Maruti Suzuki : మారుతి సుజుకికి ఐటీ శాఖ భారీ షాక్.. ఏకంగా రూ.5,786 కోట్ల పన్ను నోటీసు

Maruti Suzuki : భారత ఆటోమొబైల్ రంగంలో తిరుగులేని దిగ్గజం మారుతి సుజుకికి ఆదాయపు పన్ను శాఖ నుంచి భారీ నోటీసు అందింది. 2022-23 ఆర్థిక సంవత్సరానికి సంబంధించి సుమారు రూ.5,786 కోట్ల డ్రాఫ్ట్ అసెస్‌మెంట్ ఆర్డర్‌ను ఐటీ విభాగం జారీ చేసింది. ఆదాయం, ఖర్చుల లెక్కల్లో ఉన్న కొన్ని సర్దుబాట్ల కారణంగా ఈ భారీ పన్ను డిమాండ్ తెరపైకి వచ్చింది. అయితే ఈ నోటీసు పట్ల మారుతి సుజుకి యాజమాన్యం ఏమాత్రం ఆందోళన చెందడం లేదు. ఈ పన్ను నోటీసు వల్ల కంపెనీ వ్యాపార కార్యకలాపాలపై గానీ, ఆర్థిక స్థితిగతులపై గానీ ఎలాంటి ప్రతికూల ప్రభావం ఉండదని స్పష్టం చేసింది.

పన్ను శాఖ పంపిన ఈ నోటీసును మారుతి సుజుకి సవాలు చేయాలని నిర్ణయించుకుంది. ఐటీ విభాగం సూచించిన మార్పులపై తమ అభ్యంతరాలను నమోదు చేసేందుకు కంపెనీ సిద్ధమైంది. దీని కోసం త్వరలోనే డిస్ప్యూట్ రిజల్యూషన్ ప్యానెల్ ని ఆశ్రయించనున్నట్లు ప్రకటించింది. అంటే ప్రస్తుతం వచ్చిన ఈ పన్ను ఆర్డర్ తుది నిర్ణయం కాదని, న్యాయపరమైన ప్రక్రియ ద్వారా ఇందులో మార్పులు వచ్చే అవకాశం ఉందని కంపెనీ భావిస్తోంది. సాధారణంగా పెద్ద కంపెనీలకు ఇలాంటి నోటీసులు రావడం సహజమేనని, వీటిని చట్టబద్ధంగా ఎదుర్కొంటామని సంస్థ ప్రతినిధులు తెలిపారు.

ఆశ్చర్యకరమైన విషయం ఏమిటంటే.. ఇంత భారీ పన్ను నోటీసు వార్త బయటకు వచ్చినా స్టాక్ మార్కెట్లో మారుతి సుజుకి షేర్లు కుప్పకూలకపోగా, మరింతగా పుంజుకున్నాయి. మంగళవారం ట్రేడింగ్‌లో కంపెనీ షేర్ దాదాపు 1.82 శాతం పెరిగి రూ.12,986 వద్ద ట్రేడ్ అయింది. ఇక బీఎస్‌ఈలో ఏకంగా 1.98 శాతం లాభంతో రూ.13,010 వద్ద ముగిసింది. మారుతి సుజుకి ఆర్థిక పునాదులు బలంగా ఉన్నాయని, ఇలాంటి నోటీసులను కంపెనీ సులభంగా తట్టుకోగలదని ఇన్వెస్టర్లు బలంగా నమ్ముతున్నారు. ఈ పరిణామం మార్కెట్ వర్గాల్లో హాట్ టాపిక్ గా మారింది.

కంపెనీ ఆర్థిక పనితీరును పరిశీలిస్తే.. మారుతి సుజుకి రికార్డు స్థాయి అమ్మకాలతో దూసుకుపోతోంది. ప్రస్తుత 2026 ఆర్థిక సంవత్సరం తొలి తొమ్మిది నెలల్లోనే కంపెనీ ఏకంగా 14.35 లక్షల వాహనాలను విక్రయించింది. ఇది గత ఏడాదితో పోలిస్తే 3.9 శాతం పెరుగుదల. మూడో త్రైమాసికంలోనే సుమారు రూ.3,794 కోట్ల లాభాన్ని (PAT) గడించింది. ఆటోమొబైల్ పరిశ్రమ ప్రస్తుతం 7 శాతం వృద్ధి రేటుతో సాగుతోందని, రాబోయే రోజుల్లో తమ అమ్మకాలు మరింత పుంజుకుంటాయని కంపెనీ సీనియర్ ఎగ్జిక్యూటివ్ రాహుల్ భారతి ధీమా వ్యక్తం చేశారు. పన్ను చిక్కులు ఎదురైనా, మారుతి సుజుకి జోరు మాత్రం తగ్గడం లేదని అర్థమవుతోంది.