Audi: సరికొత్త లుక్, పవర్‌ఫుల్ ఇంజిన్‌తో ఇండియాలోకి కొత్త ఆడి.. లాంచ్ ఎప్పుడంటే?

Audi: లగ్జరీ కార్ల తయారీ దిగ్గజం ఆడి తన మోస్ట్ పాపులర్ ఎస్‌యూవీ క్యూ3 కొత్త తరం మోడల్‌ను అక్టోబర్ 16న భారతదేశంలో అధికారికంగా విడుదల చేయడానికి సిద్ధమైంది. అద్భుతమైన లుక్, అత్యంత శక్తివంతమైన టర్బో పెట్రోల్ ఇంజిన్, ఆధునిక సాంకేతికతతో రానున్న ఈ కారు లగ్జరీ వాహన విపణిలో సరికొత్త సంచలనం సృష్టించనుంది. దాదాపు నాలుగు సంవత్సరాలుగా భారత మార్కెట్లో విజయవంతంగా కొనసాగుతున్న ప్రస్తుత మోడల్ స్థానంలో ఈ కొత్త తరం ఆడి క్యూ3 అడుగుపెడుతోంది. భారతీయ కస్టమర్ల అభిరుచులకు అనుగుణంగా రూపుదిద్దుకున్న ఈ కారును మన దేశంలోనే అసెంబుల్ చేయనుండటం విశేషం. ఈ మోడల్ కోసం ఆసక్తిగా ఎదురుచూస్తున్న వాహన ప్రియుల కోసం ఈ నెలలోనే అధికారిక బుకింగ్స్‌ను కంపెనీ ప్రారంభించింది. ఆడి నుంచి రాబోయే నెక్స్ట్ జెనరేషన్ మోడళ్ల శ్రేణిలో భారత మార్కెట్‌లోకి వస్తున్న మొదటి ప్రతిష్టాత్మక కారు ఇదే కావడం గమనార్హం.

సింగిల్ పెట్రోల్ ఆప్షన్.. క్వాట్రో ఆల్-వీల్ డ్రైవ్

ఈసారి ఆడి క్యూ3 మోడల్‌లో డీజిల్ ఇంజిన్ వేరియంట్‌ను పూర్తిగా నిలిపివేశారు. కేవలం 2.0-లీటర్ టర్బో పెట్రోల్ ఇంజిన్‌తో మాత్రమే ఇది లభించనుంది. ఈ శక్తివంతమైన ఇంజిన్ దాదాపు 204 హెచ్‌పి పవర్, 320 ఎన్‌ఎమ్ టార్క్ విడుదల చేస్తుందని అంచనా వేస్తున్నారు. 7-స్పీడ్ డిసిటి గేర్‌బాక్స్‌తో అనుసంధానించబడిన ఈ కారులో ఆడికి పేరు తెచ్చిపెట్టిన క్వాట్రో ఆల్-వీల్ డ్రైవ్ సిస్టమ్‌ను ప్రామాణికంగా అందించనున్నారు. దీనివల్ల ఇంజిన్ శక్తి నాలుగు చక్రాలకూ సమానంగా అందుతూ అన్ని రకాల రోడ్లపై అద్భుతమైన డ్రైవింగ్ అనుభూతిని ఇస్తుంది.

స్పోర్టీ లుక్.. మరింత అగ్రెసివ్ డిజైన్

డిజైన్ పరంగా పాత మోడల్ కంటే ఇది చాలా భిన్నంగా, అత్యంత ఆకర్షణీయంగా కనిపిస్తుంది. ముందు భాగంలో అమర్చిన స్ప్లిట్ హెడ్‌ల్యాంప్స్ కారుకు స్పోర్టీ లుక్‌ను తెచ్చిపెట్టాయి. కస్టమర్ల అభిరుచికి తగ్గట్టు సెట్ చేసుకునే డిఆర్ఎల్స్, 18-ఇంచీల డ్యూయల్-టోన్ అలాయ్ వీల్స్, క్రోమ్ బెల్ట్‌లైన్ ప్రత్యేక ఆకర్షణగా నిలుస్తాయి. వెనుక వైపు ఇచ్చిన ఎల్‌ఈడీ స్ప్లిట్ టెయిల్-లాంప్స్, వెలిగే ఆడి లోగో కారుకు మరింత ప్రీమియం లుక్‌ను జోడించాయి.

హైటెక్ కేబిన్.. లగ్జరీ ఫీచర్లు

కారు లోపలి కేబిన్ కూడా సరికొత్త రీతిలో డిజైన్ చేశారు. డాష్‌బోర్డ్ పై డ్రైవర్ కోసం డిజిటల్ స్క్రీన్, ఇన్ఫోటైన్‌మెంట్ కోసం మరో స్క్రీన్‌తో డ్యూయల్-స్క్రీన్ సెటప్‌ ఇచ్చారు. స్టీరింగ్ వీల్ వద్దనే గేర్ లివర్ అమర్చడం గమనార్హం. సోనోస్ ప్రీమియం సౌండ్ సిస్టమ్, పనోరమిక్ సన్‌రూఫ్, వైర్‌లెస్ ఆపిల్ కార్ ప్లే, ఆండ్రాయిడ్ ఆటో, డ్యూయల్-జోన్ క్లైమేట్ కంట్రోల్, 360-డిగ్రీ కెమెరా వంటి అత్యున్నత రక్షణ, వినోద ఫీచర్లు ఇందులో ఉన్నాయి.