Maruti : మారుతికి గేమ్‌చేంజర్‎గా నిలిచిన కారు.. పదేళ్లలో 20 లక్షల మంది కొన్నారు

Maruti : భారతీయ కార్ల మార్కెట్‌లో మారుతి సుజుకికి గేమ్‌చేంజర్‎గా నిలిచిన కారు మారుతి బాలెనో. ఈ ప్రీమియం హ్యాచ్‌బ్యాక్ భారతదేశంలో విజయవంతంగా 10 సంవత్సరాలు పూర్తి చేసుకుంది. అక్టోబర్ 26, 2015న మొట్టమొదటిసారిగా విడుదలైన ఈ కారు, దశాబ్ద కాలంలో దేశీయంగా, అంతర్జాతీయంగా కలిపి 20 లక్షలకు పైగా యూనిట్లు అమ్ముడై రికార్డు సృష్టించింది. ముఖ్యంగా, మారుతి ప్రీమియం డీలర్‌షిప్ ఛానెల్ అయిన నెక్సా బ్రాండ్‌కు బాలెనో వెన్నెముకగా నిలిచింది.

మారుతి సుజుకి బాలెనో కారు భారత మార్కెట్‌లో విజయవంతంగా ఒక దశాబ్దం పూర్తి చేసుకుంది. గత 10 ఏళ్లలో బాలెనో మొత్తం విక్రయాలు 20 లక్షల యూనిట్లను దాటాయి. ఇందులో 16,98,014 యూనిట్లు భారతదేశంలో అమ్ముడవగా, 3,96,999 యూనిట్లు విదేశాలకు ఎగుమతి చేయబడ్డాయి (ఎక్స్‌పోర్ట్). అనేక సంవత్సరాలు వృద్ధిని సాధించిన తర్వాత, కొన్ని కారణాల వల్ల క్షీణత కనిపించింది. ఆర్థిక సంవత్సరం 2019లో బాలెనో అత్యధిక విక్రయాలను నమోదు చేసింది. ఆ సమయంలో ఏకంగా 2,12,330 యూనిట్లు అమ్ముడయ్యాయి. ఇది మారుతి మొత్తం అమ్మకాలలో 16% వాటా కలిగి ఉంది.

మార్చి 2020లో మారుతి డీజిల్ ఇంజిన్ల ఉత్పత్తిని నిలిపివేసిన తర్వాత, బాలెనో అమ్మకాలు మూడు సంవత్సరాల పాటు తగ్గాయి. 2022 నాటికి విక్రయాలు 1,48,187 యూనిట్లకు పడిపోయాయి. ఫిబ్రవరి 2022లో రెండో జనరేషన్ మోడల్ విడుదలైన తర్వాత అమ్మకాలు మళ్లీ పెరిగాయి. 2023లో 37% పెరుగుదలతో 2,02,901 యూనిట్లు అమ్ముడయ్యాయి. బాలెనో ప్రస్తుతం పెట్రోల్, సీఎన్‌జీ ఇంజిన్ ఆప్షన్లలో లభిస్తోంది. ఇది దేశంలో అత్యధికంగా అమ్ముడవుతున్న టాప్ 10 కార్ల జాబితాలో నిరంతరం ఉంటోంది. 2024లో నంబర్ 2 స్థానంలో, 2025లో నంబర్ 3 స్థానంలో ఉంది.

మారుతి ప్రీమియం డీలర్‌షిప్ ఛానెల్ అయిన నెక్సాకి బాలెనో అత్యంత ముఖ్యమైన కారుగా నిలిచింది. గత 10 సంవత్సరాలలో బాలెనో అమ్ముడైన 1.69 మిలియన్ యూనిట్లు నెక్సా మొత్తం 3.34 మిలియన్ యూనిట్ల అమ్మకాలలో ఏకంగా 51% వాటాను కలిగి ఉన్నాయి. నెక్సా ద్వారా విక్రయించిన ప్యాసింజర్ కార్లలో (Baleno, Ignis, Ciaz) బాలెనో వాటా 77% వరకు చేరుకుంది. అందుకే బాలెనోను నెక్సా అత్యంత విజయవంతమైన కారుగా పరిగణిస్తారు.