TVS Jupiter 125 : కొత్త జీఎస్టీ రేట్లు.. భారీగా తగ్గిన టీవీఎస్ జూపిటర్ 125 ధర

TVS Jupiter 125 : సామాన్య, మధ్యతరగతి కుటుంబాలు, ఆఫీసుకు వెళ్లేవారికి స్కూటర్ అనేది రోజువారీ అవసరాలకు తప్పనిసరి. ఈ విభాగంలో మంచి అమ్మకాలు సాధిస్తున్న టీవీఎస్ జూపిటర్ 125 స్కూటర్ కొనుగోలుదారులకు ఇప్పుడు మరింత చౌకగా లభిస్తోంది. కేంద్ర ప్రభుత్వం ఇటీవల జీఎస్టీని తగ్గించడం వలన, ఈ స్కూటర్ ధర గణనీయంగా తగ్గింది. దీనితో ఈ స్కూటర్ ఇప్పుడు మునుపటి కంటే సుమారు రూ.7,731 వరకు తక్కువ ధరకే లభిస్తోంది. ఈ ధర తగ్గింపు కారణంగా ఈ స్కూటర్ మరింత మందికి మెరుగైన ఎంపికగా మారింది.

జీఎస్టీ తగ్గింపు తర్వాత టీవీఎస్ జూపిటర్ 125 ధరలు బాగా తగ్గాయి. ఉదాహరణకు దీని ప్రారంభ ఎక్స్-షోరూమ్ ధర గతంలో రూ.82,395 ఉండగా, ఇప్పుడు ఇది కేవలం రూ.75,600 నుంచే మొదలవుతోంది. ఈ స్కూటర్ ముఖ్యంగా నాలుగు రకాల లభిస్తుంది: డ్రమ్ అల్లాయ్, డిస్క్, స్మార్ట్‌ఎక్స్ కనెక్ట్ డ్రమ్, స్మార్ట్‌ఎక్స్ కనెక్ట్ డిస్క్. ఈ వివిధ రకాల ఆప్షన్లు భక్తులు, అవసరం, బడ్జెట్‌ను బట్టి కొనుగోలు చేసుకునేందుకు వీలుగా ఉన్నాయి.

టీవీఎస్ జూపిటర్ 125 స్కూటర్‌ను కుటుంబ అవసరాలు, రోజువారీ వాడకం కోసం అందంగా రూపొందించారు. దీని బాడీ లోహంతో తయారు చేయబడింది. దీని వలన మన్నికతో పాటు ప్రీమియం అనుభూతి లభిస్తుంది. దీనిలో రాత్రి పూట మెరుగైన వెలుగు కోసం ఎల్‌ఈడీ హెడ్‌లైట్, టెయిల్‌లైట్లు ఉన్నాయి. అలాగే, దీనిలో అనలాగ్-డిజిటల్ ఇన్‌స్ట్రుమెంట్ క్లస్టర్ ఉంటుంది. ముఖ్యంగా స్మార్ట్‌ఎక్స్ కనెక్ట్ రకాలలో అత్యాధునిక టీఎఫ్‌టీ డిస్‌ప్లే, బ్లూటూత్ కనెక్టివిటీ, వాయిస్ అసిస్ట్, ట‌ర్న్-బై-ట‌ర్న్ నావిగేషన్, ఫోన్‌కు వచ్చే కాల్/మెసేజ్ అలర్ట్‌లు వంటి టెక్నాలజీ ఫీచర్లు లభిస్తాయి. ఈ స్కూటర్‌లో అత్యంత ఆకర్షణీయమైన ఫీచర్ దీని స్టోరేజ్ కెపాసిటీ. సీటు కింద ఏకంగా 33 లీటర్ల బూట్ స్పేస్ ఉంది, దీనిలో రెండు హెల్మెట్‌లను సులభంగా పెట్టుకోవచ్చు. అదనంగా 2 లీటర్ల గ్లవ్ బాక్స్, యూఎస్‌బీ ఛార్జర్ కూడా ఉన్నాయి.

నిత్యం స్కూటర్‌ను వాడే వారికి సౌకర్యాన్ని అందించేందుకు దీనిలో అనేక ఫీచర్లు జోడించారు. పెట్రోల్ పోయించుకోవడానికి సీటు తెరవాల్సిన అవసరం లేకుండా, హ్యాండిల్‌బార్ కింద బయటి నుంచి ఇంధనం నింపుకునే మూత ఉంది. సురక్షితమైన రైడింగ్ కోసం దీనిలో సింక్రనైజ్డ్ బ్రేకింగ్ సిస్టమ్, సీటు ఓపెనింగ్ స్విచ్, పార్క్ బ్రేక్ సిస్టమ్ వంటి సేఫ్టీ ఫీచర్లు ఉన్నాయి. వీటితో పాటు, స్టాండ్ అలారం, హెజార్డ్ వార్నింగ్ లైట్ వంటి ఫీచర్లు కూడా ఉన్నాయి. ఇవి రోజువారీ ప్రయాణంలో సౌకర్యాన్ని, సేఫ్టీని అందిస్తాయి.

టీవీఎస్ జూపిటర్ 125 స్కూటర్‌లో 124.8 సీసీ సామర్థ్యం గల సింగిల్-సిలిండర్, ఎయిర్-కూల్డ్ ఇంజిన్ అమర్చారు. ఈ ఇంజిన్ సుమారు 8.15 పీఎస్ పవర్, 10.5 ఎన్ఎమ్ టార్క్ ఉత్పత్తి చేస్తుంది. ఈ ఇంజిన్ బీఎస్6 2.0 కాలుష్య నిబంధనలకు అనుగుణంగా రూపొందించబడింది. ఇందులో ఫ్యూయల్ ఇంజెక్షన్ సాంకేతికత వాడారు. దీని వలన యాక్సిలరేషన్ మెరుగ్గా ఉండి, మైలేజ్ కూడా బాగా వస్తుంది. కంపెనీ ప్రకటించిన మైలేజ్ 57.27 కిలోమీటర్లు/లీటర్ కాగా, నిజ జీవితంలో ఇది దాదాపు 50 కిలోమీటర్లు/లీటర్ వరకు ఇస్తుంది. దీని 5.1 లీటర్ల ఇంధన ట్యాంక్ ఒకసారి నింపితే దాదాపు 250 కిలోమీటర్ల దూరం ప్రయాణించవచ్చు. ట్యాంక్‌లో ఎంత ఇంధనం ఉంది అనే ఇండికేటర్ కూడా ఉండటం వల్ల ప్రయాణం సులభతరం అవుతుంది.