూనిట్లకు చేరుకుంది. ఈ సంవత్సరం సమయానికి రుతుపవనాలు రావడం, వర్షాలు బాగా పడి జలాశయాల్లో నీటి మట్టం పెరగడం వల్ల రైతుల ముఖాల్లో సంతోషం కనిపిస్తోంది. సమయానికి ఖరీఫ్ పంటల సాగు మరియు ప్రభుత్వ సహాయం కారణంగా గ్రామీణ ఆర్థిక వ్యవస్థలో నగదు చెలామణి పెరిగి ట్రాక్టర్ల కొనుగోళ్లు పెరిగాయని కంపెనీ వర్గాలు వెల్లడించాయి.

బస్సులు, ట్రక్కులలోనూ డబుల్ డిజిట్ గ్రోత్!

మహీంద్రా హెవీ అండ్ మీడియం వ్యాపారంలో ట్రక్కులు, బస్సుల సేల్స్ కూడా రెండంకెల వృద్ధిని నమోదు చేశాయి. జులైలో కంపెనీ మొత్తం 3,009 ట్రక్కులు, బస్సులను విక్రయించి 19 శాతం వార్షిక వృద్ధిని సాధించింది. ఇందులో కార్గో (సరుకు రవాణా) వాహనాల అమ్మకాలు 15 శాతం పెరగ్గా, ప్యాసింజర్ బస్సుల అమ్మకాలు 23 శాతం పెరిగాయి. ఆల్ రౌండ్ పెర్ఫార్మన్స్ చూపిస్తున్న మహీంద్రాకు రాబోయే పండుగల సీజన్ లో మరిన్ని రికార్డు స్థాయి విక్రయాలు నమోదవుతాయని ఆటోమొబైల్ నిపుణులు అంచనా వేస్తున్నారు.