Renault Duster : ఎస్యూవీ ప్రియులకు గుడ్ న్యూస్.. కొత్త రెనాల్ట్ డస్టర్ మైలేజ్ వివరాలు లీక్
కొత్త రెనాల్ట్ డస్టర్ మైలేజ్ వివరాలు లీక్
Renault Duster : భారతీయ ఎస్యూవీ కార్ల విభాగంలో ఒకప్పుడు తిరుగులేని గుర్తింపు తెచ్చుకున్న రెనాల్ట్ డస్టర్ ఇప్పుడు మరింత పవర్ఫుల్ అండ్ ఎఫిషియంట్ వేరియంట్లో మార్కెట్లోకి రావడానికి సిద్ధమవుతోంది. ప్రముఖ ఫ్రెంచ్ కార్ల తయారీ సంస్థ రెనాల్ట్ ఇండియా తన అప్కమింగ్ మోడల్ రెనాల్ట్ డస్టర్ టర్బో టీసీఈ 100కి సంబంధించిన అత్యంత కీలకమైన మైలేజ్ వివరాలను అధికారికంగా వెల్లడించింది. కొన్ని నెలల క్రితం లాంచ్ అయిన న్యూ జనరేషన్ డస్టర్ సిరీస్లో ఇది సరికొత్త వేరియంట్గా రాబోతోంది.
లీటరుకు 19.41 కిలోమీటర్ల మైలేజ్ గ్యారెంటీ
కంపెనీ తెలిపిన వివరాల ప్రకారం.. ఈ సరికొత్త ఎస్యూవీ కారుకు ఆటోమోటివ్ రీసెర్చ్ అసోసియేషన్ ఆఫ్ ఇండియా(ARAI) నుంచి అధికారిక మైలేజ్ సర్టిఫికేషన్ లభించింది. టెస్టింగ్ ప్రక్రియలో ఈ కారు లీటరు పెట్రోల్కు ఏకంగా 19.41 కిలోమీటర్ల మైలేజ్ ఇచ్చినట్లు కంపెనీ స్పష్టం చేసింది. సాధారణంగా మిడ్-సైజ్ ఎస్యూవీ సెగ్మెంట్లో ఈ స్థాయి మైలేజ్ రావడం చాలా అరుదు. పవర్ఫుల్ డ్రైవింగ్తో పాటు పెట్రోల్ ఖర్చులు కలిసిరావాలని కోరుకునే భారతీయ మిడిల్ క్లాస్, ప్రీమియం కస్టమర్లకు ఇది ఒక బెస్ట్ ఆప్షన్గా మారనుంది.
అధునాతన ఆర్జీఎమ్పీ ప్లాట్ఫారమ్పై నిర్మాణం
కొత్త రెనో డస్టర్ కారును కంపెనీ సరికొత్త ఆర్జీఎమ్పీ గ్లోబల్ ప్లాట్ఫారమ్పై నిర్మించింది. ఈ అధునాతన ప్లాట్ఫారమ్ కారణంగా కారుకు అద్భుతమైన బాడీ స్ట్రక్చర్, మెరుగైన భద్రత, స్మూత్ డ్రైవింగ్ అనుభూతి లభిస్తాయి. కారు బరువును నియంత్రణలో ఉంచుతూ, వేగంగా వెళ్లేటప్పుడు కూడా స్థిరత్వాన్ని ఇవ్వడం ఈ ప్లాట్ఫారమ్ ప్రత్యేకత. దీనివల్ల ఇంజన్పై అదనపు భారం పడకుండా, ఇంధన వినియోగం గణనీయంగా తగ్గుతుందని రెనాల్ట్ ఇంజనీరింగ్ బృందం పేర్కొంది.
శక్తివంతమైన టర్బో పెట్రోల్ ఇంజన్
ఈ సరికొత్త డస్టర్ మోడల్లో ప్రత్యేకంగా ట్యూన్ చేసిన టర్బోచార్జ్డ్ పెట్రోల్ ఇంజన్ను అమర్చారు. ఈ ఇంజన్ గరిష్టంగా 100 పీఎస్ పవర్ను, 160 ఎన్ఎమ్ టాప్ టార్క్ను ఉత్పత్తి చేస్తుంది. దీనికి తోడు స్మార్ట్ డ్రైవింగ్ కోసం 6-స్పీడ్ మాన్యువల్ ట్రాన్స్మిషన్ గేర్బాక్స్ను జత చేశారు. నగరాలలోని ట్రాఫిక్ రోడ్లపైనే కాకుండా, హైవేలపై లాంగ్ జర్నీ చేసేటప్పుడు కూడా ఈ ఇంజన్ తిరుగులేని పర్ఫార్మెన్స్ ఇస్తుందని కంపెనీ గట్టిగా చెబుతోంది.
భారత మార్కెట్ ప్రజాదరణే లక్ష్యంగా..
రెనో ఇండియా ఇంజనీరింగ్ హెడ్ డాక్టర్ వి. విక్రమన్ ఈ కారు గురించి మాట్లాడుతూ.. కొత్త డస్టర్ అభివృద్ధిలో తాము మైలేజ్, ఇంజన్ ఎఫిషియన్సీపై ప్రత్యేకంగా శ్రద్ధ పెట్టామని చెప్పారు. భారతీయ రోడ్ల పరిస్థితి, ఇక్కడి కస్టమర్ల డ్రైవింగ్ శైలిని మనసులో ఉంచుకుని కారు స్ట్రక్చర్ను లైట్ వెయిట్గా మార్చామని, ఫలితంగానే ఈ అద్భుతమైన మైలేజ్ సాధ్యమైందని ఆయన వివరించారు. ఈ ఏడాది భారత మార్కెట్లో సరికొత్త రికార్డులు సృష్టించేందుకు రెనాల్ట్ డస్టర్ టర్బో సిద్ధంగా ఉంది.
