FASTag: దివ్యాంగుల ఫాస్టాగ్‌పై కేంద్ర ప్రభుత్వం కీలక నిర్ణయం
కీలక నిర్ణయం
FASTag: దేశవ్యాప్తంగా హైవేలు అలాగే ఎక్స్‌ప్రెస్‌వేలపై ప్రయాణించే వాహనదారులు ప్రతిసారీ టోల్ ట్యాక్స్ చెల్లించాల్సి ఉంటుంది. అయితే ఈ టోల్ చెల్లింపుల ప్రక్రియను సులభతరం చేసే ఫాస్టాగ్‌ విధానంలో కేంద్ర రోడ్డు రవాణా, రహదారుల మంత్రిత్వ శాఖ తాజాగా ఒక ముఖ్యమైన నిర్ణయం తీసుకుంది. ప్రత్యేకించి దివ్యాంగులకు ప్రభుత్వం అందించే టోల్ ట్యాక్స్ మినహాయింపు ఫాస్టాగ్‌ నిబంధనలను సవరించింది. ఈ కొత్త మార్పులు తక్షణమే అమల్లోకి వచ్చాయి. గతంలో ఈ ప్రత్యేక ఫాస్టాగ్‌ను ప్రతి సంవత్సరం రెన్యువల్ చేసుకోవాల్సి వచ్చేది, దీనివల్ల అనేక ఇబ్బందులు ఎదురయ్యేవి. తాజా నిర్ణయంతో ఆ సమస్య పూర్తిగా తొలగిపోయింది.
డిసేబిలిటీ శాతాన్ని బట్టి ఫాస్టాగ్‌ వాలిడిటీ పెంపు
కొత్త నిబంధనల ప్రకారం, టోల్ మినహాయింపు ఫాస్టాగ్‌ కాలపరిమితి ఇకపై ఆయా వ్యక్తుల డిసేబిలిటీ శాతం ఆధారంగా నిర్ణయించబడుతుంది. ఒక వ్యక్తిలో దివ్యాంగత్వం 70 శాతం నుంచి 100 శాతం మధ్య ఉంటే, వారికి జారీ చేసే టోల్ రహిత ఫాస్టాగ్‌ ఏకంగా 5 సంవత్సరాల పాటు చెల్లుబాటు అవుతుంది. అలాగే 40 శాతానికి ఎక్కవగా ఉండి 70 శాతం కంటే తక్కువ దివ్యాంగత్వం ఉన్న అర్హులైన వారికి జారీ చేసే ఫాస్టాగ్‌ వాలిడిటీ 3 సంవత్సరాలుగా ఉంటుంది. దీనివల్ల ప్రయాణికులు పదే పదే కార్యాలయాల చుట్టూ తిరగాల్సిన అవసరం తప్పుతుంది.
ప్రతి సంవత్సరం రెన్యువల్ చేసే ఇబ్బందికి స్వస్తి
గతంలో దివ్యాంగులు తమ టోల్ మినహాయింపును కొనసాగించడానికి ప్రతి సంవత్సరం కొత్తగా దరఖాస్తు చేసుకోవాల్సి వచ్చేది. ఇందులో భారీగా కాగితపు పనులు ఉండటంతో పాటు తీవ్రమైన సమయం వృధా అయ్యేది. ఇప్పుడు నేరుగా 3 లేదా 5 సంవత్సరాల పాటు వాలిడిటీ లభించడం వల్ల ఆ ఇబ్బందులన్నీ పూర్తిగా ముగిశాయి. నిర్ణీత గడువు ముగిసిన తర్వాత మాత్రమే సంబంధిత పత్రాలతో మళ్లీ దరఖాస్తు చేసుకోవాల్సి ఉంటుంది. ఈ దరఖాస్తు ప్రక్రియను ఆన్‌లైన్ లేదా ఆఫ్‌లైన్ విధానాల ద్వారా సులభంగా పూర్తి చేసుకోవచ్చు.
టోల్ మినహాయింపు పొందడానికి పాటించాల్సిన నిబంధనలు
ఈ ప్రత్యేక ఫాస్టాగ్‌ ప్రతి ఒక్కరికీ లభించదని ప్రభుత్వం స్పష్టం చేసింది. దీనిని పొందడానికి దరఖాస్తుదారుడి వద్ద ప్రభుత్వం జారీ చేసిన సరైన దివ్యాంగత్వ ధ్రువీకరణ పత్రం ఉండటం తప్పనిసరి. అలాగే వాహనం రిజిస్ట్రేషన్ ఆ దివ్యాంగ వ్యక్తి పేరుపై ఉండాలి లేదా వారి ప్రత్యేక అవసరాల కోసం అధికారికంగా నమోదు చేయబడి ఉండాలి. కేవలం ఏ వాహనానికైతే ఈ ప్రత్యేక ఫాస్టాగ్‌ కేటాయించబడిందో, ఆ వాహనానికి మాత్రమే టోల్ మినహాయింపు వర్తిస్తుంది. ఎవరైనా ఈ నిబంధనలను ఉల్లంఘించి తప్పుగా వాడుతూ దొరికితే, ఆ ఫాస్టాగ్‌ను వెంటనే బ్లాక్‌లిస్ట్ చేసే అవకాశం ఉంది.
ప్రయాణం మరింత సులభం
ఈ కొత్త నిబంధనల అమలు వల్ల టోల్ ప్లాజాల వద్ద ఫాస్టాగ్‌ల తనిఖీ, డిజిటల్ వెరిఫికేషన్ ప్రక్రియ మరింత వేగవంతం కానుంది. నకిలీ పత్రాలను ఉపయోగించి టోల్ మినహాయింపు పొందాలని చూసే ప్రయత్నాలకు దీని ద్వారా పూర్తిగా అడ్డుకట్ట వేయవచ్చు. అర్హత కలిగిన దివ్యాంగులు నేషనల్ హైవేస్ అథారిటీ ఆఫ్ ఇండియా (NHAI) లేదా రోడ్డు రవాణా మంత్రిత్వ శాఖ అధికారిక పోర్టల్ ద్వారా దీనికి దరఖాస్తు చేసుకోవచ్చు. దీనికోసం చెల్లుబాటు అయ్యే యూడీఐడీ కార్డు మరియు వాహనానికి సంబంధించిన ధ్రువీకరణ పత్రాలను సమర్పించాల్సి ఉంటుంది.
