Kia Seltos : కియా సెల్టోస్ 2026 మోడల్ రాక.. క్రెటాకు కష్టాలు తప్పేలా లేవు

Kia Seltos : కాంపాక్ట్ ఎస్‌యూవీ విభాగంలో కియా మోటార్స్ సంచలనం సృష్టించిన సెల్టోస్, ఇప్పుడు మరింత శక్తివంతమైన ఫీచర్లు, డిజైన్ అప్‌డేట్‌లతో తిరిగి రానుంది. నెక్స్ట్-జనరేషన్ కియా సెల్టోస్ డిసెంబర్ 2025లో భారత మార్కెట్లో లాంచ్ అయ్యే అవకాశం ఉంది. ఈ అప్‌డేటెడ్ మోడల్‌లో అత్యంత ముఖ్యమైన మార్పులలో ఒకటి, డీజిల్ వేరియంట్‌తో ప్రత్యేకంగా కొత్తగా అందించే 7-స్పీడ్ ఆటోమేటిక్ గేర్‌బాక్స్. ఈ కొత్త ఫీచర్, అద్భుతమైన ఇంటీరియర్ మార్పులు సెల్టోస్ ప్రధాన ప్రత్యర్థి అయిన హుందాయ్ క్రెటాకు గట్టి పోటీ ఇవ్వనున్నాయి.

నెక్స్ట్-జనరేషన్ కియా సెల్టోస్ 2026 మోడల్‌లో అతిపెద్ద మెకానికల్ అప్‌డేట్ దాని డీజిల్ వేరియంట్‌కు సంబంధించింది. మీడియా నివేదికల ప్రకారం.. కొత్త సెల్టోస్ డీజిల్ వేరియంట్‌లో ప్రత్యేకంగా 7-స్పీడ్ ఆటోమేటిక్ గేర్‌బాక్స్ లభించే అవకాశం ఉంది. ప్రస్తుత సెల్టోస్ డీజిల్ మోడల్‌లో 1.5 లీటర్ ఇంజిన్‌తో పాటు 6-స్పీడ్ మాన్యువల్, 6-స్పీడ్ టార్క్ కన్వర్టర్ ఆటోమేటిక్ గేర్‌బాక్స్ ఎంపికలు ఉన్నాయి.

7-స్పీడ్ ఆటోమేటిక్ ట్రాన్స్‌మిషన్ రాకతో, ఇంజిన్ శబ్దం, వైబ్రేషన్ తగ్గుతాయి. అలాగే, కారు మిడ్-రేంజ్ రెస్పాన్స్ మరింత వేగంగా, మెరుగ్గా ఉంటుందని భావిస్తున్నారు. ఈ ఫీచర్ సెగ్మెంట్‌లో సెల్టోస్‌ను ప్రత్యేకంగా నిలబెట్టనుంది. (టాటా కర్వ్ ఇప్పటికే 1.5 లీటర్ డీజిల్ ఇంజిన్‌తో 7-స్పీడ్ డీసీటీని అందిస్తోంది). 2026 కియా సెల్టోస్ క్యాబిన్‌లో కూడా అనేక విప్లవాత్మక మార్పులు చోటు చేసుకోనున్నాయి. ఈ మార్పులు సెల్టోస్‌ను మరింత ప్రీమియంగా మారుస్తాయి.

కొత్త సెల్టోస్‌లో కియా సైరోస్ మోడల్ నుంచి స్ఫూర్తి పొందిన ట్రినిటీ పానోరమిక్ డిస్‌ప్లేని అందించే అవకాశం ఉంది. ఈ సెటప్‌లో 12.3-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, 12.3-అంగుళాల ఇన్స్ట్రుమెంట్ క్లస్టర్, క్లైమేట్ కంట్రోల్స్ కోసం 5-అంగుళాల టచ్‌స్క్రీన్ వంటి మూడు డిస్‌ప్లేలు ఉంటాయి. దీనితో పాటుగా, ఈ ప్యాకేజీలో మరికొన్ని కొత్త అడ్వాన్సుడ్ ఫీచర్లను కూడా కియా జోడించనుంది. అధికారిక డిజైన్ వివరాలు లాంచ్ సమయంలో మాత్రమే వెల్లడవుతాయి. అయితే, 2026 కియా సెల్టోస్‌లో బ్రాండ్ కొత్త అపోజిట్స్ యునైటెడ్ డిజైన్ ల్యాంగ్వేజ్ ఉండవచ్చు.

కారు ముందు భాగంలో కొత్తగా డిజైన్ చేసిన గ్రిల్, కొత్త ఫాగ్ ల్యాంప్‌లు, వర్టికల్ డిఆర్‌ఎల్‌లు ఉంటాయి. ఈ ఎస్‌యూవీలో కొత్త అల్లాయ్ వీల్స్, కనెక్టెడ్ టెయిల్ ల్యాంప్‌లు కూడా ఇవ్వవచ్చు. అంతర్జాతీయ మార్కెట్లలో 2026 సెల్టోస్ మొత్తం పొడవు సుమారు 100 మి.మీ. వరకు పెరిగే అవకాశం ఉంది. ఇది జీప్ కంపాస్ కంటే కూడా పొడవుగా ఉంటుంది. అయితే, భారత్‌లో విడుదలయ్యే వెర్షన్ ప్రస్తుత కొలతలను కొనసాగిస్తుందా లేదా పొడవు పెరుగుతుందా అనేది ఇంకా స్పష్టంగా తెలియలేదు.