Maruti Baleno: ఏకంగా 33 కిమీ మైలేజ్.. బాలెనో ఫేస్‌లిఫ్ట్ వేరియంట్ల వారీ ధరల జాబితా వచ్చేసింది

Maruti Baleno: దేశీయ దిగ్గజం మారుతి సుజుకి బాలెనో ఫేస్‌లిఫ్ట్ మోడల్‌ను ఇటీవల సెప్టెంబర్ 5న గ్రాండ్‌గా ఆవిష్కరించిన సంగతి తెలిసిందే. అయితే ఆ సమయంలో బేస్ మోడల్ ప్రారంభ ధర రూ.6.10 లక్షలుగా ఉంటుందని ప్రకటించిన కంపెనీ, ఇప్పుడు అధికారిక వెబ్‌సైట్‌లో రూ.5.99 లక్షలకే అందుబాటులోకి తెచ్చి అందరినీ ఆశ్చర్యపరిచింది. సిగ్మా, డెల్టా, జెటా, ఆల్ఫా, ఆల్ఫా (O) అనే నాలుగు ప్రధాన ట్రిమ్‌లలో ఈ కారును కస్టమర్ల ముందుకు తీసుకొచ్చారు. అత్యున్నత మోడల్ ఎక్స్-షోరూమ్ ధర రూ.9.99 లక్షల వరకు నిర్ణయించారు.

వేరియంట్ల వారీగా ధరల వివరాలు

వివిధ వేరియంట్లను పరిశీలిస్తే.. మ్యాన్యువల్ పెట్రోల్ మోడళ్లలో ప్రారంభ వెర్షన్ సిగ్మా ధర రూ.5.99 లక్షలు కాగా డెల్టా రూ.7 లక్షలు, జెటా రూ.8 లక్షలు, ఆల్ఫా రూ.9.10 లక్షలు, టాప్ ఎండ్ ఆల్ఫా (O) రూ.9.50 లక్షలుగా ఉంది. ఆటోమేటిక్ వేరియంట్లను కోరుకునే వారు మ్యాన్యువల్ మోడళ్ల కంటే రూ.50,000 అదనంగా చెల్లించాల్సి ఉంటుంది. ఇందులో డెల్టా ఏఎమ్‌టీ రూ.7.50 లక్షలు, జెటా రూ.8.50 లక్షలు, ఆల్ఫా రూ.9.60 లక్షలు, ఆల్ఫా (O) ఏఎమ్‌టీ రూ.9.99 లక్షల వద్ద లభిస్తున్నాయి. ఇంధన పొదుపును ఆశించే వారి కోసం తెచ్చిన డెల్టా సీఎన్‌జీ మ్యాన్యువల్ ధర రూ.7.92 లక్షలు, జెటా సీఎన్‌జీ మ్యాన్యువల్ ధర రూ.8.92 లక్షలుగా కంపెనీ నిర్ణయించింది.

కొత్త ఇంజిన్ సిస్టమ్, అదిరిపోయే మైలేజ్

సాంకేతిక మార్పుల విషయానికొస్తే, పాత 4-సిలిండర్ K12N ఇంజిన్ స్థానంలో స్విఫ్ట్, డిజైర్ మోడళ్లలో వాడే ఆధునిక Z12E 1.2-లీటర్ 3-సిలిండర్ పెట్రోల్ ఇంజిన్‌ను బిగించారు. ఇది 83 హెచ్‌పీ పవర్, 112 ఎన్‌ఎమ్ టాప్‌ను ఉత్పత్తి చేస్తుంది. పెట్రోల్ మ్యాన్యువల్ గేర్‌బాక్స్ లీటరుకు 23.80 కిలోమీటర్ల మైలేజ్ ఇస్తుండగా, ఏఎమ్‌టీ మోడల్ లీటరుకు 24.77 కిలోమీటర్ల వరకు ప్రయాణిస్తుందని కంపెనీ ప్రకటించింది. కేజీ సీఎన్‌జీకి ఏకంగా 33.61 కిలోమీటర్ల సంచలన మైలేజ్ అందించడం ఈ కారుకు ఉన్న అతిపెద్ద ప్లస్ పాయింట్.

పోటీదారులకు గట్టి సవాల్

సరికొత్త లుక్, మెరుగైన ఇంధన సామర్థ్యంతో వచ్చిన బాలెనో ఫేస్‌లిఫ్ట్ భారత మార్కెట్లో ఇప్పటికే విక్రయమవుతున్న ఇతర ప్రీమియం హ్యాచ్‌బ్యాక్ కార్లకు కఠిన సవాల్ విసురుతోంది. పోటీలో ఉన్న టాటా ఆల్ట్రోజ్ (రూ.6 లక్షల నుంచి రూ.10.75 లక్షలు), హ్యుందాయ్ i20 (రూ.6 లక్షల నుంచి రూ.10.39 లక్షలు), టయోటా గ్లాంజా (రూ.6.73 లక్షల నుంచి రూ.9.99 లక్షలు) మోడళ్లతో పోలిస్తే ఇది మైలేజ్ విషయంలో చాలా ముందుంది. బడ్జెట్ ధరలో ఎక్కువ మైలేజ్ కోరుకునే భారతీయ కుటుంబాలకు ఈ కారు మొదటి ఎంపికగా మారే అవకాశం కనిపిస్తోంది.