Maruti Suzuki : ఆ కార్లే కావాలంటున్న జనాలు.. ఏకంగా 9 లక్షల కార్ల విక్రయమే లక్ష్యంగా మారుతీ సుజుకి

Maruti Suzuki : దేశంలోనే అతిపెద్ద కార్ల తయారీ సంస్థ అయిన మారుతీ సుజుకీ ఇండియా రాబోయే ఆర్థిక సంవత్సరంలో రికార్డు స్థాయిలో ఏకంగా 9 లక్షల సీఎన్‌జీ కార్లను విక్రయించాలని లక్ష్యంగా పెట్టుకుంది. ఇది గతేడాది సాధించిన అమ్మకాలతో పోలిస్తే దాదాపు 30 శాతం ఎక్కువ. పెట్రోల్, డీజిల్ ధరలు రోజురోజుకూ మండిపోతుండటంతో వినియోగదారులు మైలేజ్ ఎక్కువగా ఇచ్చే సీఎన్‌జీ కార్ల వైపు వేగంగా అడుగులు వేస్తున్నారని కంపెనీ వెల్లడించింది. మారుతీ సుజుకీ ఇండియా సీనియర్ ఎగ్జిక్యూటివ్ ఆఫీసర్ పార్థో బెనర్జీ తెలిపిన వివరాల ప్రకారం.. ప్రస్తుత ఆర్థిక సంవత్సరం మొదటి త్రైమాసికంలోనే (ఏప్రిల్-జూన్) కంపెనీ 2.2 లక్షల సీఎన్‌జీ వాహనాలను విక్రయించింది. ఇది గతేడాది ఇదే సమయంతో పోలిస్తే 58 శాతానికి పైగా ఆకట్టుకునే వృద్ధి.

పశ్చిమ ఆసియాలో నెలకొన్న తీవ్ర ఉద్రిక్తతలు, యుద్ధ వాతావరణం కారణంగా అంతర్జాతీయంగా ఇంధన ధరలు విపరీతంగా పెరిగాయి. దీని ప్రభావం నేరుగా వాహన కొనుగోలుదారులపై పడింది. తక్కువ నిర్వహణ ఖర్చుతో నడిచే సీఎన్‌జీ వాహనాల వైపు కస్టమర్లు మొగ్గు చూపుతున్నారు. ప్రస్తుతం మారుతీ సుజుకీ భారత్‌లో చిన్న కార్ల నుంచి లైట్ కమర్షియల్ వాహనాల వరకు ఏకంగా 15 రకాల వేర్వేరు సీఎన్‌జీ మోడళ్లను విక్రయిస్తోంది. గడిచిన FY26 ఆర్థిక సంవత్సరంలో కంపెనీ 7 లక్షలకు పైగా సీఎన్‌జీ వాహనాలను విక్రయించగా, జూన్ 2026 నాటికి కంపెనీ సాధించిన మొత్తం విక్రయాల్లో 42 శాతం వాటా కేవలం సీఎన్‌జీ మోడళ్లదే కావడం గమనార్హం.

ఒకప్పుడు సీఎన్‌జీ ఇంజిన్ అంటే కేవలం చిన్న హ్యాచ్‌బ్యాక్ కార్లు, వ్యాన్లు లేదా ఎర్టిగా వంటి ఎంపీవీ మోడళ్లకు మాత్రమే పరిమితం అనే భావన ఉండేది. కానీ ఇప్పుడు ఆ సీన్ పూర్తిగా మారిపోయింది. ప్రస్తుతం ఎస్‌యూవీ కార్లు కొనుగోలు చేసే వినియోగదారులు కూడా సీఎన్‌జీ వేరియంట్లనే ఎక్కువగా కోరుకుంటున్నారని పార్థో బెనర్జీ వెల్లడించారు. కంపెనీకి చెందిన కొత్త విక్టోరిస్ ఎస్‌యూవీ మోడల్ విక్రయాల్లో 50 శాతానికి పైగా అండర్‌బాడీ సీఎన్‌జీ ట్యాంక్ ఉన్న మోడళ్లే అమ్ముడవుతున్నాయి. వినియోగదారుల ప్రాధాన్యతను దృష్టిలో ఉంచుకుని కొత్త బ్రెజ్జా ఫేస్‌లిఫ్ట్‌లో కూడా అండర్‌బాడీ సీఎన్‌జీ ట్యాంక్ ఆప్షన్‌ను అందించారు. దీనివల్ల కారు బూట్ స్పేస్ తగ్గకుండా, ప్రయాణికులకు ఎక్కువ లగేజ్ పెట్టుకునే వెసులుబాటు లభిస్తోంది.

మారుతీ సుజుకీ కేవలం సీఎన్‌జీ విభాగంలోనే కాకుండా మొత్తం ఎస్‌యూవీ మార్కెట్‌లోనూ తమ ఆధిపత్యాన్ని మరింత పెంచుకోవాలని భావిస్తోంది. FY27 ఆర్థిక సంవత్సరంలో తమ ఎస్‌యూవీ కార్ల అమ్మకాలను 25 నుంచి 30 శాతం వరకు పెంచాలని ప్రణాళికలు సిద్ధం చేసింది. గతేడాది కంపెనీ సుమారు 5.5 లక్షల ఎస్‌యూవీలను విక్రయించగా, ఈసారి ఆ సంఖ్యను ఏకంగా 7 లక్షల యూనిట్లకు చేర్చాలని లక్ష్యంగా పెట్టుకుంది. కొత్త బ్రెజ్జా ఫేస్‌లిఫ్ట్‌తో పాటు మార్కెట్లో అందుబాటులో ఉన్న ఇతర పాపులర్ మోడళ్లు ఈ లక్ష్యాన్ని చేరుకోవడంలో కీలక పాత్ర పోషిస్తాయని కంపెనీ ఆశిస్తోంది. ప్రస్తుతం మారుతీ లైనప్‌లో బ్రెజ్జా, ఫ్రాంక్స్, గ్రాండ్ విటారా, ఎర్టిగా, ఇన్విక్టో, జిమ్నీ, ఎక్స్‌ఎల్6, ఈ-విటారా, విక్టోరిస్ వంటి అనేక విజయవంతమైన ఎస్‌యూవీ, యుటిలిటీ వాహనాలు ఉన్నాయి.

మారుతీ సుజుకీ మొత్తం వ్యాపారంలో ఎస్‌యూవీల వాటా క్రమంగా పెరుగుతూ వస్తోంది. ఆర్థిక సంవత్సరం FY23లో కంపెనీ మొత్తం అమ్మకాలలో ఎస్‌యూవీల వాటా కేవలం 12 శాతంగా మాత్రమే ఉండేది. కానీ అది FY27 మొదటి త్రైమాసికం నాటికి ఏకంగా 30 శాతానికి చేరుకుంది. FY27 మొదటి త్రైమాసికంలో మారుతీ సుజుకీ మొత్తం 6,82,724 వాహనాలను విక్రయించింది. గతేడాది ఇదే సమయంలో ఈ విక్రయాలు 5,27,861 యూనిట్లుగా మాత్రమే ఉన్నాయి. అందులోనూ ఎస్‌యూవీ మరియు యుటిలిటీ వాహనాల విక్రయాలు 1,61,868 యూనిట్ల నుంచి ఏకంగా 2,18,885 యూనిట్లకు పెరిగి సరికొత్త రికార్డులను సృష్టించాయి.