Car AC Tips : వర్షంలో కార్ డ్రైవింగ్ చేస్తున్నారా? ఏసీని ఈ మోడ్లో పెట్టకపోతే ప్రమాదమే
ఏసీని ఈ మోడ్లో పెట్టకపోతే ప్రమాదమే
Car AC Tips : దేశంలోని చాలా ప్రాంతాల్లో ప్రస్తుతం వర్షాలు మొదలవుతున్నాయి. ఎండ వేడిమి నుంచి ఉపశమనం లభించినప్పటికీ, కార్లు నడిపే వారికి మాత్రం వర్షాల వల్ల ఒక కొత్త సమస్య వచ్చి పడుతుంది. వర్షం పడే సమయంలో కార్ అద్దాల లోపలి భాగంలో దట్టంగా పొగమంచు పేరుకుపోతుంది. దీనివల్ల ముందు ప్రయాణించే వాహనాలు సరిగ్గా కనిపించక డ్రైవింగ్ చేయడం చాలా ప్రమాదకరంగా మారుతుంది. ఈ సమస్యను దూరం చేయడానికి చాలామంది వెంటనే కార్ ఏసీ ఆన్ చేస్తారు. కానీ, ఇక్కడే ఒక పెద్ద తప్పు జరుగుతోంది. దాదాపు 90 శాతం మంది వర్షం పడేటప్పుడు కార్ ఏసీని తప్పుడు మోడ్లో వాడుతున్నారని నిపుణులు చెబుతున్నారు.
అద్దాలపై పొగమంచు ఎందుకు పేరుకుపోతుంది?
వర్షం పడేటప్పుడు వాతావరణంలో తేమ శాతం విపరీతంగా పెరుగుతుంది. కార్ బయట చల్లగా ఉండి, కార్ లోపల ప్రయాణికులు ఉండడం వల్ల లోపలి ఉష్ణోగ్రత ఎక్కువగా ఉంటుంది. ఈ బయటి, లోపలి ఉష్ణోగ్రతల మధ్య తేడా రావడం వల్లే కార్ విండ్షీల్డ్, కిటికీ అద్దాలపై ఆవిరి లాంటి పొగమంచు పేరుకుపోతుంది. చాలామంది కేవలం కూలింగ్ మోడ్ ఆన్ చేసి వదిలేస్తారు. దీనివల్ల సమస్య తగ్గాల్సింది పోయి కొన్నిసార్లు మరింత ఎక్కువవుతుంది.
కార్ ఏసీలో మార్చాల్సిన అసలైన సెట్టింగ్ ఇదే
వర్షంలో అద్దాలు క్లియర్ అవ్వాలంటే మొదట మీరు చేయాల్సిన పని.. కార్ లోపల ఉండే రీసర్క్యులేషన్ మోడ్ను బంద్ చేయాలి. ఆ వెంటనే ఫ్రెష్ ఎయిర్ మోడ్ ను ఆన్ చేసుకోవాలి. ఈ ఫ్రెష్ ఎయిర్ మోడ్ ఆన్ చేయడం వల్ల కార్ బయట ఉండే గాలి లోపలికి వస్తుంది. దీనివల్ల కార్ లోపల, బయట ఉండే ఉష్ణోగ్రతలు బ్యాలెన్స్ అవుతాయి. ఉష్ణోగ్రత సమానంగా మారిన వెంటనే అద్దాలపై ఉన్న పొగమంచు అద్భుతంగా మాయమైపోతుంది. మీ కార్ డ్యాష్బోర్డ్పై బయటి నుంచి లోపలికి గాలి వస్తున్నట్లు ఉండే గుర్తు గల బటనే ఈ ఫ్రెష్ ఎయిర్ మోడ్.
డిఫాగర్ బటన్లను వాడడం మర్చిపోవద్దు
ఈ రోజుల్లో వచ్చే దాదాపు అన్ని కార్లలో ఫ్రంట్, రియర్ డిఫాగర్ ఆప్షన్లు ఉంటాయి. అద్దాలు ఎక్కువగా మసకబారినప్పుడు ఫ్రంట్ డిఫాగర్ ఆన్ చేయాలి. ఇది ఆన్ చేయగానే ఏసీ గాలి నేరుగా ముందు అద్దం వైపునకు బ్లో అవుతుంది. దీనివల్ల క్షణాల వ్యవధిలో ముందు అద్దం క్లీన్ అయిపోతుంది. అలాగే మీ కార్లో రియర్ డిఫాగర్ ఉంటే దాన్ని కూడా ఆన్ చేయండి. ఇది వెనుక అద్దాన్ని కొద్దిగా వేడి చేయడం ద్వారా అక్కడ పేరుకున్న తేమను తొలగిస్తుంది. దీనివల్ల వెనుక వచ్చే ట్రాఫిక్ మనకు సైడ్ మిర్రర్స్ లో స్పష్టంగా కనిపిస్తుంది.
ఎట్టిపరిస్థితుల్లోనూ ఈ తప్పు చేయకండి
వర్షం పడేటప్పుడు చాలామంది చేసే అతిపెద్ద తప్పు ఏంటంటే.. ఏసీ టెంపరేచర్ను చాలా తక్కువగా అంటే 16 లేదా 18 డిగ్రీల వద్ద సెట్ చేస్తారు. ఇలా చేయడం వల్ల కార్ లోపలి అద్దం విపరీతంగా చల్లబడి, బయట ఉన్న తేమ అద్దం వెలుపలి భాగంలో పేరుకుపోవడం స్టార్ట్ అవుతుంది. అప్పుడు వైపర్లు వేసినా లాభం ఉండదు. అందుకే వర్ష కాలంలో కార్ ఏసీ ఉష్ణోగ్రతను ఎప్పుడూ 22 నుంచి 24 డిగ్రీల సెల్సియస్ మధ్య ఉంచడం అత్యంత ఉత్తమం. ఈ సెట్టింగ్ వల్ల కార్ లోపల ఉక్కపోత ఉండదు, అలాగే అద్దాలపై పొగమంచు కూడా అస్సలు పేరుకుపోదు.
