Skoda : స్కోడా కైలాక్ మ్యాజిక్..ఒక్క కారుతో 25 ఏళ్ల రికార్డులు మటాష్

Skoda : యూరోపియన్ కార్ల తయారీ దిగ్గజం స్కోడా ఆటో ఇండియా భారత మార్కెట్లో సరికొత్త సంచలనం సృష్టించింది. 2025 ఏడాదిలో ఆ కంపెనీ నమోదు చేసిన అమ్మకాలు చూస్తుంటే ఆటోమొబైల్ నిపుణులు సైతం ఆశ్చర్యపోతున్నారు. గడిచిన 25 ఏళ్లలో ఎన్నడూ లేని విధంగా అత్యధిక విక్రయాలను సాధించి స్కోడా తన సత్తా చాటింది. 2024లో కేవలం 35,166 కార్లు మాత్రమే అమ్మిన ఈ కంపెనీ, 2025 ముగిసేసరికి ఏకంగా 72,665 కార్లను విక్రయించింది. అంటే కేవలం ఏడాది కాలంలోనే అమ్మకాలు ఏకంగా 107 శాతం పెరగడం ఒక అరుదైన రికార్డు.

స్కోడా సాధించిన ఈ చారిత్రాత్మక విజయానికి ప్రధాన కారణం వారి సరికొత్త సబ్-4 మీటర్ ఎస్‌యూవీ కైలాక్. ఈ కారు మార్కెట్లోకి వచ్చినప్పటి నుంచి స్కోడా షోరూమ్‌లు కస్టమర్లతో కిక్కిరిసిపోతున్నాయి. 2025లో కంపెనీ అమ్మిన మొత్తం కార్లలో దాదాపు 65 శాతం వాటా కేవలం కైలాక్ కారుదే కావడం విశేషం. అతి తక్కువ ధరలోనే యూరోపియన్ టెక్నాలజీ, అదిరిపోయే సేఫ్టీ, ప్రీమియం ఫీచర్లు అందించడంతో భారతీయ వినియోగదారులు ఈ కారును బ్రహ్మరథం పట్టారు. దీని ధర సుమారు రూ.7.55 లక్షల (ఎక్స్-షోరూమ్) నుంచి ప్రారంభమవ్వడం కూడా ప్లస్ పాయింట్ అయ్యింది.

భారతదేశంలో స్కోడా అడుగుపెట్టి 25 ఏళ్లు పూర్తయిన సందర్భంగా, ఈ రికార్డు స్థాయి అమ్మకాలు కంపెనీకి మరింత ఉత్సాహాన్ని ఇస్తున్నాయి. స్కోడా ఆటో ఇండియా బ్రాండ్ డైరెక్టర్ ఆశిష్ గుప్తా మాట్లాడుతూ.. "2025 ఏడాది మా ప్రయాణంలో ఒక మైలురాయిగా నిలిచిపోతుంది. కైలాక్ వంటి మేడ్-ఇన్-ఇండియా మోడళ్ల వల్ల మేము టైర్-2, టైర్-3 నగరాలకు కూడా చేరుకోగలిగాము" అని ఆనందం వ్యక్తం చేశారు. ప్రస్తుతం స్కోడాకు దేశవ్యాప్తంగా 183 నగరాల్లో 325కు పైగా టచ్‌పాయింట్లు ఉన్నాయి.

స్కోడా కైలాక్ లో 1.0 లీటర్ టర్బో పెట్రోల్ ఇంజిన్ ఉంది, ఇది 114 bhp పవర్, 178 Nm టార్క్ ఇస్తుంది. ఇది కారుకు మంచి పికప్, వేగాన్ని అందిస్తుంది. అంతేకాకుండా, భారత్ ఎన్‌క్యాప్ క్రాష్ టెస్టులో 5-స్టార్ సేఫ్టీ రేటింగ్ సాధించడం ఈ కారుకు తిరుగులేని క్రేజ్ తెచ్చిపెట్టింది. లోపల 10 ఇంచుల ఇన్ఫోటైన్‌మెంట్ సిస్టమ్, వెంటిలేటెడ్ సీట్లు, 6 ఎయిర్‌బ్యాగ్‌లు వంటి ఫీచర్లు ఈ బడ్జెట్ ఎస్‌యూవీలో ఉండటం విశేషం. కైలాక్ తో పాటు స్లావియా, కుషాక్, లగ్జరీ ఎస్‌యూవీ కోడియాక్ కూడా మంచి అమ్మకాలను నమోదు చేశాయి.

2025 రికార్డులతో జోరు మీదున్న స్కోడా, 2026లో మరిన్ని సంచలనాలకు సిద్ధమవుతోంది. త్వరలోనే కుషాక్, స్లావియా ఫేస్‌లిఫ్ట్ వెర్షన్లను లాంచ్ చేయబోతున్నారు. అంతేకాకుండా, ఎలక్ట్రిక్ కార్ల విభాగంలోకి కూడా భారీగా అడుగుపెట్టేందుకు ఎల్రోక్ అనే ఈవీని సిద్ధం చేస్తోంది. సేల్స్ తో పాటు ఆఫ్టర్-సేల్స్ సర్వీస్ ఖర్చులను కూడా తగ్గించడం ద్వారా కస్టమర్ల నమ్మకాన్ని మరింత పెంచుకోవాలని కంపెనీ భావిస్తోంది.