Revolt RVX : భారత మార్కెట్లోకి సరికొత్త ఎలక్ట్రిక్ బైక్.. బడ్జెట్ ధరలోనే రివోల్ట్ ఆర్వీఎక్స్ లాంచ్
రివోల్ట్ ఆర్వీఎక్స్ లాంచ్
Revolt RVX : ప్రముఖ ఎలక్ట్రిక్ టూ-వీలర్ల తయారీ సంస్థ రివోల్ట్ మోటార్స్ భారతీయ వాహనదారుల కోసం సరికొత్త ఎలక్ట్రిక్ మోటార్ సైకిల్ను మార్కెట్లోకి పరిచయం చేసింది. దేశీయ మార్కెట్లో అత్యంత ఆదరణ పొందిన తన బైకుల శ్రేణిని విస్తరిస్తూ రివోల్ట్ ఆర్వీఎక్స్ మోడల్ను గురువారం అధికారికంగా విడుదల చేసింది. ఈ సరికొత్త ఈవీ బైక్ ప్రారంభ ఎక్స్-షోరూమ్ ధరను కంపెనీ రూ. 1.24 లక్షలుగా నిర్ణయించింది. కేంద్ర ప్రభుత్వం అందిస్తున్న పీఎం ఈ-డ్రైవ్ పథకం కింద లభించే రాయితీలు కూడా ఈ ధరలోనే కలిసి ఉన్నట్లు కంపెనీ స్పష్టం చేసింది. అయితే ఈ ప్రారంభ ఆఫర్ కేవలం పరిమిత కాలం మాత్రమే అందుబాటులో ఉంటుందని, ఆ తర్వాత ధరలు పెరిగే అవకాశం ఉందని రివోల్ట్ యాజమాన్యం తెలిపింది.
కొత్త రివోల్ట్ ఆర్వీఎక్స్ బైక్ దేశవ్యాప్తంగా ఉన్న కంపెనీ 200 కంటే ఎక్కువ అధికారిక డీలర్షిప్ కేంద్రాల ద్వారా వినియోగదారులకు అమ్మకానికి అందుబాటులో ఉంటుంది. అయితే దేశ రాజధాని దిల్లీలో నివసించే కస్టమర్లకు ఈ బైక్ మరింత తక్కువ ధరకే లభించనుంది. ఢిల్లీ ప్రభుత్వం అమలు చేస్తున్న సరికొత్త ఎలక్ట్రిక్ వెహికల్ పాలసీ, అదనపు ప్రభుత్వ ప్రోత్సాహకాలు తోడుకావడంతో, అక్కడ ఈ బైక్ ఎక్స్-షోరూమ్ ధర కేవలం రూ.94,990 లకే లభిస్తుంది. తక్కువ బడ్జెట్లో మంచి లుక్ మరియు పర్ఫార్మెన్స్ ఉన్న ఎలక్ట్రిక్ బైక్ కొనాలనుకునే వారికి ఇది ఒక సువర్ణావకాశం అని చెప్పవచ్చు.
పర్ఫార్మెన్స్ పరంగా ఈ బైక్ వినియోగదారులకు సరికొత్త రైడింగ్ అనుభూతిని ఇస్తుంది. ఇందులో 4 కిలోవాట్ సామర్థ్యం గల మిడ్-డ్రైవ్ పర్మనెంట్ మాగ్నెట్ సింక్రోనస్ ఎలక్ట్రిక్ మోటార్ను ఉపయోగించారు. ఈ మోటార్ గరిష్టంగా 5.3 కిలోవాట్ పవర్, వీల్పై ఏకంగా 230Nm టాార్క్ను ఉత్పత్తి చేస్తుంది. దీనివల్ల ఈ బైక్ కేవలం 3.9 సెకన్ల స్వల్ప వ్యవధిలోనే 0 నుండి 40 కిలోమీటర్ల వేగాన్ని అందుకుంటుందని కంపెనీ గర్వంగా ప్రకటించింది. అంతేకాకుండా, ఈ బైక్లోని బూస్ట్ మోడ్ను ఆన్ చేయడం ద్వారా గరిష్టంగా గంటకు 90 కిలోమీటర్ల టాప్ స్పీడ్తో దూసుకుపోవచ్చు.
ఎలక్ట్రిక్ వాహనాలకు అత్యంత కీలకమైన బ్యాటరీ విషయంలో రివోల్ట్ సంస్థ అడ్వాన్స్డ్ టెక్నాలజీని వాడింది. ఈ బైక్లో 3.24kWh సామర్థ్యం కలిగిన రిమూవబుల్ ఎన్ఎమ్సీ బ్యాటరీని అమర్చారు. అంటే అవసరమైనప్పుడు ఈ బ్యాటరీని బైక్ నుండి సులభంగా బయటకు తీసి ఇంట్లోనే ఛార్జ్ చేసుకోవచ్చు. ఒకసారి పూర్తి ఛార్జ్ చేస్తే ఈ బైక్ ఐడీసీ సర్టిఫైడ్ ప్రకారం గరిష్టంగా 160 కిలోమీటర్ల రేంజ్ ఇస్తుంది. రోజూ ఆఫీసులకు, కాలేజీలకు లాంగ్ డిస్టెన్స్ ప్రయాణించే వారికి ఇది చాలా ప్రయోజనకరంగా ఉంటుంది. ఒకవేళ ఫాస్ట్ ఛార్జర్ను ఉపయోగిస్తే, కేవలం 80 నిమిషాల్లోనే బ్యాటరీ 0 నుండి 80 శాతం వరకు చార్జ్ అయిపోతుంది.
ఫీచర్ల పరంగా కూడా రివోల్ట్ ఆర్వీఎక్స్ బైక్ చాలా ఆధునికంగా ఉంటుంది. కస్టమర్ల డ్రైవింగ్ అవసరాలకు అనుగుణంగా ఇందులో బూస్ట్, స్పోర్ట్, సిటీ, ఎకో అనే నాలుగు విభిన్న రైడింగ్ మోడ్లను అందించారు. మెరుగైన ప్రయాణం కోసం అప్సైడ్-డౌన్ ఫ్రంట్ ఫోర్క్స్, వెనుక వైపు మోనో-షాక్ సస్పెన్షన్ను అమర్చారు. వీటన్నింటితో పాటు 3.5 ఇంచుల ఐపీ67 రేటింగ్ కలిగిన డిజిటల్ డిస్ప్లే, బ్లూటూత్ కనెక్టివిటీ, ఓవర్-ది-ఎయిర్ (OTA) అప్డేట్స్, జియో-ఫెన్సింగ్, హిల్ హోల్డ్ అసిస్ట్, రివర్స్ మోడ్, వాక్ అసిస్ట్, వెహికల్ లొకేటర్, కాల్-మెసేజ్ అలర్ట్స్, దొంగతనం కాకుండా రక్షించే ఇమ్మొబిలైజర్ వంటి ఎన్నో స్మార్ట్ సేఫ్టీ ఫీచర్లు ఈ బైక్ సొంతం.
