Renault Triber: తక్కువ ధరలో పవర్ ఫుల్ ఫీచర్లు.. మార్కెట్లోకి వచ్చిన రెనాల్ట్ ట్రైబర్ టర్బో

Renault Triber: ప్రముఖ ఆటోమొబైల్ తయారీ సంస్థ రెనాల్ట్ తన అత్యంత ప్రజాదరణ పొందిన 7-సీటర్ ఎంపీవీ ట్రైబర్‎లో సరికొత్త టర్బో పెట్రోల్ వేరియంట్‌ను భారత మార్కెట్లోకి అధికారికంగా విడుదల చేసింది. ఇప్పటికే బడ్జెట్ ధరలో లభించే ఫ్యామిలీ కారుగా మంచి పేరు తెచ్చుకున్న ట్రైబర్ ఇప్పుడు మరింత శక్తివంతమైన ఇంజిన్ ఆప్షన్‌తో అందుబాటులోకి రావడం విశేషం. ఈ కొత్త వేరియంట్ ద్వారా డ్రైవింగ్ అనుభవాన్ని మరింత మెరుగుపరచాలని కంపెనీ భావిస్తోంది. ఈ కొత్త రెనాల్ట్‎ ట్రైబర్ టర్బోలో 1.0-లీటర్ మూడు-సిలిండర్ టీసీఈ టర్బో-పెట్రోల్ ఇంజిన్‌ను అమర్చారు. ఇది గరిష్టంగా 100 హెచ్‌పీ పవర్ అలాగే 180 ఎన్ఎమ్ టార్క్‌ను ఉత్పత్తి చేస్తుంది. ఈ వేరియంట్‌ను 5-స్పీడ్ మ్యాన్యువల్ గేర్‌బాక్స్‌తో అనుసంధానం చేశారు. ముఖ్యంగా ఇదే ఇంజిన్‌ను రెనాల్ట్‎ సంస్థ అత్యంత ప్రజాదరణ పొందిన డస్టర్ అలాగే కైగర్ కార్లలో కూడా ఉపయోగించడం గమనార్హం.

రెనాల్ట్‎ ట్రైబర్ టీసీఈ 100 ఎవల్యూషన్ వేరియంట్ ప్రారంభ ఎక్స్ షోరూమ్ ధర రూ.7.84 లక్షల నుంచి మొదలవుతుంది. దీని టాప్ ఎమోషన్ వేరియంట్ ధర రూ.8.99 లక్షల (ఎక్స్ షోరూమ్) వరకు ఉంది. దీనితో పోలిస్తే, సాధారణ 1.0-లీటర్ నేచురల్లీ ఆస్పిరేటెడ్ పెట్రోల్ ఇంజిన్ మోడల్ ధర రూ.5.80 లక్షల నుంచి ప్రారంభమవుతుంది. అంటే టర్బో-పెట్రోల్ వెర్షన్ సాధారణ మోడల్ కంటే దాదాపు 2 లక్షల రూపాయలు అధిక ధరతో లభిస్తుంది.

ఈ టర్బోచార్జ్డ్ ట్రైబర్ కేవలం వేగంగా వెళ్లడమే కాకుండా, ఇంధన సామర్థ్యంలోనూ మెరుగ్గా పనిచేస్తుంది. కంపెనీ అందించిన సమాచారం ప్రకారం ఈ టీసీఈ 100 మోడల్ కేవలం 10.8 సెకన్లలోనే 0 నుంచి 100 కిమీ వేగాన్ని అందుకుంటుంది. అలాగే లీటరు పెట్రోల్‌కు దాదాపు 21 కిలోమీటర్ల వరకు మైలేజ్ ఇస్తుందని కంపెనీ పేర్కొంది. సాధారణ 1.0-లీటర్ పెట్రోల్-మ్యాన్యువల్ మోడల్ లీటరుకు 19.76 కిమీ మైలేజ్ ఇస్తుండటం గమనార్హం.

ట్రైబర్ టర్బో డిజైన్ పరంగా సాధారణ మోడల్‌ను పోలి ఉంటుంది. అయినప్పటికీ దీని వెనుక భాగంలో ఇచ్చిన ప్రత్యేకమైన టర్బో బ్యాడ్జ్ ఈ కొత్త వేరియంట్‌ను ఇతరులకు భిన్నంగా చూపిస్తుంది. ఇది రెనాల్ట్‎ సంస్థకు చెందిన ఆర్జీఈపీ ఆర్కిటెక్చర్ ఆధారంగా రూపొందించబడింది. ప్రామాణిక మోడల్ మాదిరిగానే 2636 మిమీ పొడవు గల వీల్‌బేస్‌తో విశాలమైన క్యాబిన్ స్పేస్‌ను అందిస్తుంది.

తక్కువ బడ్జెట్‌లో ఎక్కువ మంది కుటుంబ సభ్యులు ప్రయాణించడానికి వీలుగా ఉండే 7-సీటర్ కారు కోరుకునే వారికి ఈ రెనాల్ట్‎ ట్రైబర్ టర్బో ఒక అద్భుతమైన ఎంపికగా నిలుస్తుంది. పవర్‌ఫుల్ ఇంజిన్, అదనపు మైలేజ్ అలాగే ఆకర్షణీయమైన ఫీచర్లతో వస్తున్న ఈ కొత్త వేరియంట్ భారతీయ ఆటోమొబైల్ మార్కెట్లో మంచి అమ్మకాలు సాధించే అవకాశం ఉంది.