Skoda Kylaq : రూ.7.55 లక్షలకే ఇంటర్నేషనల్ బ్రాండ్ కారు..11 నెలల్లో 43,000 యూనిట్స్ సేల్

Skoda Kylaq :స్కోడా ఇండియా కాంపాక్ట్ ఎస్‌యూవీ అయిన కైలాక్ లాంచ్ అయిన 11 నెలల్లోనే అద్భుతమైన అమ్మకాలతో దూసుకుపోతోంది. SIAM గణాంకాల ప్రకారం.. జనవరి నుంచి నవంబర్ 2025 మధ్య కాలంలో స్కోడా ఇండియా దేశవ్యాప్తంగా డీలర్లకు మొత్తం 43,204 యూనిట్లను పంపింది. GST తగ్గింపుల వల్ల ప్రయోజనం పొందిన కాంపాక్ట్ ఎస్‌యూవీ సెగ్మెంట్‌లో కైలాక్ విజయం సాధించింది. ఈ విభాగంలో 20కి పైగా మోడళ్లు ఉన్నప్పటికీ మొత్తం యుటిలిటీ వెహికల్ అమ్మకాల్లో దాదాపు 48% వాటాతో కాంపాక్ట్ ఎస్‌యూవీలే కీలక పాత్ర పోషిస్తున్నాయి.

వేగంగా అభివృద్ధి చెందుతున్న కాంపాక్ట్ ఎస్‌యూవీ మార్కెట్‌లో ప్రవేశించిన స్కోడా కైలాక్‌కు కస్టమర్ల నుంచి అద్భుత స్పందన లభించింది. ఫిబ్రవరి 2025 నుంచి ఈ కారు కంపెనీ అత్యధికంగా అమ్ముడవుతున్న స్థానికంగా తయారైన వాహనంగా నిలిచింది. ఇది స్లావియా సెడాన్, కుషాక్ ఎస్‌యూవీలను కూడా అమ్మకాలలో అధిగమించింది. 11 నెలల్లో కైలాక్ మొత్తం అమ్మకాలు (43,204 యూనిట్లు) స్కోడా మొత్తం కార్ల అమ్మకాల్లో 64% వాటాను కలిగి ఉన్నాయి. ఏప్రిల్ 2025 లో 5,364 యూనిట్లతో కైలాక్ అత్యధిక నెలవారీ అమ్మకాలను నమోదు చేసింది.

స్కోడా కైలాక్ బేస్ మోడల్ ధర రూ.7.55 లక్షలు (ఎక్స్-షోరూమ్) నుంచి ప్రారంభమై, టాప్ మోడల్ ధర రూ.12.80 లక్షల వరకు ఉంటుంది. ఇది మొత్తం 7 వేరియంట్లలో లభిస్తుంది. కైలాక్‌లో ఉన్న 1.0-లీటర్ టర్బో పెట్రోల్ ఇంజన్ కారణంగా, ఇది రోడ్లపై అత్యంత సరదాగా నడపగలిగే కాంపాక్ట్ ఎస్‌యూవీలలో ఒకటిగా పేరు పొందింది. స్కోడా బ్రాండ్‌కు తగ్గట్టుగా దీని డిజైన్, క్వాలిటీ చాలా బాగున్నాయి. ముఖ్యంగా దీని విశాలమైన, ఫీచర్లతో నిండిన క్యాబిన్ అదనపు ఆకర్షణ. కైలాక్ ఇటీవల BNCAP క్రాష్ టెస్ట్‌లో 5-స్టార్ సేఫ్టీ రేటింగ్‌ను కూడా సాధించింది.