Volkswagen Sales : కేవలం 4 మోడళ్లతో దుమ్ము రేపిన వోక్స్‌వ్యాగన్.. రికార్డు బద్దలు కొట్టిన వర్టస్ సెడాన్

Volkswagen Sales : వోక్స్‌వ్యాగన్ కంపెనీ భారత మార్కెట్‌లో కేవలం నాలుగు మోడళ్లను (వర్టస్, టైగున్, టిగువాన్, గోల్ఫ్) మాత్రమే విక్రయిస్తున్నప్పటికీ, నవంబర్ 2025లో అద్భుతమైన అమ్మకాల వృద్ధిని నమోదు చేసింది. కంపెనీ మొత్తం 3,342 యూనిట్లను విక్రయించి, గత సంవత్సరం నవంబర్ (2024లో 3,033 యూనిట్లు) నాటి తమ రికార్డును బద్దలు కొట్టింది. ఈ అమ్మకాలు వార్షికంగా 10.19% వృద్ధిని సూచిస్తున్నాయి. కేవలం నాలుగు కార్లతోనే కంపెనీ ఈ విజయాన్ని సాధించడం విశేషం. అయితే, అక్టోబర్ 2025తో పోలిస్తే మాత్రం నెలవారీగా 17.44% క్షీణతను ఎదుర్కొంది.

వోక్స్‌వ్యాగన్ అమ్మకాలలో వర్టస్ సెడాన్ కీలక పాత్ర పోషించింది. నవంబర్ 2025లో వర్టస్ ఏకంగా 2,225 యూనిట్లు అమ్ముడైంది. ఇది కంపెనీ మొత్తం అమ్మకాలలో 66.58% భారీ మార్కెట్ వాటాను సొంతం చేసుకుంది. గత ఏడాదితో పోలిస్తే వర్టస్ అమ్మకాలు 52.71% పెరిగాయి. కంపెనీ అమ్మకాలకు వర్టస్ ప్రధాన ఇంజిన్‌గా మారిందని ఈ గణాంకాలు రుజువు చేస్తున్నాయి. దీనికి విరుద్ధంగా ఎస్‌యూవీ మోడల్ అయిన టైగున్ 1,077 యూనిట్లు మాత్రమే అమ్ముడై, వార్షికంగా 28.06% క్షీణతను నమోదు చేసింది. అయినప్పటికీ టైగున్ 32.23% వాటాతో రెండవ స్థానంలో ఉంది.

మిగిలిన మోడళ్ల విషయానికి వస్తే ప్రీమియం ఎస్‌యూవీ అయిన టిగువాన్ అమ్మకాలు కేవలం 38 యూనిట్లకు పరిమితమయ్యాయి. గత ఏడాదితో పోలిస్తే దీని అమ్మకాలు 51.9% తగ్గాయి. ఇక గోల్ఫ్ మోడల్ కేవలం 2 యూనిట్లు మాత్రమే అమ్ముడైంది. మొత్తంగా చూస్తే వోక్స్‌వ్యాగన్ అమ్మకాలు ప్రధానంగా వర్టస్, టైగున్ మోడళ్లపైనే ఆధారపడి ఉన్నాయి.

వార్షికంగా వృద్ధి ఉన్నప్పటికీ, అక్టోబర్ 2025తో పోలిస్తే నవంబర్ నెలలో అమ్మకాలు తగ్గాయి. మొత్తం అమ్మకాలు 4,048 యూనిట్ల నుంచి 3,342 యూనిట్లకు పడిపోయాయి. వర్టస్ అమ్మకాలు నెలవారీగా 9.29% తగ్గగా, టైగున్ అమ్మకాలు 30.96% భారీ క్షీణతను నమోదు చేశాయి. అయితే టిగువాన్ మోడల్ అమ్మకాలు మాత్రం స్వల్పంగా (15.15%) పెరిగాయి. సాధారణంగా పండుగల సీజన్ తర్వాత అమ్మకాల్లో కొంత తగ్గుదల కనిపించడం సహజం.