Car Sales: పండుగ సీజన్‌లో కారు కొందామని అనుకుంటున్నారా?.. అయితే ఈ సమస్య తప్పదు

Car Sales: వచ్చే పండుగ సీజన్‌లో దేశవ్యాప్తంగా కార్ల కొనుగోళ్లకు సంబంధించి డిమాండ్, బుకింగ్స్ అత్యంత బలంగా ఉన్నాయి. అయితే ఆటోమొబైల్ కంపెనీల దగ్గర మాత్రం అందుకు తగినట్లుగా తగినన్ని కార్ల స్టాక్ అందుబాటులో లేదు. మారుతి సుజుకీ సహా దేశంలోని పలు ప్రముఖ కార్ల తయారీ సంస్థలకు సప్లై పరంగా పెద్ద సవాల్ ఎదురవుతోంది. ముఖ్యంగా ఎలక్ట్రిక్ వెహికల్ సెగ్మెంట్‌లో ఈ సమస్య మరింత ఎక్కువగా కనిపిస్తోంది. అక్టోబర్, నవంబర్ నెలల్లో వచ్చే నవరాత్రి, దసరా, దీపావళి పండుగల సమయంలో విక్రయాలు జోరుగా సాగనున్నప్పటికీ, కార్ల లభ్యత తక్కువగా ఉండటం ఆందోళన కలిగిస్తోంది.

మారుతి సుజుకీ వద్ద 2 లక్షలకు పైగా పెండింగ్ బుకింగ్స్

దేశంలోనే అతిపెద్ద కార్ల తయారీ సంస్థ అయిన మారుతి సుజుకీ దగ్గర ప్రస్తుతం దాదాపు 2 లక్షలకు పైగా కార్ల బుకింగ్స్ పెండింగ్‌లో ఉన్నాయి. అంటే వేలాది మంది కస్టమర్లు కార్లను బుక్ చేసుకుని డెలివరీ కోసం ఎదురుచూస్తున్నారు. కానీ డీలర్ల నెట్‌వర్క్ వద్ద కేవలం 16 రోజులకు సరిపడే విక్రయాల స్టాక్ మాత్రమే అందుబాటులో ఉంది. సాధారణంగా పండుగ సీజన్లలో ఒక నెల వరకు స్టాక్ ఉండాలి. కొత్త ఆటోమేడ్ ప్రొడక్షన్ లైన్ డిసెంబర్ నాటికి పూర్తిగా అందుబాటులోకి వస్తేనే ఉత్పత్తి పెరుగుతుందని, అప్పటి వరకు స్టాక్ సమస్య కొనసాగే అవకాశం ఉందని కంపెనీ అధికారులు వెల్లడించారు.

హ్యుందాయ్, టాటా మోటార్స్ అంచనాలు

మరోవైపు హ్యుందాయ్ మోటార్స్ ఇండియా వద్ద పండుగ సీజన్‌కు ముందు 4 నుంచి 5 వారాల స్టాక్ అందుబాటులో ఉంది. మహారాష్ట్రలోని తాలేగావ్ ప్లాంట్‌లో మూడో షిప్ట్ ప్రారంభించడం ద్వారా కొత్త మోడళ్ల డిమాండ్‌ను తీర్చాలని కంపెనీ భావిస్తోంది. అలాగే టాటా మోటార్స్ కూడా పండుగ సీజన్‌లో రిటైల్ విక్రయాలు పుంజుకుంటాయని ఆశాభావం వ్యక్తం చేసింది. అయితే డీలర్ల సమాచారం ప్రకారం.. ఈసారి పెట్రోల్, డీజిల్ కార్లతో పోలిస్తే ఎలక్ట్రిక్ కార్లకు విపరీతమైన డిమాండ్ పెరగడంతో, ఈవీల సప్లైపై తీవ్రమైన ఒత్తిడి ఏర్పడింది.

పండుగ షెడ్యూల్, అమ్మకాలపై ప్రభావం

ఈ ఏడాది పండుగలు వివిధ నెలల్లో విడివిడిగా రావడం వల్ల గత ఏడాదితో అమ్మకాలను నేరుగా పోల్చడం కష్టమని నిపుణులు పేర్కొంటున్నారు. ఏది ఏమైనప్పటికీ, దేశంలోని టాప్ ఆటోమొబైల్ కంపెనీలు మార్కెట్ వాటాలో సింహభాగాన్ని కలిగి ఉన్నప్పటికీ, సరిపడా కార్లను సకాలంలో డెలివరీ చేయడం ఈసారి పెద్ద పరీక్షగా మారింది. కస్టమర్ల నుంచి వస్తున్న అనూహ్య డిమాండ్‌కు తగినట్లుగా సప్లై చేయలేకపోతే కంపెనీలు పండుగ అవకాశాలను పూర్తిస్థాయిలో ఉపయోగించుకోలేకపోవచ్చు.