Tata Motors: పండగ వేళ టాటా మోటార్స్ షాక్: అక్టోబర్ 1 నుంచి కమర్షియల్ వాహనాల ధరల పెంపు!

Tata Motors: వచ్చే పండుగల సీజన్‌కు ముందు వాహన కొనుగోలుదారులకు టాటా మోటార్స్ సంస్థ గట్టి షాకిచ్చింది. దేశీయ దిగ్గజ ఆటోమొబైల్ తయారీ సంస్థ అయిన టాటా మోటార్స్ కమర్షియల్ వాహనాల ధరలను మరోసారి పెంచుతున్నట్లు అధికారికంగా ప్రకటించింది. వచ్చే అక్టోబర్ 1, 2026 నుంచి ట్రక్కులు, బస్సులు, మినీ ట్రక్కులు, పికప్‎లు, ఇతర అన్ని రకాల కమర్షియల్ వాహనాల ధరలను 1 శాతం వరకు పెంచనున్నట్లు వెల్లడించింది. అయితే ఈ ధరల పెంపు అనేది ప్రతి మోడల్ మరియు వేరియంట్‌పై ఒకేలా ఉండదని, కారు లేదా ట్రక్కు రకాన్ని బట్టి మారుతుందని కంపెనీ స్పష్టం చేసింది. ఈ నిర్ణయంతో ట్రాన్స్‌పోర్టర్లు, చిన్న వ్యాపారులు, ఫ్లీట్ ఆపరేటర్లపై అదనపు భారం పడనుంది.

కమర్షియల్ వాహనాల తయారీకి ఉపయోగించే రగ్‌డ్ మెటీరియల్స్, ముడి సరుకులు, ఇతర కమొడిటీల ధరలు విపరీతంగా పెరిగిపోవడంతోనే ఈ నిర్ణయం తీసుకోవాల్సి వచ్చిందని టాటా మోటార్స్ తెలిపింది. పెరుగుతున్న ఇన్‌పుట్ కాస్ట్ భారాన్ని తట్టుకునేందుకే ఈ ధరల సవరణ చేపట్టినట్లు కంపెనీ వివరించింది. గమనించదగ్గ విషయం ఏమిటంటే.. ప్రస్తుత 2026 సంవత్సరంలో టాటా మోటార్స్ కమర్షియల్ వాహనాల ధరలను పెంచడం ఇది మూడోసారి కావడం గమనార్హం. ఇప్పటికే ఈ ఏడాది ఏప్రిల్ 1న 1.5 శాతం వరకు, జూలై 1న 2.5 శాతం వరకు ధరలను పెంచిన విషయం తెలిసిందే.

వాళ్లపై ధరల ప్రభావం ఎంత ఉంటుంది?

ఉదాహరణకు ఒక కమర్షియల్ వాహనం ఎక్స్-షోరూమ్ ధర రూ. 10 లక్షలు అనుకుంటే, 1 శాతం పెంపు ప్రకారం దాదాపు రూ. 10,000 వరకు అదనంగా చెల్లించాల్సి ఉంటుంది. ఒకవేళ రూ. 20 లక్షల విలువైన ట్రక్ అయితే సుమారు రూ. 20,000, రూ. 40 లక్షల వాహనంపై దాదాపు రూ. 40,000 వరకు భారం పడే అవకాశం ఉంది. అయితే ఇది కేవలం అంచనా మాత్రమేనని, మోడల్, వేరియంట్‌ను బట్టి అసలు ధరల్లో మార్పులు ఉంటాయని నిపుణులు చెబుతున్నారు. అంతేకాకుండా ఇన్సూరెన్స్, రోడ్ టాక్స్, రిజిస్ట్రేషన్ ఛార్జీలను బట్టి ఆన్-రోడ్ ధరలు మరింత మారవచ్చు. కాబట్టి కొత్త వాహనం కొనేముందు షోరూమ్ డీలర్లను సంప్రదించి అప్‌డేటెడ్ ధరలను తెలుసుకోవడం మంచిది.