Toyota : రూ.23.60 లక్షలకే టయోటా ఎబెల్లా లాంచ్.. సింగిల్ చార్జ్‌తో 543 కిమీల రేంజ్, లెవెల్-2 అడాస్

Toyota : భారతదేశంలో నమ్మకానికి, మన్నికకు కేరాఫ్ అడ్రస్‌గా నిలిచే ప్రముఖ జపనీస్ ఆటోమొబైల్ దిగ్గజం టయోటా కిర్లోస్కర్ మోటార్.. ఎట్టకేలకు దేశీయ ఎలక్ట్రిక్ వాహన మార్కెట్లోకి అధికారికంగా తన మొదటి సరికొత్త సంచలనానికి తెరలేపింది. టయోటా బ్రాండ్ నుంచి వస్తోన్న మొట్టమొదటి పూర్తి స్థాయి ఎలక్ట్రిక్ కారు టయోటా అర్బన్ క్రూయిజర్ అబెల్లా ఈరోజు భారత మార్కెట్లో గ్రాండ్‌గా లాంచ్ అయింది. ఈ లగ్జరీ ఈ-ఎస్‌యూవీ టాప్-ఎండ్ వెర్షన్ ప్రారంభ ఎక్స్-షోరూమ్ ధరను రూ.23.60 లక్షలుగా కంపెనీ నిర్ణయించింది.

నిజానికి, ఈ కారు మారుతి సుజుకికి చెందిన అప్ కమింగ్ ఎలక్ట్రిక్ కారు ఈ-విటారాకు రీబ్యాజ్డ్ వెర్షన్. అంటే ఇరు కంపెనీల భాగస్వామ్యంలో భాగంగా ఒకే ప్లాట్‌ఫారమ్‌పై ఇది తయారైంది. మార్కెట్లో ఇది నేరుగా హ్యుందాయ్ క్రెటా ఈవీ, ఎంజీ జెడ్ఎస్ ఈవీ, టాటా కర్వ్ ఈవీ వంటి పాపులర్ మోడళ్లకు మైండ్ బ్లాకింగ్ పోటీ ఇవ్వనుంది. ప్రస్తుతానికి కంపెనీ కేవలం టాప్ వేరియంట్ ధరలను మాత్రమే ప్రకటించగా, మిగిలిన బేస్ వేరియంట్ల ధరలు త్వరలోనే వెల్లడి కానున్నాయి.

డిజైన్ పరంగా టయోటా ఎబెల్లా తన ఇంటర్నేషనల్ స్టైలింగ్ థీమ్‌తో రోడ్డుపై నెక్స్ట్ లెవెల్ లుక్‌ను ఇస్తుంది. దీని ముందు భాగంలో స్టైలిష్ హ్యామర్‌హెడ్ గ్రిల్, అధునాతన ఎల్ఈడీ హెడ్‌లైట్లు, ఆకర్షణీయమైన క్యారెక్టర్ లైన్స్‌తో కూడిన పవర్‌ఫుల్ బోనెట్ ఉన్నాయి. దీని కొలతల విషయానికి వస్తే, ఈ ఎస్‌యూవీ 4,285 మిమీ పొడవు, 1,800 మిమీ వెడల్పు, 1,640 మిమీ ఎత్తు, ఏకంగా 2,700 మిమీల భారీ వీల్‌బేస్‌ను కలిగి ఉంది. కస్టమర్ల కోసం దీనిని కెఫే వైట్, బ్లూయిష్ బ్లాక్, గేమింగ్ గ్రే, స్పోర్టిన్ రెడ్, ఎంటైసింగ్ సిల్వర్ వంటి 5 మోనోటోన్ కలర్స్‌తో పాటు, బ్లాక్ రూఫ్‌తో కూడిన 4 అద్భుతమైన డ్యూయల్-టోన్ రంగుల్లో కూడా అందిస్తున్నారు.

