Maruti : కొన్ని రోజుల్లో లాంచ్.. మారుతి తొలి ఎలక్ట్రిక్ కారు ఈ-విటారా ఫీచర్స్ ఇవే

Maruti : చాలా కాలం నిరీక్షణ తర్వాత, మారుతి సుజుకి భారత మార్కెట్లో తన మొదటి ఎలక్ట్రిక్ కారు ఈ-విటారాను విడుదల చేయబోతోంది. సెప్టెంబర్ 3, 2025న ఈ కారు లాంచ్ కానుంది. ఈ మేరకు కంపెనీ ఇప్పటికే ప్రకటన చేసింది. ఈ-విటారా ఉత్పత్తి ఆగస్టు 26, 2025 నుంచి ప్రారంభం కానుంది. ఈ కారును తొలిసారిగా భారత్ మొబిలిటీ గ్లోబల్ ఎక్స్‌పో 2025లో ప్రదర్శించారు. మారుతి ఈ-విటారా డిజైన్ చాలా అడ్వాన్సుడ్ గా స్పోర్టీ లుక్‌తో ఉంటుంది. ఇందులో ఎల్ఈడీ ప్రొజెక్టర్ హెడ్‌లైట్స్, వై-షేప్ ఎల్ఈడీ డీఆర్‌ఎల్స్, ఫ్రంట్ ఫాగ్ ల్యాంప్స్, సైడ్ ప్రొఫైల్‌పై బ్లాక్ క్లాడింగ్, 18-అంగుళాల ఏరోడైనమిక్ అల్లాయ్ వీల్స్ ఉన్నాయి.

ఇంటీరియర్ విషయానికి వస్తే.. ఇందులో డ్యూయల్-స్పోక్ స్టీరింగ్ వీల్, డ్యూయల్-స్క్రీన్ డాష్‌బోర్డ్ సెటప్ ఉంటుంది. ఇందులో 10.1-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, 10.25-అంగుళాల డిజిటల్ ఇన్‌స్ట్రుమెంట్ క్లస్టర్ ఉన్నాయి. దీంతో పాటు రెక్టాంగులర్ ఎయిర్ వెంట్లు, ఆటో-డిమ్మింగ్ ఐఆర్‌విఎం, సెమీ-లెదరెట్ సీటింగ్, ఎలక్ట్రానిక్ పార్కింగ్ బ్రేక్, వైర్‌లెస్ ఛార్జింగ్ స్టేషన్ వంటి ఫీచర్లు కూడా ఉన్నాయి.

కారుకు ప్రీమియం లుక్ ఇవ్వడానికి పనోరమిక్ సన్‌రూఫ్, 10-వే పవర్ అడ్జస్టబుల్ డ్రైవర్ సీట్, వెంటిలేటెడ్ ఫ్రంట్ సీట్స్ ఇచ్చారు. భద్రత కోసం ఇందులో 7 ఎయిర్‌బ్యాగ్‌లు, 360-డిగ్రీ సరౌండ్ వ్యూ కెమెరా, ఏడీఏఎస్ ప్యాకేజీ వంటి అడ్వాన్సుడ్ ఫీచర్లు కూడా ఉన్నాయి. ఈ-విటారా 49 kWh, 61 kWh బ్యాటరీ ప్యాక్‌లతో రావచ్చు. 49 kWh బ్యాటరీ ఫ్రంట్-వీల్ డ్రైవ్ సెటప్‌తో వస్తుంది. ఇది 142 bhp పవర్, 193 Nm టార్క్‌ను ఉత్పత్తి చేస్తుంది. దీని రేంజ్ 344 కి.మీ వరకు ఉంటుంది. 61 kWh బ్యాటరీ ఫ్రంట్-వీల్ డ్రైవ్, ఆల్-వీల్ డ్రైవ్ రెండింటిలోనూ లభిస్తుంది.

ఫ్రంట్-వీల్ డ్రైవ్ వేరియంట్ 426 కి.మీ వరకు రేంజ్ ఇవ్వగలదు. ఇది 171 bhp పవర్, 193 Nm టార్క్‌ను ఉత్పత్తి చేస్తుంది. ఆల్-వీల్ డ్రైవ్ వెర్షన్ 181 bhp పవర్, 307 Nm టార్క్‌ను ఉత్పత్తి చేస్తుంది. దీని రేంజ్ 395 కి.మీ వరకు ఉంటుంది. ఛార్జింగ్ విషయానికి వస్తే, 49 kWh బ్యాటరీని 7 kW ఏసీ ఛార్జర్‌తో సుమారు 6.5 గంటల్లో, 11 kW ఛార్జర్‌తో 4.5 గంటల్లో పూర్తిగా ఛార్జ్ చేయవచ్చు. 61 kWh బ్యాటరీని 7 kW ఛార్జర్‌తో 9 గంటల్లో, 11 kW ఛార్జర్‌తో 5.5 గంటల్లో ఛార్జ్ చేయవచ్చు. డీసీ ఫాస్ట్ ఛార్జర్‌తో రెండు బ్యాటరీ ప్యాక్‌లు కేవలం 45 నిమిషాల్లో 80% వరకు ఛార్జ్ అవుతాయి.