TVS iQube: 145 కిలోమీటర్ల రేంజ్, టైప్-సి ఛార్జింగ్.. టీవీఎస్ నుంచి సరికొత్త ప్రీమియం ఎలక్ట్రిక్ స్కూటర్

TVS iQube: దేశీ దిగ్గజ ద్విచక్ర వాహన తయారీ సంస్థ టీవీఎస్ తన పాపులర్ ఎలక్ట్రిక్ స్కూటర్ iQube 10 లక్షల విక్రయాల మైలురాయిని దాటిన సందర్భంగా మిలియనర్ స్పెషల్ ఎడిషన్‎ను మార్కెట్లోకి తీసుకొచ్చింది. 145 కిలోమీటర్ల ఐడిసి రేంజ్, సరికొత్త అరోరా గ్రీన్ రంగు, టైప్-సి ఛార్జింగ్ సదుపాయంతో ఈ స్కూటర్ కస్టమర్లను విశేషంగా ఆకట్టుకుంటోంది. భారతీయ ఎలక్ట్రిక్ స్కూటర్ మార్కెట్‌లో అత్యధికంగా అమ్ముడవుతున్న మోడళ్లలో టీవీఎస్ ఐక్యూబ్ అగ్రస్థానంలో కొనసాగుతోంది. ఇప్పటివరకు 10 లక్షల మందికి పైగా వినియోగదారులు దీనిని సొంతం చేసుకున్నారు. ఈ చారిత్రాత్మక విజయానికి గుర్తుగా టీవీఎస్ విడుదల చేసిన మిలియనర్ స్పెషల్ ఎడిషన్ డిజైన్ పరంగా కస్టమర్లను కట్టిపడేస్తోంది. ఈ స్కూటర్‌కు ప్రత్యేకం రూపొందించిన అరోరా గ్రీన్ డుయల్-టోన్ కలర్ ఆప్షన్ ఇచ్చారు. బాడీపై ఉండే ఆకర్షణీయమైన గ్రాఫిక్స్, ప్రత్యేకమైన MillionR బ్యాజింగ్ దీనికి సాధారణ మోడల్ కంటే భిన్నమైన, అత్యంత ప్రీమియం లుక్‌ను అందిస్తాయి. రైడర్ సౌకర్యం కోసం ఇందులో కస్టమ్ సీట్ కవర్‌ను కూడా అమర్చారు.

సీట్ తెరవాల్సిన అవసరం లేకుండానే ఫోన్ ఛార్జింగ్

రోజువారీ ప్రయాణాల్లో వాహనదారులు ఎదుర్కొనే ఆచరణాత్మక ఇబ్బందులను దృష్టిలో ఉంచుకుని టీవీఎస్ ఈ ఎడిషన్‌లో కీలక మార్పులు చేసింది. గతంలో ఐక్యూబ్ మోడళ్లలో యూఎస్‌బీ-ఎ ఛార్జింగ్ పోర్ట్ సీటు కింద ఉండేది. దీనివల్ల ఫోన్ ఛార్జింగ్ పెట్టాలంటే ప్రతిసారీ సీట్ తెరవాల్సి వచ్చేది. కొత్త మిలియనర్ ఎడిషన్‌లో ఈ సమస్యకు పరిష్కారంగా హ్యాండిల్ బార్ సమీపంలోనే సులభంగా అందుబాటులో ఉండేలా యూఎస్‌బీ టైప్-సి ఛార్జింగ్ పోర్ట్‌ను ఏర్పాటు చేశారు. ఈ అప్‌డేట్ వల్ల ప్రయాణంలో ఫోన్ ఛార్జింగ్ చేసుకోవడం ఎంతో సులభతరం కానుంది.

ముందు భాగంలో అదనపు స్టోరేజ్ బాక్స్

రైడర్ల సౌలభ్యం కోసం హ్యాండిల్ కింద ముందు భాగంలో ఒక ఫ్రంట్ స్టోరేజ్ బాక్స్‌ను కొత్తగా జోడించారు. చిరు సరుకులు, వాటర్ బాటిల్ లేదా మొబైల్ ఫోన్ వంటి చిన్నపాటి వస్తువులను అందులో సురక్షితంగా పెట్టుకోవచ్చు. ఛార్జింగ్ అవుతున్న సమయంలో ఫోన్‌ను ఈ ఫ్రంట్ బాక్స్‌లోనే భద్రంగా ఉంచుకునే వీలుంది. నగరాల్లో ప్రతిరోజూ ఆఫీసులకు, కళాశాలలకు వెళ్లేవారికి ఈ ఫ్రంట్ స్టోరేజ్ బాక్స్ ఎంతగానో ఉపయోగపడుతుంది.

ఒక్క ఛార్జ్‌తో 145 కిలోమీటర్ల దాకా ప్రయాణం

ఈ కొత్త స్పెషల్ ఎడిషన్ ఒక్కసారి పూర్తిగా ఛార్జ్ చేస్తే ఏకంగా 145 కిలోమీటర్ల ఐడిసి రేంజ్ ఇస్తుందని కంపెనీ స్పష్టం చేసింది. అయితే రోడ్డు పరిస్థితులు, ప్రయాణించే వేగం, బండిపై ఉండే బరువు, వినియోగించే రైడింగ్ మోడ్ ఆధారంగా నిజమైన రోడ్డు రేంజ్ స్వల్పంగా మారే అవకాశం ఉంటుంది. నగర పరిధిలో రోజువారీ రాకపోకలు సాగించే వారికి ఈ 145 కిలోమీటర్ల రేంజ్ సరిగ్గా సరిపోతుంది.