కారు లోపలి భాగం అల్ట్రా లగ్జరీ బ్లాక్ అండ్ బ్రౌన్ డ్యూయల్-టోన్ థీమ్‌తో మెరిసిపోతోంది. ఇందులో ప్రయాణీకులకు విలాసవంతమైన ఫీలింగ్ ఇచ్చేలా తలపై ఆకాశం కనిపించే పనోరమిక్ సన్‌రూఫ్, 10.1-ఇంచుల భారీ టచ్‌స్క్రీన్ ఇన్‌ఫోటైన్‌మెంట్ సిస్టమ్, డ్రైవర్ కోసం 10.25-ఇంచుల పూర్తి డిజిటల్ క్లస్టర్, ఎండకాలంలో చల్లదనాన్ని ఇచ్చే వెంటిలేటెడ్ ఫ్రంట్ సీట్లను అమర్చారు. వీటితో పాటు మ్యూజిక్ లవర్స్ కోసం ప్రీమియం జేబీఎల్ సౌండ్ సిస్టమ్, వైర్‌లెస్ ఛార్జింగ్ ప్యాడ్, ఆటో క్లైమేట్ కంట్రోల్, యాంబియంట్ లైటింగ్, స్టైలిష్ డయల్ టైప్ గేర్ షిఫ్ట్ నాబ్ వంటి ఎన్నో హైటెక్ ఫీచర్లు ఉన్నాయి.

సేఫ్టీ విషయంలో టయోటా కారు అంటేనే ఒక నమ్మకం. ఈ ఎబెల్లా ఈవీలో ప్రయాణీకుల రక్షణ కోసం ఏకంగా 7 ఎయిర్‌బ్యాగ్‌లను స్టాండర్డ్‌గా అందించారు. దీనితో పాటు ప్రమాదాలను ముందుగానే గుర్తించి కారును కంట్రోల్ చేసే అధునాతన లెవెల్-2 అడాస్ సేఫ్టీ సూట్‌ను ఇందులో లోడ్ చేశారు. ఇందులో లేన్ అసిస్ట్, అడాప్టివ్ క్రూయిజ్ కంట్రోల్ వంటి ఫీచర్లు ఉన్నాయి. అలాగే కారును ఈజీగా పార్కింగ్ చేయడానికి 360-డిగ్రీ కెమెరా, ఏబీఎస్ విత్ ఈబీడీ వంటి తిరుగులేని సేఫ్టీ ఫీచర్లు ఈ కారును ఒక రక్షణ కోటలా మారుస్తాయి.

టయోటా ఎబెల్లా ఈవీని కస్టమర్ల అవసరాలకు తగ్గట్టుగా రెండు విభిన్న బ్యాటరీ ప్యాక్ ఆప్షన్లతో తీసుకువచ్చారు. ఇందులో మొదటిది 49 kWh బ్యాటరీ వెర్షన్ కాగా, ఇది 106 హార్స్‌పవర్, 193 Nm టార్క్‌ను ఉత్పత్తి చేస్తుంది. ఇక లాంగ్ డ్రైవ్స్ ఇష్టపడే వారి కోసం తెచ్చిన పెద్ద 61 kWh బ్యాటరీ వెర్షన్ ఏకంగా 171.6 హార్స్‌పవర్ (128 kW), 189 Nm టార్క్‌ను జనరేట్ చేస్తుంది. ఒకసారి ఫుల్ చార్జ్ చేస్తే ఈ పెద్ద బ్యాటరీ మోడల్ ఏకంగా 543 కిలోమీటర్ల మైండ్ బ్లాకింగ్ రేంజ్ ఇస్తుందని టొయోటా వెల్లడించింది. ఈ కారు 2WD, ఆఫ్-రోడింగ్ కోసం AWD (ఆల్-వీల్ డ్రైవ్) ఆప్షన్లలో లభిస్తుంది. దీని ఎల్‌ఎఫ్‌పీ బ్యాటరీ ఏసీ, డీసీ ఫాస్ట్ ఛార్జింగ్ రెండింటినీ సపోర్ట్ చేస్తుంది.