TVS Apache RTX 300 : టీవీఎస్ అపాచీ ఆర్‌టిఎక్స్ కొంటున్నారా? మూడు నెలల వెయిటింగ్ తప్పదు

TVS Apache RTX 300 : టీవీఎస్ మోటార్ కంపెనీ తన అడ్వెంచర్ బైక్ అపాచీ ఆర్‌టిఎక్స్ 300తో సరికొత్త రికార్డులు సృష్టిస్తోంది. ఈ కారు ధర, ఫీచర్లు రైడర్లను ఎంతగానో ఆకర్షిస్తున్నప్పటికీ, ప్రస్తుతం పెరిగిన డిమాండ్ కారణంగా దీని వెయిటింగ్ పీరియడ్ కొనుగోలుదారులను ఆందోళనకు గురిచేస్తోంది. ప్రస్తుతం భారతీయ మార్కెట్లో అపాచీ ఆర్‌టిఎక్స్ 300కు ఉన్న క్రేజ్ అంతా ఇంతా కాదు. గతేడాది అక్టోబర్‌లో విడుదలైనప్పటి నుండి ఈ అడ్వెంచర్ బైక్‌కు బుకింగ్స్ పోటెత్తుతున్నాయి. అయితే, విపరీతమైన డిమాండ్, తక్కువ ఉత్పత్తి సామర్థ్యం కారణంగా, ప్రస్తుతం ఈ బైక్ కోసం కస్టమర్లు సుమారు 3 నెలలకు పైగా వేచి చూడాల్సిన పరిస్థితి నెలకొంది. సోషల్ మీడియాలో చాలా మంది వినియోగదారులు తమ డెలివరీలు ఆలస్యం కావడంపై అసహనాన్ని వ్యక్తం చేస్తున్నారు. దీనికి తోడు కంపెనీ ఇన్‌వాయిసింగ్ ప్రక్రియలో ఉన్న కొన్ని సాంకేతిక కారణాలు కూడా ఈ ఆలస్యానికి దోహదపడుతున్నాయి.

డెలివరీ తేదీల విషయానికి వస్తే.. ఫిబ్రవరి 11, 2026 లేదా ఆ తర్వాత బుక్ చేసుకున్న వారికి జూన్ 1, 2026 నుంచి బైకులు అందే అవకాశం ఉంది. డెలివరీ ప్రక్రియ పూర్తిగా మీరు బుక్ చేసుకున్న వరుస క్రమం, వేరియంట్ లభ్యతపై ఆధారపడి ఉంటుంది. నగరాల వారీగా చూస్తే, పూణే, జైపూర్, అహ్మదాబాద్, హైదరాబాద్ వంటి నగరాల్లో వెయిటింగ్ పీరియడ్ దాదాపు 90 రోజుల వరకు ఉంది. అయితే మీరు ఎంచుకున్న రంగు, డీలర్‌షిప్‌ను బట్టి ఈ గడువులో స్వల్ప మార్పులు ఉండవచ్చు.

ధర పరంగా చూస్తే.. అపాచీ ఆర్‌టిఎక్స్ 300 బేస్ వేరియంట్ ఎక్స్-షోరూమ్ ధర రూ.1.99 లక్షలు కాగా, టాప్ వేరియంట్ ధర రూ.2.14 లక్షల వద్ద ఉంది. ఇక కస్టమర్ల ఇష్టానికి అనుగుణంగా రూపొందించే బీటీవో వేరియంట్ ధర రూ.2.29 లక్షల నుంచి ప్రారంభమవుతుంది. ఈ ధర వద్ద సెగ్మెంట్-లీడింగ్ ఫీచర్లను అందించడం వల్లే ఈ బైక్‌కు ఇంత భారీ డిమాండ్ ఏర్పడింది. ముఖ్యంగా అడ్వెంచర్ టూరింగ్‌ను ఇష్టపడే యువత ఈ బడ్జెట్ ధరలో లభించే పవర్ ప్యాక్డ్ బైక్ కోసం ఎగబడుతున్నారు.

పర్ఫార్మెన్స్ పరంగా ఇందులో 299.1cc లిక్విడ్-కూల్డ్, సింగిల్-సిలిండర్ ఇంజిన్ ఉంది. ఇది 35.5 bhp పవర్, 28.5 Nm టార్క్‌ను ఉత్పత్తి చేస్తూ, 6-స్పీడ్ గేర్‌బాక్స్‌తో వస్తుంది. ఫీచర్ల విషయానికి వస్తే.. రైడ్-బై-వైర్ థ్రాటిల్, క్రూయిజ్ కంట్రోల్, ట్రాక్షన్ కంట్రోల్, మల్టిపుల్ రైడింగ్ మోడ్స్ (Urban, Rain, Tour, Rally) వంటి అడ్వాన్సుడ్ ఆప్షన్లు ఉన్నాయి. వీటితో పాటు 5-అంగుళాల టీఎఫ్‌టీ డిస్‌ప్లే, మ్యాప్ మిర్రరింగ్, స్మార్ట్ కనెక్టివిటీ ఫీచర్లు రైడర్‌కు అత్యుత్తమ అనుభవాన్ని అందిస్తాయి. 180mm సస్పెన్షన్ ట్రావెల్, 200mm గ్రౌండ్ క్లియరెన్స్ ఈ బైక్‌ను ఆఫ్-రోడింగ్, లాంగ్ టూర్స్‌కు సరైన ఎంపికగా మారుస్తున్నాయి.