VinFast : భారత మార్కెట్‌లోకి వియత్నాం కంపెనీ.. రూ.7.5 లక్షలకే ఎలక్ట్రిక్ హ్యాచ్‌బ్యాక్

VinFast : భారతదేశ ఎలక్ట్రిక్ వాహనాల మార్కెట్లోకి త్వరలోనే వియత్నాం దేశానికి చెందిన ప్రముఖ కార్ల తయారీ సంస్థ విన్‌ఫాస్ట్ అడుగుపెట్టనుంది. అంతర్జాతీయంగా ఇప్పటికే VF6, VF7 వంటి ఎలక్ట్రిక్ ఎస్‌యూవీలతో పేరు తెచ్చుకున్న ఈ కంపెనీ, ఇక్కడ కూడా తమ కార్లను విడుదల చేసేందుకు సిద్ధమవుతోంది. ముఖ్యంగా మధ్యతరగతి కొనుగోలుదారులను లక్ష్యంగా చేసుకుని, అతి తక్కువ ధరలో ఒక కొత్త ఎలక్ట్రిక్ కారును తీసుకురాబోతోంది. విన్‌ఫాస్ట్ భారత మార్కెట్లోకి తీసుకురాబోతున్న ఈ సరసమైన కారు పేరు VF3. ఇది ఒక కాంపాక్ట్ ఎలక్ట్రిక్ హ్యాచ్‌బ్యాక్.

ఈ కారు ఎక్స్-షోరూమ్ ధర రూ.7.50 లక్షల నుంచి రూ.10 లక్షల మధ్య ఉండే అవకాశం ఉంది. ఈ పోటీ ధరతో ఇది మార్కెట్లో ఇప్పటికే ఉన్న టాటా టియాగో ఈవీ వంటి మోడళ్లకు గట్టి పోటీ ఇవ్వగలదని అంచనా. ఈ కారు 2026 ఫిబ్రవరిలోనే అమ్మకానికి వచ్చే అవకాశం ఉంది. VF3 కారు ఎలక్ట్రిక్ బ్లూ, అర్బన్ మింట్, సమ్మర్ యెల్లో వంటి ఆకర్షణీయమైన రంగులలో లభిస్తుంది. 3,190 mm పొడవుతో కాంపాక్ట్‌గా ఉన్న ఈ కారులో 4 సీట్లు, లగేజీ కోసం 285 లీటర్ల బూట్ స్పేస్ ఉన్నాయి. గ్రౌండ్ క్లియరెన్స్ 191 mm గా ఉంది.

విన్‌ఫాస్ట్ VF3 టెక్నికల్ వివరాలు కూడా ఆకట్టుకునేలా ఉన్నాయి: ఈ హ్యాచ్‌బ్యాక్‌లో 18.64 kWh సామర్థ్యం గల బ్యాటరీ ప్యాక్ ఉంది. ఒక్కసారి పూర్తిగా ఛార్జ్ చేస్తే 215 కిలోమీటర్ల వరకు రేంజ్ ఇస్తుంది. ఈ కారు గరిష్టంగా 100 kmph వేగాన్ని చేరుకోగలదు. డ్రైవింగ్ అనుభవం కోసం ఇందులో ఎకో, కంఫర్ట్, స్పోర్ట్ అనే 3 డ్రైవింగ్ మోడ్‌లు కూడా ఉన్నాయి. ఈ కారులో మల్టిపుల్ ఎయిర్‌బ్యాగ్‌లు, ఏబీఎస్, ఈబీడీ, ఈఎస్‌సీ, రియర్-వ్యూ కెమెరా వంటి ముఖ్యమైన సేఫ్టీ ఫీచర్లు ఉన్నాయి. కారు లోపల 10 అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, మాన్యువల్ ఏసీ, క్రూయిజ్ కంట్రోల్ వంటి సదుపాయాలు ఉన్నాయి.