Volvo : వోల్వో నుంచి కొత్త ఎలక్ట్రిక్ కారు.. సింగిల్ ఛార్జింగ్‌లో 480 కి.మీ!
సింగిల్ ఛార్జింగ్‌లో 480 కి.మీ!
Volvo : లగ్జరీ కార్ల తయారీ సంస్థ వోల్వో భారతదేశంలో తన కొత్త ఎలక్ట్రిక్ ఎస్‌యూవీని విడుదల చేసింది. దాని పేరు వోల్వో EX30. ఈ కారు ప్రారంభ ధర రూ.39.99 లక్షలు (ఎక్స్-షోరూమ్). ఈ ధర కేవలం అక్టోబర్ 19, 2025లోపు బుక్ చేసుకునే వారికి మాత్రమే వర్తిస్తుంది. ఆ తర్వాత కారు ధర ₹41 లక్షలు అవుతుంది. ఈ కారు డెలివరీలు నవంబర్ మొదటి వారం నుంచి మొదలవుతాయి. భారత మార్కెట్లో ఈ వోల్వో EX30 కారు హ్యుందాయ్ ఐయోనిక్ 5, బీవైడీ సీలియన్ 7, కియా ఈవీ6, మినీ కంట్రీమెన్ ఎలక్ట్రిక్ వంటి వాటితో పోటీ పడనుంది.
ఈ వోల్వో EX30 అనేది వోల్వో కంపెనీ నుంచి భారతదేశంలో వచ్చిన అత్యంత చౌకైన ఎలక్ట్రిక్ కారు. ఇది బెంగళూరులోని హోసకోటే ప్లాంట్‌లో తయారవుతుంది. ఈ కారులో 69 kWh బ్యాటరీ ప్యాక్ ఉంది, ఇది ఒకేసారి ఛార్జ్ చేస్తే 480 కిలోమీటర్ల రేంజ్ ఇస్తుంది. వోల్వో EX30లో ఒకే ఒక రియర్-యాక్సిల్ ఎలక్ట్రిక్ మోటార్ ఉంది. ఇది 268 బీహెచ్‌పీ పవర్, 343 ఎన్ఎమ్ టార్క్‌ను ఉత్పత్తి చేస్తుంది. ఇది కేవలం 5.3 సెకండ్లలో 0 నుంచి 100 కి.మీ./గంట వేగాన్ని అందుకోగలదు. ఈ కారు టాప్ స్పీడు గంటకు 180 కి.మీ.
వోల్వో ఈ కారుతో పాటు 11 kW వాల్‌బాక్స్ ఛార్జర్‌ను అందిస్తుంది. ఈ ఛార్జర్‌తో కారును 0 నుంచి 100% వరకు ఛార్జ్ చేయడానికి సుమారు 7 గంటలు పడుతుంది. ఈ కారు బ్యాటరీపై కంపెనీ 8 సంవత్సరాలు లేదా 1,60,000 కి.మీ.ల వారంటీని ఇస్తుంది. అంతేకాకుండా, 3 సంవత్సరాల పాటు కారు వారంటీ, 3 సంవత్సరాల వోల్వో సర్వీస్ ప్యాకేజీ, 3 సంవత్సరాల రోడ్‌సైడ్ అసిస్టెన్స్ కూడా లభిస్తాయి.
వోల్వో EX30లో అనేక కొత్త ఫీచర్లు ఉన్నాయి. ఇందులో 5 రకాల యాంబియెంట్ లైటింగ్ థీమ్స్, హర్మాన్ కార్డాన్ సౌండ్ సిస్టమ్, 12.3-అంగుళాల ఇన్ఫోటైన్‌మెంట్ డిస్‌ప్లే, పెద్ద పనోరమిక్ సన్‌రూఫ్, డ్యూయల్-జోన్ క్లైమేట్ కంట్రోల్, వైర్‌లెస్ ఛార్జింగ్, ఎల్‌ఈడీ హెడ్‌ల్యాంప్స్, నార్డికో అప్‌హోల్‌స్ట్రీ, 18-అంగుళాల అల్లాయ్ వీల్స్ ఉన్నాయి. ఈ ఫీచర్లు కారుకి ఒక లగ్జరీ లుక్‌ను ఇస్తాయి.
