Sedan Sales : సెడాన్ మార్కెట్‌లో ఊహించని జోష్.. మారుతి నుంచి స్కోడా వరకు పెరిగిన అమ్మకాలు

Sedan Sales : భారత మార్కెట్‌లో ఎస్‌యూవీ కార్లకు డిమాండ్ నిరంతరం పెరుగుతుంది. అయినా సెడాన్ కార్ల మ్యాజిక్ ఇంకా తగ్గలేదు. కంఫర్ట్, ప్రీమియం ఫీచర్లు, స్మూత్ డ్రైవింగ్‌కు ప్రాధాన్యత ఇచ్చే కస్టమర్లు ఇప్పటికీ సెడాన్ కొనడానికి ఇష్టపడుతున్నారు. సెప్టెంబర్ 2025లో మారుతి సుజుకి, హ్యుందాయ్, హోండా, వోక్స్‌వ్యాగన్, స్కోడా వంటి కంపెనీలు సెడాన్ సెగ్మెంట్‌లో అద్భుతమైన పనితీరు కనబరిచాయి. ఈ సమయంలో మారుతి సుజుకి డిజైర్ మరోసారి భారతీయ కస్టమర్ల ఫస్ట్ ఆప్షన్ గా మారింది.

సెడాన్ సెగ్మెంట్‌కు రారాజు మారుతి సుజుకి డిజైర్

సెప్టెంబర్ 2025లో మారుతి సుజుకి డిజైర్ సెడాన్ విభాగంలో అద్భుతమైన వృద్ధిని సాధించింది. కంపెనీ గత నెలలో 20,038 యూనిట్లను విక్రయించింది. గత సంవత్సరం సెప్టెంబర్‌లో కేవలం 10,853 యూనిట్లు మాత్రమే అమ్ముడవగా, ఈసారి అమ్మకాల్లో దాదాపు 85% భారీ పెరుగుదల నమోదైంది. డిజైర్ కారు ప్రారంభ ధర రూ.6.25 లక్షలు (ఎక్స్-షోరూమ్). వైర్‌లెస్ ఆపిల్ కార్‌ప్లే/ఆండ్రాయిడ్ ఆటో, 9-అంగుళాల టచ్‌స్క్రీన్, వైర్‌లెస్ ఛార్జర్, సన్‌రూఫ్, 360° కెమెరా, 6 ఎయిర్‌బ్యాగ్‌లు వంటి ప్రీమియం ఫీచర్ల కారణంగా ఈ కారు తన విభాగంలో అత్యంత ప్రజాదరణ పొందింది.

బడ్జెట్ సెగ్మెంట్‌లో హ్యుందాయ్ ఆరా, హోండా అమేజ్

హ్యుందాయ్ ఆరా రెండవ స్థానంలో నిలిచింది. ఇది బడ్జెట్ కస్టమర్ల మొదటి ఎంపికగా స్థిరంగా కొనసాగుతోంది. సెప్టెంబర్ 2025లో ఈ కారు 5,387 యూనిట్లు అమ్ముడయ్యాయి. ఇది గత సంవత్సరం కంటే 21% ఎక్కువ. ఆరాను ముఖ్యంగా దాని సీఎన్‌జీ వేరియంట్, లో మెయింటెనెన్స్ కాస్ట్, కాంపాక్ట్ డిజైన్ కారణంగా వినియోగదారులు ఇష్టపడుతున్నారు. కంపెనీ ఇందులో వైర్‌లెస్ కనెక్టివిటీ, సేఫ్టీ ఫీచర్లను కూడా అప్‌డేట్ చేసింది. ఇక, హోండా అమేజ్ మూడవ స్థానంలో నిలిచింది. ఇది దాని క్వాలిటీ, డ్రైవింగ్ సౌలభ్యం కోసం పాపులారిటీ సంపాదించుకుంది. సెప్టెంబర్‌లో 2,610 యూనిట్లు అమ్ముడయ్యాయి. అయితే గత సంవత్సరం కంటే అమ్మకాలు కొద్దిగా తగ్గాయి (2,820 యూనిట్లు). అయినప్పటికీ, అమేజ్ దాని స్ట్రాంగ్ బిల్డ్ క్వాలిటీ, స్మూత్ పర్ఫామెన్స్ కారణంగా నమ్మకమైన సెడాన్‌గా నిలిచింది.

ప్రీమియం సెడాన్‌ల మార్కెట్

వోక్స్‌వ్యాగన్ వర్టస్ సెప్టెంబర్ 2025లో 1,648 యూనిట్ల అమ్మకాలతో నాల్గవ స్థానంలో ఉంది. యూరోపియన్ స్టైల్, పవర్ఫుల్ ఇంజిన్, స్ట్రాంగ్ బిల్డ్ క్వాలిటీ కోరుకునే కస్టమర్లకు వర్టస్ ఫస్ట్ ఛాయిస్. దాని టర్బోచార్జ్డ్ ఇంజిన్, స్టైలిష్ డిజైన్ దీన్ని ప్రత్యేకంగా నిలబెడతాయి. స్కోడా స్లావియా అమ్మకాల్లో స్వల్ప తగ్గుదల ఉన్నప్పటికీ, 1,339 యూనిట్ల విక్రయంతో టాప్-5 జాబితాలో తన స్థానాన్ని నిలబెట్టుకుంది. స్లావియా దాని ప్రీమియం రైడ్ క్వాలిటీ, అడ్వాన్సుడ్ సేఫ్టీ ఫీచర్లు, టర్బో ఇంజిన్ కారణంగా కస్టమర్ల దృష్టిని ఆకర్షిస్తోంది.

ఇతర మోడల్స్ అమ్మకాలు

టాప్-5 జాబితా వెలుపల, కొన్ని సెడాన్ కార్లు కూడా మంచి పనితీరును కనబరిచాయి. టాటా టిగోర్ 966 యూనిట్లు, హ్యుందాయ్ వెర్నా 725 యూనిట్లు, హోండా సిటీ 496 యూనిట్లు, టయోటా కామ్రీ 137 యూనిట్లు అమ్ముడయ్యాయి. సెప్టెంబర్ 2025 అమ్మకాల నివేదిక ప్రకారం.. ఎస్‌యూవీ ట్రెండ్ ఉన్నప్పటికీ మారుతి సుజుకి డిజైర్ భారతీయ వినియోగదారుల మొదటి ఎంపికగా ఉంది.