TVS Orbiter : సింగిల్ ఛార్జ్ పై 158కిమీ రేంజ్.. టీవీఎస్ అత్యంత చౌకైన ఎలక్ట్రిక్ స్కూటర్ లాంచ్

TVS Orbiter : ఎలక్ట్రిక్ స్కూటర్ల మార్కెట్లో సరికొత్త పోటీ మొదలైంది. మార్కెట్‌లో ఇప్పటికే ఉన్న ఓలా, ఏథర్ వంటి కంపెనీలకు గట్టి పోటీనిస్తూ టీవీఎస్ తన కొత్త ఎలక్ట్రిక్ స్కూటర్ ఆర్బిటర్ ను విడుదల చేసింది. తక్కువ ధరలో ఎక్కువ ఫీచర్లతో వచ్చిన ఈ స్కూటర్ ఇప్పుడు అందరి దృష్టిని ఆకర్షిస్తోంది. మరి ఈ కొత్త టీవీఎస్ ఆర్బిటర్ ధర ఎంత? ఇందులో ఎలాంటి ఫీచర్లు ఉన్నాయి? తెలుసుకుందాం.

ధర, డిజైన్

చాలా కాలం ఎదురుచూసిన తర్వాత, టీవీఎస్ మోటార్ కంపెనీ తన ఎలక్ట్రిక్ స్కూటర్ ఆర్బిటర్‌ను విడుదల చేసింది. బెంగళూరులో దీని ఎక్స్-షోరూమ్ ధర రూ. 99,900. ఈ కొత్త ఎలక్ట్రిక్ స్కూటర్ టీవీఎస్ ఐక్యూబ్ డిజైన్ లక్షణాలతో పాటు, కొన్ని కొత్త డిజైన్ అంశాలను కూడా కలిగి ఉంది. డిజైన్ పరంగా, ఆర్బిటర్ ఫ్యాషనబుల్‌గా, ఆధునికంగా కనిపిస్తుంది. ఇది అనేక రంగులలో అందుబాటులో ఉంది. దీని సీటు 845 మిమీ పొడవుగా, ఫ్లోర్‌బోర్డు 290 మిమీ వెడల్పుగా ఉంది. హ్యాండిల్ బార్ కారణంగా రైడర్ నేరుగా కూర్చోవచ్చు, ఇది డ్రైవ్ చేయడానికి మరింత సౌకర్యంగా ఉంటుంది.

బ్యాటరీ, రేంజ్

టీవీఎస్ ఆర్బిటర్‌లో 3.1 kWh బ్యాటరీ ప్యాక్ ఉపయోగించారు. ఇది ఒకసారి పూర్తిగా ఛార్జ్ చేస్తే 158 కిలోమీటర్ల వరకు రేంజ్ ఇస్తుందని ఐడీసీ తెలిపింది. ఇందులో ఎకో, పవర్ అనే రెండు రైడింగ్ మోడ్‌లు ఉన్నాయి. అంతేకాకుండా, ఈ స్కూటర్ రీజనరేటివ్ బ్రేకింగ్ సిస్టమ్‌తో వస్తుంది. ఇది బ్యాటరీ ఛార్జ్ అవ్వడానికి సహాయపడుతుంది. ప్రస్తుతానికి, దీని ఎలక్ట్రిక్ మోటార్ స్పెసిఫికేషన్లు, ఛార్జింగ్ సమయం గురించి పూర్తి సమాచారం ఇంకా తెలియలేదు.

ఫీచర్లు, రంగులు

టీవీఎస్ ఆర్బిటర్ అనేక అడ్వాన్సుడ్ ఫీచర్లతో వస్తుంది. ముందు, వెనుక ఎల్‌ఈడీ లైటింగ్‌, మొబైల్ ఛార్జ్ చేసుకోవడానికి యూఎస్‌బీ ఛార్జింగ్ పోర్ట్, ఓటీఏ అప్‌డేట్‌లు దీనిలో ఉన్నాయి. బ్లూటూత్ కనెక్టివిటీ, టర్న్-బై-టర్న్ నావిగేషన్‌తో కూడిన డిజిటల్ ఇన్‌స్ట్రుమెంట్ క్లస్టర్ కూడా ఇందులో ఉంది. అదనంగా, హిల్ హోల్డ్ అసిస్ట్, క్రూజ్ కంట్రోల్, పార్కింగ్ అసిస్ట్ వంటి ఫీచర్లు ఉన్నాయి. అత్యవసర పరిస్థితుల్లో స్కూటర్ పడిపోతే, అది ఆటోమేటిక్‌గా ఎలక్ట్రిక్ మోటార్‌ను ఆపేస్తుంది. టీవీఎస్ ఆర్బిటర్ నియాన్ సన్‌బర్స్ట్, స్ట్రాటోస్ బ్లూ, లూనార్ గ్రే, స్టెల్లార్ సిల్వర్, కాస్మిక్ టైటానియం, మార్టియన్ కాపర్ రంగుల్లో లభిస్తుంది.