TVS XL 100 : సామాన్యుల బండికి ధరల సెగ..టీవీఎస్ ఎక్స్‌ఎల్ 100 రేట్లు పెరిగాయ్

TVS XL 100 : భారతీయ మార్కెట్లో అతి తక్కువ ధరలో లభించే ద్విచక్ర వాహనాల్లో టీవీఎస్ ఎక్స్‌ఎల్ 100 ఒకటి. ప్రధానంగా చిన్న వ్యాపారులు, డెలివరీ బాయ్స్ మరియు గ్రామీణ ప్రాంత ప్రజల అవసరాలను తీర్చే ఈ మొపెడ్ ధర ఇప్పుడు రూ.44,550 (బేస్ వేరియంట్)కు చేరుకుంది. గతంలో దీని ప్రారంభ ధర రూ.44,150 గా ఉండేది. కంపెనీ ఇన్పుట్ ఖర్చులు పెరగడం వల్ల ఈ స్వల్ప పెంపు చేపట్టినట్లు సమాచారం. ఇదివరకు స్టార్ సిటీ ప్లస్, రేడియాన్ మోడళ్లపై కూడా టీవీఎస్ ఇలాంటి నామమాత్రపు పెంపునే చేపట్టింది.

వేరియంట్ల వారీగా చూస్తే, హెవీ డ్యూటీ, హెవీ డ్యూటీ ఐ-టచ్ స్టార్ట్, విన్ ఎడిషన్, అలోయ్ వీల్ వేరియంట్లపై సరిగ్గా రూ.400 పెరిగింది. ఒక్క కంఫర్ట్ ఐ-టచ్ స్టార్ట్ వేరియంట్‌పై మాత్రం కేవలం రూ.350 మాత్రమే పెరగడం గమనార్హం. ప్రస్తుతం మార్కెట్లో పెట్రోల్ మొపెడ్ విభాగంలో దీనికి తిరుగులేదని చెప్పవచ్చు. 2025 ప్రారంభంలో విడుదలైన కొత్త అలోయ్ వీల్ వేరియంట్, అప్‌డేటెడ్ గ్రాఫిక్స్ ఈ వాహనానికి మరింత కొత్తదనాన్ని జోడించాయి.

సాంకేతికంగా ఈ మొపెడ్ లో ఎలాంటి మార్పులు లేవు. ఇది ఇప్పటికీ అదే నమ్మకమైన 99.7cc, సింగిల్ సిలిండర్, ఎయిర్ కూల్డ్ ఇంజిన్‌తో పనిచేస్తుంది. ఇది 4.3 bhp పవర్, 6.5 Nm టార్క్‌ను ఉత్పత్తి చేస్తుంది. దాదాపు 65 kmpl మైలేజీనిచ్చే ఈ వాహనం, దాదాపు 130 కిలోల వరకు బరువును సునాయాసంగా మోయగలదు. మొబైల్ ఛార్జింగ్ పోర్ట్, ఐ-టచ్ స్టార్ట్ వంటి ఆధునిక ఫీచర్లు ఉండటం వల్ల ఇది ఇప్పటికీ బడ్జెట్ వినియోగదారుల ఫస్ట్ ఛాయిస్‌గా నిలుస్తోంది.