Jaguar Land Rover : వోల్వోకు గట్టి పోటీ.. ఇండియాలో లాంచ్ అయిన రేంజ్ రోవర్ అత్యంత లగ్జరీ కారు

Jaguar Land Rover : జాగ్వార్ ల్యాండ్‌రోవర్ భారతదేశంలో కొత్త రేంజ్ రోవర్ వెలార్ ఆటోబయోగ్రఫీ వేరియంట్‌ను విడుదల చేసింది. ఇది భారతదేశంలో రేంజ్ రోవర్ వెలార్ ఎస్‌యూవీ అత్యంత లగ్జరీ వేరియంట్‌గా మారింది. రేంజ్ రోవర్ వెలార్ ఆటోబయోగ్రఫీ ప్రారంభ ధర రూ.89.90 లక్షలు (ఎక్స్-షోరూమ్). ఈ వేరియంట్ వెలార్ డైనమిక్ ఎస్‌ఈ వేరియంట్ కంటే సుమారు రూ.5 లక్షలు ఎక్కువ ఖరీదైనది. రేంజ్ రోవర్ వెలార్ ఆటోబయోగ్రఫీలో ఇప్పుడు మరింత అద్భుతమైన ఫీచర్లు ఉన్నాయి. ఇవి కారులో కూర్చున్న వారికి మరింత మంచి అనుభూతిని అందిస్తాయి. ఇందులో స్లైడ్ అయ్యే పనోరమిక్ రూఫ్, లెదర్ సీట్లు, సాబెర్ క్లాత్ రూఫ్ కవర్, మెరిడియన్ 3డి సరౌండ్ సౌండ్ సిస్టమ్ లభిస్తాయి.

ముందు సీట్లు 20 రకాలుగా ఎలక్ట్రిక్‌గా సర్దుబాటు అవుతాయి. వీటిలో మసాజ్ ఫంక్షన్ కూడా ఉంది. వెనుక సీట్లు కూడా ఎలక్ట్రిక్‌గా రీక్లైన్ చేయవచ్చు. దీనితో పాటు, కారులో సర్దుబాటు చేయగల యాంబియెంట్ లైటింగ్, నాలుగు జోన్ల క్లైమేట్ కంట్రోల్, ఎయిర్ ప్యూరిఫికేషన్ సిస్టమ్ కూడా ఉన్నాయి. కారు లుక్ విషయానికి వస్తే, ఇందులో రేంజ్ రోవర్ ప్రత్యేకమైన ఫ్లోటింగ్ రూఫ్, హిడెన్ డోర్ హ్యాండిల్స్, పిక్సెల్ ఎల్‌ఈడీ హెడ్‌లైట్లు లభిస్తాయి. ఇందులో 20 అంగుళాల సాటిన్ డార్క్ గ్రే అల్లాయ్ వీల్స్, వాటిపై బర్నిష్డ్ కాపర్ ఉన్నాయి. ఇవి కారుకు మరింత స్టైలిష్ లుక్ ఇస్తాయి.

టెక్నాలజీ విషయానికి వస్తే, ఇందులో 3డి సరౌండ్ కెమెరా, టెర్రెన్ రెస్పాన్స్-2, ఎలక్ట్రానిక్ ఎయిర్ సస్పెన్షన్ , వెడ్ సెన్సింగ్, అడాప్టివ్ క్రూయిజ్ కంట్రోల్ వంటి సౌకర్యాలు కూడా ఉన్నాయి. రేంజ్ రోవర్ ఆటోబయోగ్రఫీ రెండు ఇంజిన్ ఆప్షన్లలో లభిస్తుంది. పి250 పెట్రోల్ ఇంజిన్.. ఇది 247 bhp పవర్, 365 Nm టార్క్ ఉత్పత్తి చేస్తుంది. డి200 డీజిల్ ఇంజిన్.. మైల్డ్ హైబ్రిడ్ టెక్నిక్‌తో కూడిన ఈ ఇంజిన్ 201 bhp పవర్, 430 Nm టార్క్ ఉత్పత్తి చేస్తుంది. మొత్తంగా, ఈ కారు స్టైల్ , లగ్జరీ, అడ్వాన్సుడ్ టెక్నాలజీల అద్భుతమైన సమ్మేళనం. ఇది మార్కెట్లో వోల్వో వంటి బ్రాండ్‌లకు గట్టి పోటీనిస్తుందని భావిస్తున్నారు.