Bike Buying Tips: కొత్త బైక్ కొంటున్నారా? డెలివరీ ముందు ఈ విషయాలు చెక్ చేయండి

Bike Buying Tips: కొత్త బైక్ కొనుగోలు చేయడానికి ముందు అది మీ రోజువారీ అవసరాలకు ఏ విధంగా ఉపయోగపడుతుందో క్లారిటీ తెచ్చుకోవడం ఎంతో ముఖ్యం. రోజువారీ ఆఫీసు ప్రయాణాలు లేదా నగరంలో తిరగడానికి తక్కువ సీసీ (100cc నుంచి 150cc), మంచి మైలేజ్ ఇచ్చే కమ్యూటర్ బైక్‌లు అనువుగా ఉంటాయి. అదేవిధంగా సుదీర్ఘ దూరాలు ప్రయాణించేందుకు, లాంగ్ రైడ్స్ లేదా అడ్వెంచర్ ఇష్టపడే వారికి 200cc లేదా అంతకంటే ఎక్కువ పవర్ కలిగిన క్రూయిజర్, స్పోర్ట్స్ లేదా అడ్వెంచర్ బైక్‌లు సరైన ఎంపికగా నిలుస్తాయి.

మొత్తం ఖర్చులతో కూడిన బడ్జెట్ ప్లానింగ్

చాలామంది బైక్ కొనేటప్పుడు కేవలం ఎక్స్-షోరూమ్ ధరను మాత్రమే చూసి బడ్జెట్ వేసుకుంటారు. అయితే ఆన్-రోడ్ ధరకు వచ్చేసరికి ఆర్‌టీఓ రిజిస్ట్రేషన్, ఇన్సూరెన్స్, రోడ్ టాక్స్, అదనపు యాక్సెసరీస్ ఖర్చులు తోడవుతాయి. వీటితో పాటు భవిష్యత్తులో అయ్యే రెగ్యులర్ సర్వీసింగ్, ఫ్యూయల్ ఖర్చులు, మెయింటెనెన్స్ వ్యయాన్ని కూడా పరిగణనలోకి తీసుకోవాలి. ఇలా చేయడం వల్ల ఆ తర్వాత అనవసర ఆర్థిక ఒత్తిడి కలగకుండా ఉంటుంది.

రైడింగ్ కంఫర్ట్, సేఫ్టీ ఫీచర్లు

బైక్ ఎంచుకునే సమయంలో దాని సీటు ఎత్తు, హ్యాండిల్‌బార్ పొజిషన్, కూర్చునే విధానం మీకు సౌకర్యవంతంగా ఉన్నాయో లేదో తెలుసుకోవడానికి తప్పనిసరిగా టెస్ట్ రైడ్ చేయాలి. సేఫ్టీకి అత్యధిక ప్రాధాన్యత ఇస్తూ యాంటీ-లాక్ బ్రేకింగ్ సిస్టమ్ (ABS), డిస్క్ బ్రేక్స్, క్వాలిటీ ట్యూబ్‌లెస్ టైర్లు, ప్రకాశవంతమైన ఎల్‌ఈడీ హెడ్‌లైట్స్ వంటి సేఫ్టీ ఫీచర్లు ఉన్న మోడళ్లను ఎంచుకోవడం అత్యవసరం.

ఆఫర్లు, వారంటీ, లోన్, రీసేల్ వ్యాల్యూ

మీ ప్రాంతంలో సదరు బైక్ బ్రాండ్ సర్వీస్ సెంటర్లు, స్పేర్ పార్ట్స్ సులభంగా అందుబాటులో ఉన్నాయో లేదో సరిచూసుకోవాలి. మార్కెట్‌లో మంచి రీసేల్ వ్యాల్యూ ఉన్న పాపులర్ బ్రాండ్లను ఎంచుకోవడం వల్ల భవిష్యత్తులో అమ్మేటప్పుడు మంచి ధర వస్తుంది. ఫైనాన్స్ లేదా లోన్ ద్వారా కొనుగోలు చేసేవారు వివిధ బ్యాంకుల వడ్డీ రేట్లు, ప్రాసెసింగ్ ఫీజులను పోల్చి చూసుకోవాలి. పండుగ ఆఫర్లు, ఎక్స్‌టెండెడ్ వారంటీ, జీరో డెప్రిసియేషన్ ఇన్సూరెన్స్ తీసుకోవడం ద్వారా అత్యవసర సమయాల్లో ఆర్థిక రక్షణ పొందే వీలుంటుంది.