VinFast: భారత ఈవీ టూ వీలర్ రంగంలోకి విన్‌ఫాస్ట్ గ్రాండ్ ఎంట్రీ.. టాప్ బ్రాండ్లకు దడ పుట్టిస్తున్న ఫీచర్స్
టాప్ బ్రాండ్లకు దడ పుట్టిస్తున్న ఫీచర్స్
VinFast: వియత్నాంకు చెందిన ప్రముఖ ఎలక్ట్రిక్ వాహనాల తయారీ సంస్థ విన్‌ఫాస్ట్ ఇప్పటికే భారత ఎలక్ట్రిక్ ఫోర్-వీలర్ విపణిలో తన పట్టు సాధించింది. ఇప్పుడు దేశీయ ఎలక్ట్రిక్ టూ వీలర్ రంగంలోకి కూడా అడుగుపెట్టేందుకు వేగంగా పావులు కదుపుతోంది. ఈ క్రమంలో గ్లోబల్ మార్కెట్లో ఉన్న ఈవో, ఫెలిజ్, వైపర్ మోడళ్లతో పాటు భారతీయ వినియోగదారుల అవసరాలకు అనుగుణంగా ప్రత్యేకంగా డిజైన్ చేసిన ఒక సరికొత్త ఎలక్ట్రిక్ స్కూటర్‌ను సిద్ధం చేస్తోంది. ఈ నయా స్కూటర్‌కు సంబంధించిన డిజైన్ పేటెంట్ వివరాలు తాజాగా భారత్‌లో లీకై ఆటోమొబైల్ వర్గాల్లో తీవ్ర ఆసక్తిని రేకెత్తిస్తున్నాయి.
స్పోర్టీ డిజైన్, ప్రాక్టికల్ ఫ్యామిలీ లుక్
లీకైన పేటెంట్ ఆధారంగా ఈ కొత్త విన్‌ఫాస్ట్ ఎలక్ట్రిక్ స్కూటర్ అత్యంత మోడ్రన్, మినిమలిస్టిక్ ఫ్రంట్ ఫాసియాతో కనిపిస్తోంది. వన్-పీస్ ఆప్రాన్ మధ్యలో విన్‌ఫాస్ట్ లోగో, దానికి దిగువన ఎల్‌ఈడీ హెడ్‌లైట్ యూనిట్, ఫ్లష్ టర్న్ ఇండికేటర్లు అమర్చారు. ఎస్ఓఎల్ఈ డిజైన్ కాకుండా స్పోర్టీ లుక్‌తో పాటు కుటుంబ అవసరాలకు ఉపయోగపడేలా ఫ్లాట్ ఫ్లోర్‌బోర్డ్, విశాలమైన పొడవైన సీటును అందించారు. ఈ వాహనం రోడ్డుపై మెరుగైన గ్రిప్ సాధించేందుకు ముందు, వెనుక భాగాలలో 14 ఇంచుల పెద్ద వీల్స్ అమర్చడం ఈ స్కూటర్ ప్రధాన ఆకర్షణగా నిలవనుంది.
ప్రీమియం ఫీచర్లు, బాడీ హార్డ్‌వేర్
ఈ స్కూటర్ హ్యాండిల్‌బార్ నాకెడ్ స్ట్రీట్-స్టైల్‌లో ఉండటంతో పాటు దానిపైన సరికొత్త ఇన్‌స్ట్రుమెంట్ క్లస్టర్ అందుబాటులో ఉంటుంది. వేరియంట్లను బట్టి ఎల్‌సిడి లేదా ప్రీమియం టిఎఫ్‌టి డిస్ప్లే ఇచ్చే అవకాశం ఉంది. హార్డ్‌వేర్ విషయానికి వస్తే, ముందు భాగంలో టెలిస్కోపిక్ ఫోర్క్స్, వెనుక భాగంలో ట్విన్ షాక్ అబ్సార్బర్లు అందించారు. స్కూటర్ వెనుక చక్రంలో పవర్‌ఫుల్ హబ్ మోటార్‌ను అమర్చినట్లు చిత్రాలు స్పష్టం చేస్తున్నాయి. బ్యాటరీ పాక్‌ను ఫ్లోర్‌బోర్డ్ కింద అమర్చడం వల్ల సీటు కింద హెల్మెట్, ఇతర వస్తువులు పెట్టుకోవడానికి భారీ స్టోరేజ్ స్పేస్ లభించనుంది.
భారత మార్కెట్లో పోటీ, నెట్‌వర్క్ విస్తరణ
భారత మార్కెట్లో విన్‌ఫాస్ట్ తన ఉనికిని చాటుకోవడానికి ఇప్పటికే 34 ప్రధాన నగరాల్లో 50 డీలర్‌షిప్‌లతో ఒప్పందాలు కుదుర్చుకుంది. ఈ కొత్త ఎలక్ట్రిక్ స్కూటర్ మార్కెట్లోకి వస్తే ప్రస్తుతం దేశంలో అత్యధికంగా అమ్ముడవుతున్న టీవీఎస్ ఐక్యూబ్, బాజాజ్ చేతక్, ఓలా ఎస్1 ప్రో, ఏథర్ రిజ్టా వంటి ఫ్యామిలీ ఈవీ స్కూటర్లకు గట్టి పోటీ ఇవ్వడం ఖాయంగా కనిపిస్తోంది. త్వరలోనే దీని అధికారిక పేరు, రేంజ్, స్పెసిఫికేషన్లు అలాగే లాంచ్ తేదీ వివరాలను కంపెనీ వెల్లడించనుంది.
