Tata Sierra EV : రెట్రో లుక్.. మోడ్రన్ టెక్నాలజీ.. టాటా సియెర్రా ఈవీ ఫీచర్లు చూస్తే మైండ్ బ్లాక్ అవ్వాల్సిందే
టాటా సియెర్రా ఈవీ ఫీచర్లు చూస్తే మైండ్ బ్లాక్ అవ్వాల్సిందే
Tata Sierra EV : భారతీయ ఆటోమొబైల్ దిగ్గజం టాటా మోటార్స్ తన ఐకానిక్ బ్రాండ్ సియెర్రాను ఎలక్ట్రిక్ అవతారంలో తిరిగి తీసుకువస్తోంది. ఎప్పుడెప్పుడా అని ఎదురుచూస్తున్న టాటా సియెర్రా ఈవీ లాంచ్ తేదీపై ఎట్టకేలకు స్పష్టత వచ్చింది. 2027 ఆర్థిక సంవత్సరం మొదటి త్రైమాసికంలో, అంటే ఏప్రిల్, జూన్ 2026 మధ్యలో ఈ పవర్ఫుల్ ఎలక్ట్రిక్ ఎస్యూవీ మార్కెట్లోకి అడుగుపెట్టనుంది. ఇప్పటికే పలుమార్లు రోడ్లపై టెస్టింగ్ చేస్తూ కనిపించిన ఈ కారు, ఎలక్ట్రిక్ వాహన ప్రియులలో భారీ అంచనాలను పెంచేసింది.
స్కేట్బోర్డ్ ప్లాట్ఫారమ్
టాటా సియెర్రా ఈవీ కంపెనీ అత్యాధునిక Acti.ev+ ఆర్కిటెక్చర్పై ఆధారపడి నిర్మించబడింది. ఇది ఒక స్కేట్బోర్డ్ ప్లాట్ఫారమ్ కావడంతో, వివిధ రకాల బ్యాటరీ సైజులు, డ్రైవ్ట్రెయిన్ లేఅవుట్లకు ఇది సపోర్ట్ చేస్తుంది. ఈ కారు తయారీలో టాటా హారియర్ ఈవీకి సంబంధించిన అనేక భాగాలను కూడా వాడనున్నారు. దీనివల్ల వినియోగదారులకు మరింత నమ్మకమైన, పవర్ఫుల్ ఎలక్ట్రిక్ ఎస్యూవీ అనుభవం కలగనుంది. ఇది సింగిల్-మోటార్ రియర్-వీల్-డ్రైవ్, డ్యూయల్-మోటార్ ఆల్-వీల్-డ్రైవ్ అనే రెండు కాన్ఫిగరేషన్లలో అందుబాటులోకి రానుంది.
రేంజ్, బ్యాటరీ సామర్థ్యం
బ్యాటరీ విషయానికి వస్తే, ఇందులో రెండు ఆప్షన్లు ఉండే అవకాశం ఉంది. ఒకటి టాటా కర్వ్ ఈవీలో వాడే 55 కిలోవాట్-అవర్ బ్యాటరీ కాగా, రెండోది హారియర్ ఈవీ నుంచి తీసుకున్న భారీ 65 కిలోవాట్-అవర్ బ్యాటరీ. ఈ పెద్ద బ్యాటరీ సాయంతో ఒక్కసారి ఛార్జ్ చేస్తే 500 కిలోమీటర్ల కంటే ఎక్కువ రేంజ్ ఇస్తుందని అంచనా. ఫాస్ట్ ఛార్జింగ్ సపోర్ట్తో పాటు వెహికల్-టు-లోడ్ (V2L), వెహికల్-టు-వెహికల్ (V2V) ఛార్జింగ్ ఫీచర్లు కూడా ఇందులో ఉండబోతున్నాయి. అంటే మీ కారు ద్వారా వేరే ఎలక్ట్రిక్ వస్తువులను కూడా ఛార్జ్ చేసుకోవచ్చు.
డిజైన్, స్టైలింగ్
పాత సియెర్రా క్లాసిక్ లుక్ను మరిపించేలా, సరికొత్త ఆధునిక హంగులతో దీనిని డిజైన్ చేశారు. ఇందులో క్లోజ్డ్ గ్రిల్, పూర్తి వెడల్పు ఉండే ఎల్ఈడీ డీఆర్ఎల్, స్ప్లిట్ హెడ్ల్యాంప్ సెటప్ ఉండబోతున్నాయి. ఫ్లష్ డోర్ హ్యాండిల్స్, సరికొత్త అలాయ్ వీల్స్, కండలు తిరిగిన వీల్ ఆర్చ్లు దీనికి గంభీరమైన రూపాన్ని ఇస్తాయి. వెనుక భాగంలో కనెక్టెడ్ ఎల్ఈడీ లైట్ బార్ కారుకు మరింత ప్రీమియం లుక్ను జోడిస్తుంది.
ఫీచర్లు, ధర
కారు లోపలి భాగం (కేబిన్) మూడు స్క్రీన్ల లేఅవుట్తో చాలా హైటెక్ గా ఉండబోతోంది. డిజిటల్ ఇన్స్ట్రుమెంట్ క్లస్టర్, భారీ సెంట్రల్ ఇన్ఫోటైన్మెంట్ సిస్టమ్, ప్రయాణికుల కోసం ప్రత్యేక డిస్ప్లే ఇందులో ఉంటాయి. అదనంగా లెవల్ 2 ADAS (అడ్వాన్స్డ్ డ్రైవర్ అసిస్టెన్స్ సిస్టమ్), 360-డిగ్రీ కెమెరా, పనోరమిక్ సన్రూఫ్, వెంటిలేటెడ్ సీట్లు, పవర్డ్ టెయిల్గేట్ వంటి లగ్జరీ ఫీచర్లు కూడా ఉండనున్నాయి. దీని ప్రారంభ ధర ఎక్స్-షోరూమ్ వద్ద సుమారు రూ.18 లక్షలుగా ఉండే అవకాశం ఉంది.
