McLaren: కారు నడుపుతుంటే గాల్లో తేలిపోవడం ఖాయం.. రోడ్లపైకి రాబోతున్న విమానం లాంటి కారు

McLaren: లగ్జరీ సూపర్‌కార్ల తయారీ సంస్థ మెక్‌లారెన్ వేగాన్ని ప్రేమించే ఆటోమొబైల్ లవర్ల కోసం సరికొత్త వాహనాన్ని తీసుకొచ్చేందుకు సన్నాహాలు చేస్తోంది. లండన్‌లోని కోవెంట్ గార్డెన్‌లో ఒక భారీ కివీ పక్షి విగ్రహాన్ని ఆవిష్కరిస్తూ McL 820 అనే పేరుతో సరికొత్త టీజర్‌ను విడుదల చేసింది. బ్లాక్, ఆరెంజ్ కలర్ కాంబినేషన్లో ఉన్న ఈ విగ్రహం భవిష్యత్తు సూపర్‌కార్‌పై ఆసక్తిని రేకెత్తిస్తోంది. మెక్‌లారెన్ చరిత్రలోనే అత్యంత పవర్ ఫుల్ రోడ్-లీగల్ కార్‌గా ఇది రికార్డు సృష్టించే అవకాశాలు కనిపిస్తున్నాయి.

పేరులోనే దాగున్న పవర్ సీక్రెట్

మెక్‌లారెన్ కంపెనీ సాధారణంగా తమ కార్ల మోడల్ పేర్లలోనే వాటి పవర్ సామర్థ్యాన్ని సూచిస్తూ ఉంటుంది. ఈ క్రమంలో McL 820 అంటే ఇది 820 పిఎస్ (సుమారు 809 బిహెచ్‌పి) కంటే ఎక్కువ పవర్‌ను ఉత్పత్తి చేయగలదని ఆటోమొబైల్ నిపుణులు భావిస్తున్నారు. ప్రస్తుతం మార్కెట్లో అందుబాటులో ఉన్న 750S మోడల్ 740 బిహెచ్‌పి పవర్‌ను మాత్రమే ఇస్తుండగా, కొత్త కారు అంతకు మించిన అగ్రెసివ్ పెర్ఫార్మన్స్ అందించబోతోంది. McL అనే ట్యాగ్‌ను గతంలో మోంటెరీ కార్ వీక్‌లో ప్రదర్శించిన McL 6GT మోడల్ కోసం కూడా ఉపయోగించారు.

కివీ పక్షి విగ్రహం వెనుక సెంటిమెంట్

ఈ ఆవిష్కరణలో కివీ పక్షి విగ్రహాన్ని ప్రదర్శించడం వెనుక ఒక చారిత్రక బంధం ఉంది. మెక్‌లారెన్ సంస్థ వ్యవస్థాపకుడు బ్రూస్ మెక్‌లారెన్ న్యూజిలాండ్ దేశానికి చెందినవారు. ఆయన స్వదేశీ మూలాలను గౌరవిస్తూ కంపెనీ స్పీడీ కివీ గుర్తును తమ ప్రత్యేక సెంటిమెంట్‌గా వాడుతోంది. ప్రస్తుతం టీజ్ చేసిన McL 820 అనేది రాబోయే ప్రొడక్షన్ మోడల్ పేరు అవుతుందా లేదా అనేది కంపెనీ ఇంకా అధికారికంగా ధృవీకరించాల్సి ఉంది.

పవర్‌ఫుల్ హైబ్రిడ్ V8 ఇంజిన్

ఈ కొత్త సూపర్‌కార్‌లో పవర్‌ఫుల్ హైబ్రిడ్ V8 ఇంజిన్‌ను పొందుపరిచే అవకాశాలు ఎక్కువగా ఉన్నాయి. మెక్‌లారెన్ మొదటిసారిగా స్వయంగా సొంతంగా ఇంజిన్ల తయారీ చేపడుతుండటం గమనార్హం. 820 పిఎస్ అవుట్‌పుట్‌తో రానున్న ఈ కారు మార్కెట్లో ఉన్న ఫెరారీ 12 సిలిండ్రి, ఆస్టన్ మార్టిన్ వాంక్విష్, ఫెరారీ 296, లాంబోర్గిని టెమరారియో వంటి దిగ్గజ కార్లకు గట్టి పోటీ ఇవ్వనుంది.

750S మోడల్‌కు రిప్లేస్‌మెంట్

మెక్‌లారెన్ McL 820 ప్రస్తుతం అమ్ముడవుతున్న 750S సూపర్‌కార్ స్థానాన్ని భర్తీ చేసేందుకు వస్తోంది. వచ్చే ఏడాది నాటికి 750S మోడల్ ఉత్పత్తిని నిలిపివేసేందుకు కంపెనీ నిర్ణయించుకుంది. ఇప్పటికే ఈ మోడల్‌కు సంబంధించి చివరి ఆర్డర్లను కూడా స్వీకరించినట్లు సంస్థ ప్రకటించింది. ఈ నేపథ్యంలో McL 820 రాక ఆటోమొబైల్ పరిశ్రమలో సరికొత్త సంచలనానికి తెరతీస్తోంది.