TVS : బండి కాదు బాబోయ్.. ఇదొక పెయింటింగ్.. టీవీఎస్ ఎక్స్ కొత్త లుక్ చూస్తే మైండ్ బ్లాకే

TVS : ప్రముఖ టూవీలర్ దిగ్గజం టీవీఎస్ మోటార్ కంపెనీ తన ప్రీమియం ఎలక్ట్రిక్ స్కూటర్ టీవీఎస్ ఎక్స్ ను సరికొత్త కళాత్మక రూపంలో ఆవిష్కరించింది. కేవలం ఒక వాహనంగానే కాకుండా, భారతీయ సంస్కృతిని ప్రతిబింబించే ఒక కళాఖండంగా దీనిని తీర్చిదిద్దింది. కలెక్టర్స్ సోయిరీ అనే ప్రత్యేక కార్యక్రమంలో ప్రఖ్యాత డిజైనర్ మనోవిరాజ్ ఖోస్లాతో కలిసి రూపొందించిన మూడు స్పెషల్ ఆర్ట్ ఎడిషన్ స్కూటర్లను కంపెనీ ప్రదర్శించింది. టెక్నాలజీకి కళాత్మకత తోడైతే ఎలా ఉంటుందో ఈ స్కూటర్లు చూస్తే అర్థమవుతుంది.

కర్ణాటక సంస్కృతికి నీరాజనం

టీవీఎస్ ఆవిష్కరించిన ఈ మూడు వన్-ఆఫ్ ఎడిషన్లు పూర్తిగా కర్ణాటక రాష్ట్ర కళలు, సంస్కృతి నుంచి ప్రేరణ పొంది రూపొందించబడ్డాయి. ఇందులో హంపి చారిత్రక కట్టడాల శిల్పకళ, చన్నపట్న ప్రసిద్ధ చెక్క బొమ్మల కళాకృతులు, మైసూర్ రాజసం ఉట్టిపడేలా డిజైన్ చేశారు. ప్రతి స్కూటర్ ఒక విభిన్నమైన థీమ్‌తో, ప్రత్యేకమైన రంగులతో ఒక అద్భుతమైన స్టైల్ స్టేట్‌మెంట్‌గా నిలుస్తోంది.

టెక్నాలజీలో మొనగాడు

టీవీఎస్ ఎక్స్ కేవలం అందంలోనే కాదు, పనితీరులో కూడా మేటి. ఇది కంపెనీ ప్రత్యేకంగా రూపొందించిన Xleton ప్లాట్‌ఫామ్‌పై ఆధారపడి నిర్మించబడింది. ఇందులో అత్యంత బలమైన అల్యూమినియం ఫ్రేమ్ ఉంటుంది. అంతేకాకుండా, ఈ స్కూటర్‌లో రామ్-ఎయిర్ కూల్డ్ మోటార్‌ను అమర్చారు. ఇది ప్రయాణంలో గాలి ద్వారా మోటార్‌ను చల్లబరుస్తూ, అత్యుత్తమ పవర్‌ను మరియు ఎఫిషియెన్సీని అందిస్తుంది. దీని ఏరోడైనమిక్ డిజైన్ గాలిని చీల్చుకుంటూ వేగంగా వెళ్లడానికి సహకరిస్తుంది.

లైఫ్ స్టైల్ అండ్ ఫ్యూచరిస్టిక్ డిజైన్

ఈ ప్రత్యేక ఈవెంట్ ఉద్దేశం కేవలం కొత్త మోడల్‌ను చూపించడం మాత్రమే కాదు, భవిష్యత్తులో వాహనాలు కేవలం ప్రయాణ సాధనాలుగా మాత్రమే కాకుండా, ఒక వ్యక్తి లైఫ్ స్టైల్, అభిరుచికి ప్రతీకలుగా మారతాయని చాటిచెప్పడం. టీవీఎస్ ఈ చొరవ ద్వారా ఆటోమొబైల్ రంగాన్ని డిజైన్, సంస్కృతితో అనుసంధానం చేస్తోంది. భవిష్యత్తులో ఇలాంటి మరిన్ని వినూత్న ప్రాజెక్టులను తీసుకురావడానికి సిద్ధంగా ఉన్నామని కంపెనీ స్పష్టం చేసింది.

మార్కెట్లో పోటీ, ధరలు

ప్రస్తుతం టీవీఎస్ ఎక్స్ మార్కెట్లో ఏథర్ 450ఎక్స్, ఓలా ఎస్1 ప్రో, సింపుల్ వన్ వంటి ప్రీమియం ఎలక్ట్రిక్ స్కూటర్లతో పోటీ పడుతోంది. టీవీఎస్ ఎక్స్ సాధారణ మోడల్ ధర సుమారు రూ.2.5 లక్షల (ఎక్స్-షోరూమ్)నుంచి ప్రారంభమవుతుండగా, ఈ ఆర్ట్ ఎడిషన్లు మాత్రం కేవలం ప్రదర్శన, కలెక్టర్ల కోసం ఉద్దేశించినవి. అయితే, ఇలాంటి డిజైన్లను ఇష్టపడే కస్టమర్ల కోసం భవిష్యత్తులో లిమిటెడ్ ఎడిషన్లను తీసుకువచ్చే అవకాశం ఉందని సమాచారం.