Mercedes-Benz : మెర్సిడెస్ బెంజ్ కస్టమర్లకు అలర్ట్.. 149 లగ్జరీ కార్లను వెనక్కి పిలిచిన కంపెనీ

Mercedes-Benz : ప్రముఖ లగ్జరీ కార్ల తయారీ సంస్థ మెర్సిడెస్ బెంజ్ తన కస్టమర్ల భద్రత దృష్ట్యా కీలక నిర్ణయం తీసుకుంది. భారతదేశంలో విక్రయించిన కొన్ని కార్లలో సాంకేతిక లోపం ఉన్నట్లు గుర్తించిన కంపెనీ, వాటిని తక్షణమే వెనక్కి పిలిచింది. మొత్తం 149 కార్లపై ఈ ప్రభావం ఉన్నట్లు కంపెనీ ప్రకటించింది. కార్లలో ఉండే ఎమర్జెన్సీ స్టాప్ అసిస్ట్ ఫీచర్‌లో సాఫ్ట్‌వేర్ పరమైన సమస్య తలెత్తడమే ఈ రికాల్‌కు ప్రధాన కారణం. ఒకవేళ మీ దగ్గర కూడా మెర్సిడెస్ కారు ఉంటే, అది ఈ లిస్టులో ఉందో లేదో ఒకసారి చెక్ చేసుకోవడం చాలా ముఖ్యం.

ఈ రికాల్ పరిధిలోకి అన్ని కార్లు రావు, కేవలం కొన్ని నిర్దిష్ట మోడళ్లు మాత్రమే ఉన్నాయి. ముఖ్యంగా 2024 నుంచి 2025 మధ్య కాలంలో తయారైన CLE కోపే (CLE Coupe) కార్లు, 2025 మోడల్ కు చెందిన AMG CLE శ్రేణి కార్లు ఇందులో ఉన్నాయి. అలాగే అక్టోబర్, నవంబర్ 2024 మధ్య కాలంలో ఉత్పత్తి అయిన AMG C-Class కార్లలో కూడా ఈ సమస్య ఉన్నట్లు కంపెనీ గుర్తించింది. ఈ కొద్దిపాటి యూనిట్లలో ఉన్న సాఫ్ట్‌వేర్ బగ్ వల్ల ప్రమాద సమయాల్లో సేఫ్టీ ఫీచర్లు సరిగ్గా పని చేయకపోవచ్చని నిపుణులు హెచ్చరిస్తున్నారు.

అసలు ఈ ఎమర్జెన్సీ స్టాప్ అసిస్ట్ సమస్య ఏంటంటే.. ఇది డ్రైవర్ ఏదైనా కారణం వల్ల స్పందించలేని స్థితిలో ఉన్నప్పుడు (ఉదాహరణకు స్పృహ తప్పడం లేదా నిద్రపోవడం) కారును సురక్షితంగా ఆపేందుకు ఉపయోగపడే ఫీచర్. డ్రైవర్ స్టీరింగ్‌ను పట్టుకోకపోయినా లేదా స్పందించకపోయినా, ఈ సాఫ్ట్‌వేర్ దానిని గుర్తించి ఆటోమేటిక్‌గా బ్రేకులు వేసి కారును ఆపుతుంది. అలాగే ఎమర్జెన్సీ కాల్ కూడా చేస్తుంది. అయితే ప్రస్తుతం రికాల్ చేసిన కార్లలోని సాఫ్ట్‌వేర్, డ్రైవర్ ప్రతిస్పందనను సరిగ్గా గుర్తించలేకపోతోంది. దీనివల్ల కారు ఆటోమేటిక్‌గా ఆగకపోవచ్చు. అయితే సాధారణంగా డ్రైవర్ బ్రేకులు వేసినప్పుడు మాత్రం ఎటువంటి ఇబ్బంది ఉండదు.

మెర్సిడెస్ బెంజ్ కార్లు కలిగిన వారు వెంటనే తమ కారు VIN (Vehicle Identification Number) సహాయంతో దగ్గరలోని అధికారిక డీలర్‌ను సంప్రదించాలి. కంపెనీ ప్రతినిధులు కూడా స్వయంగా ప్రభావిత కస్టమర్లకు ఫోన్ లేదా మెయిల్ ద్వారా సమాచారం అందిస్తున్నారు. ఈ సమస్యను పరిష్కరించేందుకు కంపెనీ ఉచితంగా సాఫ్ట్‌వేర్ అప్‌డేట్ అందిస్తుంది. దీని కోసం కస్టమర్లు ఒక్క రూపాయి కూడా ఖర్చు చేయాల్సిన పనిలేదు. ఇది భద్రతకు సంబంధించిన విషయం కాబట్టి నిర్లక్ష్యం చేయకుండా వెంటనే అప్‌డేట్ చేయించుకోవడం ఉత్తమం. ఒకవేళ మీరు సెకండ్ హ్యాండ్‌లో మెర్సిడెస్ కారు కొనాలనుకుంటే, ఆ కారుకు ఈ రికాల్ అప్‌డేట్ జరిగిందో లేదో కూడా సరిచూసుకోవాలి.