Tata Punch : బడ్జెట్ కారులో 5-స్టార్ సేఫ్టీ..టాటా పంచ్ కొంటే ఎంత ఆదా చేయొచ్చో తెలుసా?

Tata Punch : భారతీయ మార్కెట్‌లో 5-సీటర్ బడ్జెట్ కార్ల విభాగంలో టాటా పంచ్ తనకంటూ ఒక ప్రత్యేక స్థానాన్ని సంపాదించుకుంది. ఈ కారు ఏకంగా 31 వేరియంట్లలో అందుబాటులో ఉంది. తాజాగా భారత ప్రభుత్వం సెప్టెంబర్ 22, 2025 నుంచి జీఎస్‌టీ 2.0ని అమలులోకి తీసుకురావడంతో టాటా పంచ్ ధరలు భారీగా తగ్గాయి. గతంలో రూ.6 లక్షలపైన ఉన్న ఈ కారు ఎక్స్-షోరూమ్ ధర, ఇప్పుడు కేవలం రూ.5.50 లక్షల నుండే ప్రారంభమవుతోంది. జీఎస్‌టీ కోత తర్వాత ఈ కారు ప్రారంభ ధరలోనే సుమారు రూ.70,000 వరకు తగ్గింపు లభించడం కొనుగోలుదారులకు పెద్ద ఊరట.

జీఎస్‌టీ స్లాబ్‌లో మార్పులు రావడం వల్ల టాటా పంచ్ పెట్రోల్ మోడళ్ల ధరలు గణనీయంగా తగ్గాయి. ఈ తగ్గింపు ముఖ్యంగా టాప్ వేరియంట్‌లో లక్ష రూపాయలకు పైగా ఉంది. టాటా పంచ్ బేస్ మోడల్ ధరలో రూ.70,000 వరకు తగ్గుదల కనిపించింది. పంచ్ అత్యంత ఖరీదైన మోడల్ అయిన క్రియేటివ్ +S AMT CAMO వేరియంట్‌లో అత్యధిక తగ్గింపు లభించింది. ఈ మోడల్ పాత ఎక్స్-షోరూమ్ ధర రూ.10,31,990 ఉండగా, కొత్త జీఎస్‌టీ రేట్ల తర్వాత దీని ధర రూ.9,24,090కి చేరింది. అంటే ఈ ఒక్క వేరియంట్‌లో కొనుగోలుదారులకు ఏకంగా రూ.1,07,900 ఆదా అవుతోంది.

పెట్రోల్ వేరియంట్లతో పాటు టాటా పంచ్ సీఎన్‌జీ మోడళ్ల ధరలు కూడా తగ్గాయి. సీఎన్‌జీ బేస్ మోడల్ ఎక్స్-షోరూమ్ ధరలో రూ.69,100 తగ్గింపు వచ్చింది. పాత ధర రూ.8,11,990 ఉండగా, ఇప్పుడు ఇది రూ.7,42,890కి చేరింది. సీఎన్‌జీ టాప్ మోడల్ టాప్ వేరియంట్ ధరలో రూ.86,600 తగ్గింపు లభించింది. పాత ఎక్స్-షోరూమ్ ధర రూ.10,16,990 కాగా, కొత్త ధర రూ.9,30,390గా ఉంది.

ధర తగ్గినప్పటికీ, టాటా పంచ్ తన పవర్, భద్రత విషయంలో రాజీ పడలేదు. ఈ కారులో 1.2-లీటర్ డైనాప్రో టెక్నాలజీ ఇంజిన్ అమర్చబడింది. ఈ ఇంజిన్ 6,000 rpm వద్ద 87.8 PS శక్తిని, 3,150-3,350 rpm వద్ద 115 Nm టార్క్‌ను ఉత్పత్తి చేస్తుంది. ఇది మ్యాన్యువల్, ఆటోమేటిక్ రెండు ట్రాన్స్‌మిషన్ ఆప్షన్లలో లభిస్తుంది. సేఫ్టీకి అత్యధిక ప్రాధాన్యత ఇస్తూ టాటా పంచ్ గ్లోబల్ NCAP ద్వారా అత్యధికమైన 5-స్టార్ సేఫ్టీ రేటింగ్‌ను కలిగి ఉంది. అయితే ఈ కారు ఏ వేరియంట్‌లో కూడా సన్‌రూఫ్ ఫీచర్ అందుబాటులో లేదనే విషయాన్ని గమనించాలి.