VinFast : టాటా, మహీంద్రాకు కొత్త టెన్షన్.. రెండు కొత్త EVలతో ఇండియాకు వస్తున్న విన్‌ఫాస్ట్
VinFast : భారతీయ ఆటోమొబైల్ మార్కెట్లో పోటీ మరింత పెరగనుంది. వియత్నాంకు చెందిన ప్రముఖ కార్ల తయారీ సంస్థ విన్‌ఫాస్ట్ (VinFast) ఇప్పుడు భారత మార్కెట్లోకి అడుగు పెట్టబోతోంది. ఇప్పటికే దేశీయ ఎలక్ట్రిక్ వాహన మార్కెట్‌ను టాటా మోటార్స్, మహీంద్రా వంటి కంపెనీలు శాసిస్తున్న నేపథ్యంలో విన్‌ఫాస్ట్ రాకతో కొత్త సవాళ్లు అవకాశాలు ఏర్పడనున్నాయి. కొన్ని నెలల క్రితమే భారత మార్కెట్లోకి ఎంట్రీ ఇస్తున్నట్లు ప్రకటించిన ఈ కంపెనీ జనవరి 2025లో జరిగిన భారత్ మొబిలిటీ గ్లోబల్ ఎక్స్‌పోలో తమ ఈవీ సిరీస్ ను ప్రదర్శించింది. ఇప్పుడు జూన్ 2025లో (ఇప్పటికే మే నెలలో తయారీ ప్రారంభమైంది), విన్‌ఫాస్ట్ చివరకు భారతదేశంలో తమ కార్లను విడుదల చేయడానికి రెడీ అయింది.
రెండు కొత్త ఎలక్ట్రిక్ SUVలతో ఎంట్రీ
భారత మార్కెట్లో విన్‌ఫాస్ట్ తొలుత VF7, VF6 అనే రెండు ఎలక్ట్రిక్ కార్లను రిలీజ్ చేయనుంది. ఈ రెండు ఎలక్ట్రిక్ SUVలను వియత్నాంలోనే డిజైన్ చేసి డెవలప్ చేశారు. అయితే, భారతీయ పరిస్థితులకు అనుగుణంగా వీటిలో కొన్ని మార్పులు చేశారు. ఈ రెండు కార్ల విక్రయాలు జూన్ నెలలోనే ప్రారంభమవుతాయని కంపెనీ వెల్లడించింది.
తమిళనాడులో భారీ ప్లాంట్
విన్‌ఫాస్ట్ భారతదేశంలో తమ వ్యాపారాన్ని విస్తరించడానికి సిద్ధంగా ఉంది. దీనిలో భాగంగా తమిళనాడులో తమ ఉత్పత్తి ప్లాంట్‌ను పూర్తి చేసే ప్రక్రియలో ఉంది. ఈ ప్లాంట్ రాబోయే కొన్ని వారాల్లో పూర్తిస్థాయిలో కార్యకలాపాలు ప్రారంభించి, ఉత్పత్తిని సంవత్సరానికి 50,000 యూనిట్లకు పెంచనుంది. ఈ ప్లాంట్‌లో విన్‌ఫాస్ట్ VF7, VF6 మోడళ్లను స్థానికంగా అసెంబుల్ చేస్తారు. ఇవి భారతదేశంలో బ్రాండ్ మొదటి మోడల్స్ అవుతాయి. భవిష్యత్తులో ఈ ప్లాంట్ సామర్థ్యాన్ని 1,50,000 యూనిట్లకు పెంచాలని కంపెనీ యోచిస్తోంది.
VF7 ఎలక్ట్రిక్ కారు ప్రత్యేకతలు
VF7 అనేది ఒక ప్రీమియం SUV. ఇది మిడ్‌సైజ్ ఎలక్ట్రిక్ SUV సెగ్మెంట్‌లో విడుదల కానుంది. ఇది పెద్దదిగా, మరింత ప్రీమియంగా ఉంటుంది. దీని డిజైన్ ఇతర విన్‌ఫాస్ట్ మోడళ్ల మాదిరిగానే V-థీమ్ LED DRLలు, స్ప్లిట్ LED హెడ్‌ల్యాంప్‌లు, బంపర్‌పై సిల్వర్ గార్నిష్‌తో పెద్ద ఎయిర్ ఇన్‌టేక్‌లను కలిగి ఉంటుంది. ఈ కారులో 18-ఇంచుల అల్లాయ్ వీల్స్ ఉండగా, దీని పొడవు సుమారు 4.5 మీటర్లు. VF7 వెనుక భాగంలో వాలుగా ఉండే రూఫ్‌లైన్ కలిగి ఉంటుంది. ఇది కూపే లాంటి ఎక్స్ పీరియన్స్ ఇస్తుంది. VF7 సింగిల్ ఛార్జ్‌పై దాదాపు 450 కిలోమీటర్ల రేంజ్‌ను ఇస్తుందని అంచనా. అదనంగా, ఇది లెదరెట్ అప్‌హోల్‌స్ట్రీ, యాంబియెంట్ లైటింగ్, పనోరమిక్ సన్‌రూఫ్, లెవెల్ 2 ADAS (అడ్వాన్స్‌డ్ డ్రైవర్ అసిస్టెన్స్ సిస్టమ్స్) వంటి ఫీచర్లతో వస్తుంది.
మార్కెట్లో పోటీ ఇవ్వనున్న VF6
విన్‌ఫాస్ట్ VF6 అనేది కంపెనీ మరో ముఖ్యమైన మోడల్. ఇది VF7 కంటే తక్కువ విభాగంలోకి వస్తుంది. ఈ మోడల్ పొడవు సుమారు 4.2 మీటర్లు ఉంటుంది, ఇది హ్యుందాయ్ క్రెటా ఎలక్ట్రిక్, టాటా కర్వ్ EV, మహీంద్రా XUV400, ఇలాంటి కార్ల సెగ్మెంట్‌కు సమానంగా ఉంటుంది. VF6 కూడా విన్‌ఫాస్ట్ ప్రత్యేక స్టైలింగ్‌ను కలిగి ఉంటుంది. వెనుక భాగంలో వాలుగా ఉండే పైకప్పుతో కూపే-SUV లుక్ ఇస్తుంది. ఈ మోడల్లో సింగిల్ మోటార్ 201 bhp, 310 Nm టార్క్‌ను ఉత్పత్తి చేస్తుంది. ప్రపంచవ్యాప్తంగా విన్‌ఫాస్ట్ 172 bhp, 250 Nm టార్క్‌తో కూడిన VF6 ఎకో వేరియంట్‌ను కూడా విక్రయిస్తుంది. రెండు వేరియంట్‌లలో 59.6 kWh బ్యాటరీ ప్యాక్ ఉంది. ఇది ఒకే ఛార్జ్‌పై 399 కిమీ (ఎకో), 381 కిమీ (ప్లస్) రేంజ్ అందిస్తుంది.
విన్‌ఫాస్ట్ రాకతో భారతీయ ఎలక్ట్రిక్ కార్ల మార్కెట్లో పోటీ తీవ్రతరం కావడం ఖాయం. వినియోగదారులకు మరిన్ని అత్యాధునిక ఎలక్ట్రిక్ వాహనాలు అందుబాటులోకి రానున్నాయి.VinFast India Launch, Electric Cars India, VinFast VF7, VinFast VF6, EV Market India, Tata Motors EV, Mahindra EV
