Triumph : ట్రయంఫ్ బైక్ కొనాలనుకునే వారికి షాక్.. రెండు నెలల్లోనే రెండోసారి పెరిగిన ధరలు

Triumph : ప్రముఖ బ్రిటీష్ ప్రీమియం బైక్ తయారీ సంస్థ ట్రయంఫ్ బైక్ లవర్స్‌కు గట్టి షాక్ ఇచ్చింది. భారత మార్కెట్లో మంచి డిమాండ్ ఉన్న తన పాపులర్ 400సీసీ బైక్ లైనప్ ధరలను కంపెనీ ఒక్కసారిగా పెంచేసింది. ఈ సిరీస్‌లోని వివిధ మోడళ్లపై రూ.3,000 నుంచి గరిష్టంగా రూ.10,000 వరకు అదనపు భారాన్ని మోపింది. దీంతో ట్రయంఫ్ 400సీసీ బైకుల ప్రారంభ ఎక్స్-షోరూమ్ ధర ఇప్పుడు రూ.2.09 లక్షలకు చేరుకుంది. ఇక్కడ గమనించాల్సిన షాకింగ్ విషయం ఏంటంటే.. గడిచిన కేవలం రెండు నెలల కాలంలోనే కంపెనీ ఈ బైకుల ధరలను పెంచడం ఇది రెండోసారి. ఇటీవల ఈ బైకులలో సరికొత్త 349సీసీ ఇంజిన్‌ను పరిచయం చేసిన తర్వాత ఈ ధరల పెంపు నిర్ణయం అమల్లోకి వచ్చింది.

ట్రయంఫ్ 400సీసీ సిరీస్‌లోనే అత్యంత సరసమైన ధరకే లభించే ట్రయంఫ్ స్పీడ్ T4 మోడల్‌పైనే కంపెనీ అత్యధికంగా రూ.10,000 ధరను పెంచింది. గతంలో రూ.1.99 లక్షలుగా ఉన్న ఈ బైక్ ఎక్స్-షోరూమ్ ధర ఇప్పుడు రూ.2.09 లక్షలకు చేరింది. ఫీచర్ల పరంగా చూస్తే ఇందులో 349సీసీ లిక్విడ్-కూల్డ్, సింగిల్ సిలిండర్ ఇంజిన్ ఉంటుంది. ఇది 28.6 bhp పవర్, 31 Nm టార్క్‌ను ప్రొడ్యూస్ చేస్తుంది. అలాగే రైడింగ్‌ను సులభతరం చేయడానికి ఇందులో 6-స్పీడ్ గేర్‌బాక్స్‌ను కూడా అమర్చారు.

ఈ లైనప్‌లో విపరీతమైన క్రేజ్ ఉన్న ట్రయంఫ్ స్పీడ్ 400 ధరను కంపెనీ రూ.6,000 పెంచింది. దీనితో ఈ బైక్ ధర రూ.2.40 లక్షలకు చేరింది. అదేవిధంగా ఆఫ్-రోడింగ్ ప్రియులు ఇష్టపడే స్క్రాంబ్లర్ 400X మోడల్ కూడా రూ.6,000 ప్రియమై ఇప్పుడు రూ.2.65 లక్షల వద్ద లభిస్తోంది. ఈ రెండు బైకులలోనూ 349సీసీ ఇంజిన్‌ను ఉపయోగించారు. ఇది గరిష్టంగా 36.4 bhp పవర్, 32 Nm టార్క్‌ను జనరేట్ చేస్తూ రోడ్లపై దూసుకుపోతుంది.

కంపెనీ కొత్తగా తీసుకొచ్చిన పవర్‌ఫుల్ మోడల్ ట్రాకర్ 400 ధరపై రూ.3,000 పెరగడంతో దీని కొత్త ఎక్స్-షోరూమ్ ధర రూ.2.49 లక్షలుగా మారింది. ఈ లైనప్‌లోనే ఎక్కువ పవర్ ఇచ్చే బైకులలో ఇది ఒకటి. దీని ఇంజిన్ ఏకంగా 39.45 bhp పవర్, 32 Nm టార్క్‌ను అందిస్తుంది. మరోవైపు కెఫే రేసర్ స్టైల్‌లో ఉండే థ్రక్స్టన్ 400 బైక్ ధర రూ.5,000 పెరిగి రూ.2.75 లక్షలకి చేరింది. ఇందులో కూడా ట్రాకర్ 400 బైకుకు సంబంధించిన ఇంజిన్ ట్యూనింగ్‌నే వాడారు.

ఈ సిరీస్‌లో టాప్ ఎండ్ మోడల్ అయిన స్క్రాంబ్లర్ 400XC ధర కూడా రూ.5,000 పెరిగి ఇప్పుడు రూ.2.99 లక్షల మార్కును తాకింది. ఈ మోడల్ చూడటానికి స్క్రాంబ్లర్ 400X లాగే ఉన్నప్పటికీ, ఇందులో స్పోక్ వీల్స్, సరికొత్త గ్రాఫిక్స్, ఆకర్షణీయమైన కలర్ ఆప్షన్స్ లాంటి మార్పులు చేసారు. ధరల పెరుగుదలకు సంబంధించి ట్రయంఫ్ కంపెనీ ఇప్పటివరకు ఎలాంటి అధికారిక కారణాన్ని వెల్లడించలేదు. అయితే ఆటోమొబైల్ రంగంలో రోజురోజుకూ పెరుగుతున్న విడిభాగాల తయారీ ఖర్చులు, బైకులలో చేసిన కొత్త మెకానికల్ అప్‌డేట్లే ఇందుకు ప్రధాన కారణమని మార్కెట్ నిపుణులు భావిస్తున్నారు.