Tata Sierra : 24 గంటల్లోనే 70 వేల బుకింగ్స్..టాటా సియెర్రా కస్టమర్లకు డెలివరీ ఎప్పటి నుంచంటే?

Tata Sierra :భారతదేశంలో అత్యంత ఆసక్తిగా ఎదురుచూస్తున్న ఎస్‌యూవీలలో ఒకటైన టాటా సియెర్రా ఇప్పుడు దేశవ్యాప్తంగా ఉన్న ప్రధాన డీలర్‌షిప్‌లకు చేరుకోవడం ప్రారంభించింది. దీనితో కస్టమర్‌లకు ఈ వాహనాన్ని దగ్గరగా చూసి, టెస్ట్ డ్రైవ్ చేయడానికి అవకాశం లభిస్తుంది. కంపెనీ అధికారికంగా 2026 జనవరి 15 నుంచి దీని డెలివరీలను ప్రారంభిస్తుంది. లాంచ్ కంటే ముందే ఈ ఎస్‌యూవీ బుకింగ్‌ల విషయంలో రికార్డు సృష్టించింది. బుకింగ్‌లు ప్రారంభించిన కేవలం 24 గంటల్లోనే 70,000 కంటే ఎక్కువ కన్ఫర్మ్ బుకింగ్‌లు, 1.35 లక్షల కస్టమర్ కాన్ఫిగరేషన్‌లు నమోదయ్యాయి.

టాటా సియెర్రా డిజైన్ పాత సియెర్రా బాక్సీ, మస్కులర్ లుక్ ఆధునిక టచ్‌తో అందిస్తుంది. ముందు భాగంలో గ్లాస్-బ్లాక్ ఫినిషింగ్‌తో కూడిన ఎల్‌ఈడీ హెడ్‌ల్యాంప్‌లు, డీఆర్‌ఎల్‌లు టాటా లోగో, సియెర్రా బ్యాడ్జ్‌తో కలుస్తాయి. నిటారుగా ఉండే స్టాన్స్ దీనికి రోడ్డుపై బలమైన, క్లాసిక్ ఉనికిని ఇస్తుంది. ఇంటీరియర్ చాలా లగ్జరీగా డిజైన్ చేయబడింది. ఇందులో డ్రైవర్ కోసం ఒకటి, ఇన్ఫోటైన్‌మెంట్ కోసం రెండు చొప్పున మొత్తం మూడు డిస్‌ప్లేలు ఉంటాయి. 12 స్పీకర్ల జేబీఎల్ సౌండ్ సిస్టమ్, భారతదేశంలోనే అతిపెద్ద పానోరమిక్ సన్‌రూఫ్, డ్యూయల్-జోన్ క్లైమేట్ కంట్రోల్, వెంటిలేటెడ్ పవర్ సీట్లు, వైర్‌లెస్ ఛార్జింగ్ వంటి ప్రీమియం ఫీచర్లు ఇందులో ఉన్నాయి.

సియెర్రా వివిధ పవర్‌ట్రైన్ ఎంపికలతో మార్కెట్లోకి వస్తోంది. ఇందులో పెట్రోల్, డీజిల్ ఇంజన్ ఆప్షన్లు అందుబాటులో ఉన్నాయి. 1.5-లీటర్ టర్బోచార్జ్డ్ ఇంజన్ (160 hp, 255 Nm) 6-స్పీడ్ ఆటోమేటిక్‌తో, అలాగే 1.5-లీటర్ నాచురల్లీ ఆస్పిరేటెడ్ ఇంజన్ (106 hp, 145 Nm) మాన్యువల్/DCT తో లభిస్తుంది. 1.5-లీటర్ డీజిల్ ఇంజన్ (118 hp, 260-280 Nm) మాన్యువల్ లేదా ఆటోమేటిక్ ట్రాన్స్‌మిషన్‌తో వస్తుంది. టాటా సియెర్రా ప్రారంభ ఎక్స్-షోరూమ్ ధర రూ.11.49 లక్షల నుంచి మొదలవుతుంది.