Pulsar N160 vs Apache RTR160: పల్సర్ vs అపాచే..తక్కువ ధరలో ఎక్కువ మైలేజ్ ఇచ్చే స్ట్రీట్ ఫైటర్ ఏదో తెలుసా?

Pulsar N160 vs Apache RTR160: భారతీయ మోటార్‌సైకిల్ మార్కెట్‌లో బజాజ్ పల్సర్, టీవీఎస్ అపాచే మధ్య పోటీ ఎప్పుడూ గట్టిగానే ఉంటుంది. ముఖ్యంగా 160సీసీ సెగ్మెంట్‌లో, బజాజ్ పల్సర్ N160, టీవీఎస్ అపాచే RTR160 రెండూ బలమైన ప్రత్యర్థులుగా నిలుస్తున్నాయి. ఈ రెండు బైక్‌లలో మైలేజ్, పవర్, ఫీచర్ల పరంగా ఏది మెరుగైనదో ఇప్పుడు చూద్దాం.

బజాజ్ పల్సర్ N160 స్టైలిష్ డిజైన్, మంచి పవర్‌తో వస్తుంది. ఇందులో 4-స్ట్రోక్, సింగిల్-సిలిండర్ ఎయిర్-కూల్డ్ ఇంజన్ ఉంటుంది. ఈ ఇంజన్ 16 PS పవర్, 14.65 Nm టార్క్‌ను ఉత్పత్తి చేస్తుంది. కంపెనీ ప్రకటించిన మైలేజ్ ప్రకారం.. పల్సర్ N160 బైక్ లీటరుకు 51.6 కిలో మీటర్లు ఇస్తుంది. ఫీచర్ల విషయానికొస్తే, ఇందులో USB కనెక్టివిటీ కూడా ఉంది. ఈ బైక్ ఎక్స్-షోరూమ్ ధర రూ.1,13,133 నుంచి ప్రారంభమవుతుంది.

టీవీఎస్ అపాచే RTR160 బైక్ అదనపు ఫీచర్‌గా మల్టిపుల్ రైడింగ్ మోడ్స్ (స్పోర్ట్, రెయిన్) అందిస్తుంది. దీని స్పోర్ట్ మోడ్‌లో అత్యధికంగా 17.2 PS పవర్ లభిస్తుంది. మైలేజ్ పరంగా, అపాచే RTR160 చాలా మెరుగ్గా ఉంది. ఈ బైక్ ఒక లీటరు పెట్రోల్‌పై ఏకంగా 61 కిలోమీటర్ల దూరం ప్రయాణిస్తుందని కంపెనీ చెబుతోంది. ఈ బైక్ ఎక్స్-షోరూమ్ ధర రూ.1,15,852 నుంచి మొదలవుతుంది.

పోలికలో చూస్తే, టీవీఎస్ అపాచే RTR160 ధరలో కొద్దిగా ఎక్కువ ఉన్నప్పటికీ, మైలేజ్ (61 kmpl vs 51.6 kmpl), పవర్ (17.2 PS vs 16 PS) పరంగా మెరుగైన ప్రదర్శన కనబరుస్తోంది. ముఖ్యంగా మైలేజ్ గురించి ఎక్కువ ఆలోచించే వారికి అపాచే RTR160 బెస్ట్ ఆప్షన్. అయితే, పల్సర్ N160 కూడా తక్కువ ధర, USB కనెక్టివిటీ, బ్రాండ్ విశ్వసనీయతతో గట్టి పోటీ ఇస్తుంది.