TVS Radeon: తక్కువ ధరలో అదిరిపోయే ఫీచర్లు.. కొత్త కలర్ ఆప్షన్లతో వచ్చిన టీవీఎస్ రేడియన్

TVS Radeon: ప్రముఖ ద్విచక్ర వాహన తయారీ సంస్థ టీవీఎస్ మోటార్ పండుగ సీజన్‌ను దృష్టిలో ఉంచుకుని కస్టమర్లకు అదిరిపోయే సర్ప్రైజ్ ఇచ్చింది. తన అత్యంత ప్రజాదరణ పొందిన కమ్యూటర్ మోటార్‌సైకిల్ టీవీఎస్ రేడియన్ సరికొత్త 2026 మోడల్‌ను అధికారికంగా మార్కెట్లోకి విడుదల చేసింది. ఆకర్షణీయమైన కొత్త గ్రాఫిక్స్, ఫుల్ ఎల్ఈడీ లైటింగ్ మరియు అద్భుతమైన మైలేజ్‌తో వస్తున్న ఈ బైక్ ధర రూ.67,100 (ఎక్స్-షోరూమ్) నుంచి ప్రారంభమవుతుంది.

వేరియంట్లు, ధరల వివరాలు

కొత్త టీవీఎస్ రేడియన్ మూడు వేర్వేరు వేరియంట్లలో లభించనుంది. అవి బేస్, డిజి డ్రమ్, డిజి డిస్క్ వెర్షన్లు. వీటి ధరల విషయానికి వస్తే, బేస్ వేరియంట్ ధర రూ.67,100 ఉండగా, డిజి-డ్రమ్ వేరియంట్ ధర రూ.70,100, టాప్ ఎండ్ డిజి-డిస్క్ వేరియంట్ ధర రూ.73,100 (అన్ని ధరలు ఎక్స్-షోరూమ్)గా నిర్ణయించారు. పండుగ సమయాల్లో బైక్ కొనుగోలు చేయాలనుకునే మధ్యతరగతి ప్రజలకు ఇది అద్భుతమైన ఎంపికగా నిలుస్తుంది.

డిజైన్, ఎల్ఈడీ లైటింగ్

ఈ కొత్త మోడల్‌లో చేసిన అతిపెద్ద మార్పు లైటింగ్ వ్యవస్థలో కనిపిస్తుంది. బైక్ మొత్తం ఫుల్ ఎల్ఈడీ (LED) లైటింగ్ సెటప్‌తో వస్తోంది. సిగ్నేచర్ డేటైమ్ రన్నింగ్ లైట్ (DRL)తో కూడిన కొత్త హెడ్‌ల్యాంప్, ఎల్ఈడీ టెయిల్ ల్యాంప్, రెండు వైపులా ఎల్ఈడీ టర్న్ ఇండికేటర్లు అన్ని వేరియంట్లలోనూ స్టాండర్డ్‌గా అందించారు. కేవలం డిజి-డిస్క్ వేరియంట్‌లో మాత్రమే ఫ్రంట్ డిస్క్ బ్రేక్ లభిస్తుండగా, మిగతా రెండు వేరియంట్లలో డ్రమ్ బ్రేక్‌లు ఇచ్చారు. కొత్త కలర్ ఆప్షన్లు, సరికొత్త గ్రాఫిక్స్ ఈ బైక్‌కు మరింత మోడర్న్ లుక్‌ను తెచ్చిపెట్టాయి.

ఇంజిన్ కెపాసిటీ, అద్భుతమైన మైలేజ్

యాంత్రికంగా ఈ బైక్‌లో ఎలాంటి మార్పులు చేయలేదు. ఇందులో పాత మోడల్ మాదిరిగానే 109.7cc ఎయిర్, ఆయిల్-కూల్డ్ ఇంజిన్‌ను అమర్చారు. ఇది 8 hp పవర్, 8.7 Nm టార్క్ ను ఉత్పత్తి చేస్తుంది. దీనికి 4-స్పీడ్ గేర్‌బాక్స్ జతచేయబడింది. ముఖ్యంగా ఈ బైక్ లీటరుకు ఏకంగా 69.3 కిలోమీటర్ల మైలేజ్ ఇస్తుందని కంపెనీ స్పష్టం చేస్తోంది. 10 లీటర్ల ఫ్యూయల్ ట్యాంక్ కెపాసిటీ కలిగి ఉన్న ఈ బైక్‌లో యూఎస్‌బీ ఛార్జింగ్, కలర్ డిజిటల్ ఇన్‌స్ట్రుమెంట్ క్లస్టర్ వంటి అధునాతన ఫీచర్లు ఉన్నాయి.